US-in Iran Oil thawnchhuah tihtawp tum mek : “India leh China-te pawhin Iran atanga an oil lakluhte an titawp tur a ni” – US

Thla hmasa lawka Iran Nuclear Deal atanga a inhnuhdawh fel hnuah US chuan Iran chu na zawka hrek tumin hma a la chho zel a. Iran nena insumdawn tawnna nei ram leh company-te chu Iran nena an inzawmna an chhut chah loh chuan hremna pekah a vau kual mek.

Khawvel ram engemawzat chu Iran atanga an oil lak thinte ti tlem hret hret a, November 4-ah chuan titawp vek tawh turin a hriattir a. An titawp lo a nih chuan US chuan hremna lek ngei an tum thu an sawi a  ni.

Reporter-ten he vauna hian China leh India a huam ang em ti a an zawhna chu US state department a high official pakhat chuan chhangin, India leh China pawhin November 4-ah chuan Iran atanga an oil lakluh thinte an tihtawp vek a tul tur thu an sawi a. Hemi hnu lamah chuan ngaihnatthiamna a awm dawn lo a ni tih chiang takin an sawi bawk.

Hetih lai hian Iran hi Iraq leh Saudi Arabia tih lohah chuan India-in ram dang atanga oil a lakluhna lian ber (pathumna) a ni mek a, 2017-2018 fiscal year thla 10 chhung (April 2017-January 2018) ringawt pawh khan India hian Iran hnen atangin oil 18.4 million tonnes zet a lalut a ni.

US hian khawvel ram hrang hrang bakah ram dang company za chuang zette chu Iran nena an inlaichinnate chhu chat vek turin a hriattir tawh a. An chhu chat lo a nih chuan hremna (sanction) na tak pek ngei an tum thu an sawi a. Heng zingah hian India leh China company engemawzat pawh an tel nghe nghe a  ni. Hei hi US-in Iran a hremna kal mek a Iran sorkar sum hnar zawng zawng chhut chah a tumna kal zel niin sawi a ni.

Official chuan, “He thil hi ram himna atana kan ngaihpawimawh ber pakhat a ni mek a. EU-3 (France, Germany & UK)-te nen pawh sawiho mek a  ni” tiin, chinfel thuai beisei a nih thu an sawi a ni.

He Iran Oil supply chungchang hi July thla tira US leh India ram hruaitu pawimawhte inbiakna tur, 2+2 dialogue an tih maiah pawh sawichhuah a nih ngei rin a ni a. He inbiaknaah hian External Affairs Minister Sushma Swaraj chuan US lama a counterpart Secretary of State Mike Pompeo a hmu ang a, Defence Minister Nirmala Sitharaman pawhin a American Defence Secretary James Mattis a hmu bawk ang.

US-in hetianga thu leh hla a neih hnu hian khawvel hmun hrang hrangah oil man 3% velin a sang nghal a. Iran hi oil thawnchhuaktu ram OPEC ho zinga a lian ber pathumna a nih mek avangin hei hian eng ang takin nge oil lamah harsatna a thlen dawn tih hi ngaihtuah tham tak a ni. Iran hian tunah hian nitin oil barrel maktaduai 2.5 vel a thawnchhuak mek a ni.