Wembley Stadium an hralh dawn

Wembley Statdium will host the finals of the Football competition in 2012

Fulham Football Club neitupa Shahid Khan chuan Football Association (FA) hnenah, England-a stadium lian leh hming thang ber Wembley stadium lei dilna thlen a, thla hnih thum chhungin indawrna a fel hman a beisei.

England rama football enkawltu FA pawhin stadium lei dilna hi ngun takin an ngaihtuah a, hralh mai an duh zawk dawn niin a lang. Wembley hi £900m man tura chhut a ni a, Khan hian FA hnenah £600m pein neitu nihna a chang anga, FA lamin £300m hlutna nei Wembley hospitality business an enkawl chhunzawm thung ang.

Engvanga hralh tum nge an nih?

Wembley stadium hi kum 4 chhung an sak hnuah kum 2007 khan hawn a ni a, mihring 90,000 lengin, a sak nan hian £757m an seng. Stadium sakna senso hi FA hian public bodies hrang hrang Sport England, the Department of Culture, Media and Sport, leh London Development Agency atangin sum an puk a, stadium atanga hlawkna an hmuhin an leiba te an rul ve zel a ni. FA financial report thar berin a tarlan dan chuan tunah hian FA hian leiba £113m ala nei a, tuna an kal danah chuan an leiba hi kum 2024-ah an pe tla thei chauh dawn a ni.

Stadium £600m-a an hralh chuan an leiba zawng zawng an rul nghal vek thei dawn a, sum tam tak hmangin grassroot football changtlung zawkin an kalpui thei bawk ang. Naupangte tan football zirna tha leh changtlung zawk tam tak an siam belh thei dawn a, heihi an nakin hun atana an chhawr tangkai zawk an beisei a ni.

Tunge Khan?

 

 

Kum 67 a upa Sahid Khan hi Lahore, Pakistan-a piang  a ni a, kum 16 a nihin engineering zir turin United States-ah pem. A thiamna te hmangin sumdawnna a kalpui chho a, mi hausa tawntaw ani chho ta a ni. Forbes magazine-in khawvela mihausa list a siam thar berah  217-na niin, a hausakna hi $7.2bn (£5.2bn) a ni. America rama hausa 73-na a ni bawk. Kum 2011 khan National Football League (NFL) club Jacksonville Jaguars a lei a, kum 2013-ah english football club Fulham a lei leh bawk.

Wembley engnga tan nge an hman dawn?

Shah Khan hian Jacksonville Jaguars a lei tirh hian an inremnaah NFL match chu Wembley stadium-ah a khelhpui tur thu a tiam tel a, hemi tihlawhtling tura an hmalakna kal zel a ni. NFL hi US-ah khelh thin nimahse, kum 2007 atang khan US-a an chawlh laiin International Series London leh Mexico-ah an khel thin a, London-a an khelhna hmun ber chu Wembley stadium hi a ni.

Khan hian Wembley a lei theih chuan Jacksonville Jaguars hian an home (stadium)-ah an hmang nghet tawh dawn a, heihi an club hmasawnna leh sumdawnna zauh nana thil tangkai ber tur a ni ang.

Buaina tur?

Wembley Stadium hi England National (football) team te stadium a ni a, national team inkhel bakah England ram chhunga football match pawimawh hrang hrang FA Cup, League Cup leh Play-off final khelh nan hman thin a ni. Player te pawhin Wembley stadium-a khelh phak leh khelh theih hi inchhuanna pakhatah an hmang thin.

Heng zawng zawng hi stadium hralh a nih chuan khelh vek theih a ni tawh dawn lova, FA âi Shah Khan a thu zawk tawh dawn avangin football fans tam tak chuan hralh lova, tuna an kal dan anga kalpui chhunzawm an duh zawk a ni.

Stadium hralh tur hi engmah thuthlukna tihchian a la awm lova, Prime Minister Theresa May bakah mi pawimawh tak tak ten FA  chu ngun taka an ngaihtuah hnuah thuthlukna siam chauh tura an rawn avangin hun erawh ala duh rei deuhin a rinawm.