Wenger him nan Europa League

Arsenal Striker Alexander Lacazette chuan an boss Arsene Wenger-a’n a hna a chan loh nan Europa League an chawi a ngaih thu a sawi. Arsenal hian CSKA Moscow hnehnin Europa League semi-final an lut a, Atletico Madrid nen final luh an inchuh dawn.

Premier League lamah an dinhmun a chhiat avangin season thara Champions League khel pha turin Europa League-a an champion ngei a ngai dawn a ni. Hemi chungchang hi Arsenl striker Lacazette chuan sawiin, ” Champions League khelh nan ringawt champion kan tum dawn lova, kan manager-in a hna a chan loh nana kan tih theih awmchhun a ni” a ti.

French manager Arsene Wenger hian kum 1996 atang khan Arsenal hi a enkawl tan a, khawvela manager ropui ber pawl nimahse kum 20 hnuah chuan fans tam takin Arsenal chhuahsan turin an duh tawh zawk a ni. Fans ten chhuak tur an duh chhan ber hi tropy lian tham an chawi theih loh vang a ni a, domestic cup (FA Cup, League Cup) velah champion pui thin mahse a aia lian zawk, Premier League leh European trophy a chawipui hleih theih loh avangin chhuak tura duh thu an tam phah hle.

Premier League-ah hian kum 2003-04 season-a ‘hnehtheih loh team’ a siam hnuah ala champion leh lova, European competition-ah phei chuan kum 2005-06 a runners-up anih pui kha a thlen san pui ber a la ni reng.

Tun season-ah Premier League lamah parukna an ni mek a, season hmasa ang thoin season thara Champions League khel pha chin dinhmun (top-4) an luah leh dawn lo. Heivang hian Europa League-a an champion ngei ngei a ngai dawn a, an champion chuan league-ah eng dinhmunah pawh awmse season tharah Champions League an khel thei ang.

Hetiang dinhmuna an din mek avang hian Wenger hi ban tawk thei reng a ni a, season thara Arsenal a enkawl zel dawn leh dawn loh chu Europa League-a an champion leh champion lohin a hril thui hle dawn a ni.

Wenger-a’n Arenal nomawi a chawipui tawh te:
FA Premier League (3): 1997–98, 2001–02, 2003–04
FA Cup (7): 1997–98, 2001–02, 2002–03, 2004–05, 2013–14, 2014–15, 2016–17
FA Community Shield (7): 1998, 1999, 2002, 2004, 2014, 2015, 2017

Arsenal-ah hian 1 October 1996 atanga tun thlengin manager hna a thawk a, he thu ziah lai hian game 1,227 enkaawl tawhin, hnehna vawi 704 a chanpui a, inhnehtawk vawi 279 leh chak loh vawi 244 a nei tawh a ni.