UEFA Champions League Final 2018

Khawvela football club inelna sang ber UEFA Champions League final chu Inrinni (May 26)  zan lai dar 12:15-ah an khel dawn a, champion lai Real Madrid leh Liverpool an intum dawn.

Eng nge UCL?

UEFA Champions League Trophy

Europe rama football thuneitu sang Union of European Football Associations (UEFA) chuan an huamchhunga football club tha ber ber te inel nan kum 1955 khan a buatsaih tan a, European Champion Clubs’ Cup (UEFA Cup) tih a ni. Kum 1992-ah tuna kalphung mil hian siam danglam hret niin, a hming pawh UEFA Champions League (UCL) tia thlak a ni.

Real Madrid vs Liverpool

Kumin UCL final-a intum tur team pahnih hi UCL chanchina team hlawhtling ber te zinga mi an ni a. Real Madrid hi vawi 12 champion tawhin champion lai leh champion hnem ber an ni a, champion hmasa ber an ni bawk. UEFA Cup tih laiin a zawnin vawi 5 an champion tawh a, a hming thlak hnua kum zawna champion thei hmasa ber an ni leh bawk. Kumin ah an champion leh anih chuan a zawna vawi thum an champion na tur a ni dawn a, khawvela football club ropui ber an nih zia an nem nghet ang!

Liverpool hi vawi 5 an champion tawh a, kum 2005 kha an champion hnuhnun ber a ni thung. Liverpool aia champion hnem hi Real bakah, vawi 7 champion tawh AC Milan chiah an awm a, kumin-ah Liverpool hi an champion chuan vawi 5 aia tam champion thei team pathumna an ni ang.

Final kalkawng

Real Madrid hi group H-ah Tottenham Hotspurs, Borussia Dortmund leh APOEL te nen an awm a, pahnihna ni chungin knock-out round an lut. Group stage-ah hian vawi 4 chakin vawi khat ve ve chak loh leh draw an nei a, goal 17 thunin, an lamah goal 10 a lut ve bawk. Round of 16-ah Paris Saint- Germain chu 5-2 (agg.) a hnehin quarter final an lut a, hetah hian Juventus chu 4-3(agg.) in an hneh leh a, semi-final ah Bayern Munich chu 4-3 (agg.) bawka hneh lehin final an lut ta a ni.

Liverpool hian qualifying round-ah Hoffenheim chu 6-3 (agg.) a hnehin group stage an lut ve a, group E-ah Sevilla, Spartak Moscow leh Marribor te nen an awm ho. Group stage-ah vawi thum chakin vawi thum tho inhnehtawk an nei a, goal 23 thunin goal 6 chiah an chhuah a, hmahruaitu ni chungin knock-out round an lut. Round of 16-ah Porto 5-0 (agg.), Quarter final-ah Manchester City 5-1 (agg.) leh Semi-final ah 7-6 (agg.) a hnehin final an lut a, goal thun hnem ber club ni chungin final an lut a ni.

Final-a an sulhnu

Real Madrid hian final vawi 15 an khel tawh a, heng zingah hian vawi 3 chiah chak lo zawkah an tang. Kumin hi final vawi 16 an khelhna tur niin, kum 1998 atang khan final vawi 6 an lut tawh a, an la champion vek a ni.

Liverpool tan kum 2007 hnua final an luh lehna hmasa ber a ni a, vawi 8 final an khelhna tur a ni. Vawi 7 final an khelh tawhah vawi 5 champion an ni a, kum 1985 hnulama final vawi 3 an luhna chiah a ni thung.

ISTANBUL, TURKEY – WEDNESDAY, MAY 25th, 2005: Liverpool’s Steven Gerrard lifts the European Cup after beating AC Milan on penalties during the UEFA Champions League Final at the Ataturk Olympic Stadium, Istanbul. (Pic by David Rawcliffe/Propaganda)

Kum 1981 khan final-ah hian an lo intum tawh a, Liverpool hi 1-0 in an lo chak tawh a ni.

Final khelhna tur

Ukraine khawpui Kiev-a stadium hmingthang, mi 70,000 lenna NSC Olimpiyskiy Stadium-ah an khel dawn a, club pahnih te ticket 17,000 ve ve pek niin, ticket 6,700 chu neutral fans tan an zuar bawk. A bak zawng hi UEFA, National Associations, sumdawnna leh TV lama an thawhpui hrang hrang te hnenah pekchhuah a ni ve thung.

NSC Olimpiyskiy Stadium

Final-ah hian Ukrainian international hlu Andriy Shevchenko chu ambassador a ni dawn a, a hawn nan English singer Dua Lipa a zai bawk ang.

Head-to-Head

Team pahnih te hi vawi 5 an lo inhmachhawn tawh a, Liverpool vawi 3 chakin, Real vawi 2 an chak ve thung. An intum hnuhnung ber hi kum 2014 November thla kha niin, Real 1-0 in an chak a, khami tuma Real player tam zawk hi tunah pawh an la khel a ni.

Nov. 2014-a an squad-
Liverpool: Mignolet, Gerrard, Skrtel, Sterling, Manquillo, Moreno, Emre Can, Lucas, Allen, Lallana, Borini, Toure, Markovic, Coutinho, Johnson, Henderson, Balotelli.
Real Madrid: Casillas, Ramos, Arbeloa, Varane, Marcelo, Bale, Isco, Kross, Modric, Pepe, Nacho, Navas, Benzema, Rodriguez, Hernandez.

An inkhelh hnuhnung bera an player leh tuna an player en chuan team ngialnghet zawk chu a hriat theih mai a, mahse final match a nih tawh avangin chak zawk tur erawh sawi thiam a har hle.
Real hi an chhiatna lai sawi tur a awm lo tih theih a ni a, Liverpool erawh an forward pathum bak chhuan tur an nei meuh lo. Salah, Firmino leh Mane inkawp erawh khawvela defender tha ber te tan pawh huphurawm tham an ni a, final hmuhnawm tak kan hmu dawn a ni.