World Cup atangin Brazil an tla! Semi Final-ah Belgium

World Cup vawi 5 champion tawh Brazil chu Belgium hneh lovin quarter final-ah an tla ta a. Belgium-in Brazil theihna hre ranin game awmze nei an khel a, player experience nei tha tak tak an neihte hmang tangkaiin Semi Final an inhlangkai ta!

Starting Line-up

BRAZIL

Goalkeeper: 1 Alisson (Roma)

Defenders: 22 Fagner (Corinthians), 12 Marcelo (Real Madrid), 2 Thiago Silva (Paris St Germain), 3 Miranda (Inter Milan)

Midfielders: 17 Fernandinho (Manchester City), 15 Paulinho (Barcelona), 11 Philippe Coutinho (Barcelona), 19 Willian (Chelsea)

Forwards: 10 Neymar (Paris St Germain), 9 Gabriel Jesus (Manchester City)

BELGIUM

Goalkeeper: 1 Thibaut Courtois (Chelsea)

Defenders: 2 Toby Alderweireld (Tottenham), 4 Vincent Kompany (Manchester City), 15 Thomas Meunier (Paris St Germain), 5 Jan Vertonghen (Tottenham)

Midfielders: 7 Kevin de Bruyne (Manchester City), 8 Marouane Fellaini (Manchester United), 10 Eden Hazard (Chelsea), 6 Axel Witsel (Tianjin Quanjian)

Forwards: 22 Nacer Chadli (West Brom), 9 Romelu Lukaku (Manchester United)

Beisei lawk ang ngeiin he game hi a hmuhnawm a, whistle rik hmasak ber atanga hun tawp whistle rik thlengin a hmuhnawm tluanchhuak zak a ni ber.

Team pahnihten player an nei tha dun bawk a, game a puiin a level a sang hle. Beisei aia hmain goal kan hmu a, minute 13-naah Belgium-in corner an pet chu Vincent Company chuan tauh pialin, Fernandinho darah a per a, Brazil lamah a goal ta mai.

Belgium game plan a fuh chho tulh tulh a. Fimkhur taka defensive game play pahin Kevin de Bruyne chu attacking midfield lamah a tawlh phei a, Hazard leh Lukaku nen an hnawk thin hle. Hetih lai hian De Bruyne hnung chiahah defence pui tur leh Brazil attack dangchat turin tharum ngah lu kir pahnih, Fellaini leh Witsel an dah bawk a, hei hian Brazil attack tamtak an dang chat a ni. Neymar pawh Belgium defender leh defensive midfielder tharum ngah tak takten free taka ball khawih hman lek lovin an zim buai reng a, hei hian Brazil attack na tak awm thin pawh a ti thuanawp nasa hle a ni. Heti chung hian Brazil hian goal hlauhawm an nei zauh zauh tho a, Belgium defender-te hahdamin an awm hman chuang lo. Hetiang a nih avang hian Belgium hian uluk takin defensive game an khel a, Brazil chetsual zeuh kara counter attack an nei phei thin chu a hlauhawm deuh vek a ni ber.

Minute 30 an khel chho a, Belgium defence lamin Brazil ball cross dang chatin, Lukaku chuan yard 45 atangin midfield-ah ball a la phei a, thui tak a khalh phei hnuah De Bruyne tan ball tha tak a pe. De Bruyne chuan penalty area pawn yard 22 atangin dik lutukin ball a pet a, goalkeeper man phak lohin goal kilah a lut chiang hle. Minute 32-ah Belgium-in 2-0 in hma an hruai ta der mai! Goal khungtu pahnihte hi Manchester City player ve ve an ni. De Bruyne freekick a goal teuh hle a, Brazil goalkeeper Alisson-a’n rang takin a namchhuak hman hram.

First half a tawp a, FIFA Ranking No. 3 Belgium-in ranking no. 2,  World Cup a vawi 5 champion tawh awmchhun Brazil lakah 2-0 hma an hruai.

Second half an tan a, Brazil lamin Willian lachhuakin Roberto Firmino an dah lut a. Neymar pawh a sir lam atangin a lai lamah a tawlh lut ta bawk a, zalen taka tal thei turin an dah ta. Second half-ah Brazil game dang daih kan hmu a, an attack a nain, goal hlauhawm an nei chho mawlh mawlh a, Belgium defender experience nei tha tak takte an talbuai teuh thin hle.  Heti chung hian Belgium lamin counter attack an nei thut thut a, goal hlauhawm pawh an sualchhuak ve zauh zauh bawk.

Brazil manager-in minute 73-naah Paulinho lachhuakin Renato Augusto a dah lut a, a rawn tangkai nghal kher mai. Minute 76-ah Coutinho ball vawrh luh tha tak chu substitute Renato Augusto chuan a tauh lut ta nge nge a, 1-2 a ni ta! Brazil an phur tulh tulh a, Belgium attack a mumal hlei thei tawh lo thung. Minute 80-naah Renato Augusto bawk hian goal chance tha lutuk a nei a, goal zawnah a pet thei lo thung. Minute 83-naah Neymar-a ball siam tha lutuk chu Coutinho chuan a chhuah ho hle bawk.

Kevin de Bruyne : Player of the Match

Minute 87-naah Belgium chuan attack a hun tawh lo tih hriain Lukaku an lachhuak a,  central midfielder Youri Tielemans an dah lut thung a. A theihna apiangah time pass an tum tawh bawk.  Hun pek belh minute 93-naah Neymar chuan goal shot hlauhawm lutuk a nei a, Belgium goalkeeper Courtois-an rang lutukin a nem chhuak hman.

Hun a tawp zui a, World Cup-a vawi 5 lai champion tawh Brazil chu Semi Final lut lovin an tla ta a  ni. He match hi tun tum World Cup match awm tawhah chuan a hmuhnawm ber a chhal ngam a ni a. Belgium-in first half-a an game plan fing tak leh Brazil lam finishing tha tawk lo an chak pui a ni ber e.

World Cup-a Belgium thlen san ber tum chu kum 1986 kha niin, palina an ni a. 2002 leh 2014 khan quater finals-ah tlain, South American team Brazil leh Argentina an lo hneh lo tawh a ni.