Central Pool hnuaia Mizoram quota a MBBS zir theihna tihtawp a ni ta; Mizo zirlai thenkhat an vanduai

Mizoram-in kum danga Central pool hnuaia MBBS seat engemawzat a neih thin chu kum 2018 atangin tih tawp a ni ta a. Mizoram tana Central Pool hnuaia MBBS seat pek a nih tawh loh thu hi Mizoram sorkar pawh hriattir a ni tawh niin Hillsgate chuan thu a dawng.

Central sorkar hian medical college hrang hrangah MBBS seat engemawzat hauhin, chungte chu state hrang hrangah a sem darh leh thin a. He Central pool hnuaiah hian kum 2017 khan Mizoramin MBBS seat 17 a nei a, kum 2016 khan seat 25 neih a lo ni tawh bawk. Heng zingah hian India ram pum huap pawha medical college tha tak takte pawh an awm a. Heng zawng zawngte hi kum 2018 atang hian tihtawp a ni ta a ni.

Central pool hnuaia Mizoram quota MBBS seat tih tawp a nihna chhan hi Mizoram sorkarin a ma puala MBBS zir theihna Medical College, Mizoram Institute of Medical Education & Reasearch (MIMER), Falkawna a neih ve tak vang ni a hriat a ni a. Hetih lai hian kum dangah pawh Medical College nei ve tho North East state dangte chu Central pool hnuaiah hian MBBS seat engemawzat pek an ni ve thin tho a. Mizoramin MIMER a neih tak avanga central pool hnuaia a quota neihte tihtawpsak a nihna chhan chiah hi hriat a ni rih lo.

Zirlai thenkhat an vanduai

Hetih lai hian Mizo zirlai engemawzat, NEET-a ti tha ber berte zingah Central Pool hnuaia Medical College tha zawk beisei avanga MIMER leh North East-a Medical College hrang hrang (NEIGRIHMS, RIMS Imphal, AMC Dibrugarh, etc) lo hnawl tawh an awm nual a. Amaherawhchu, Central pool atanga seat hmuh a nih tak si loh avang leh, Mizoramin seat a neihna dang hnawhkhah a nih tawh si avangin heng Mizo zirlai, NEET a ti tha ber berte hian kum 2018 atan chuan MBBS an zir thei dawn ta rih lo a ni.

MIMER-a Mizo zirlai, admission ti tawh zinga NEET a mark hmu sang berin 287 a hmuh laiin central pool beisei avanga seat chang ta lo thenkhatte chuan NEET-ah hian mark 364-te, 349-te an hmu pha a ni.

%d bloggers like this: