Tunge Salah?

Football ngainatute zingah ‘Tunge Salah’ tih zawhna zawt ta ila, min chhang thei lo chu an tlem viau awm e. Tun season kal meka player tha leh lar ber pawl Mohamed Salah chanchin tawi bih kual dawn teh ang.

Bul tanna
Salah hi kum 1992 June 15 khan Nagrig, Egypt -ah a lo piang a, a hming pum chu Mohamed Salah Ghaly tih a ni.
An ram club El Mokawloon SC-ah football zinkawng a zawh tan a, kum 2010, May 3 khan senior team tana a game hmasa ber a khel. An ram league sang ber Egyptian Premier League-ah season thum khelin, game 44-ah goal 12 a thun hman a ni.

Switzerland-ah
Kum 2012-ah Swiss football club FC Basel chuan an lalut a, hei hi khawvelin an hmelhriat tanna a ni.


Switzerland rama football inelna sang Swiss Super League-ah Basel chu season hnih (2012-13& 2013-14) a champion pui nghal a, kum 2013-ah hian Swiss Association of Football Players (SAFP) Golden Player atan an thlang nghe nghe.

England-ah..mahse!!
A chet that avangin Basel tan season hnih chiah a khel hman a, English club lian Chelsea chuan an rawn chhuhsak nghal vat a ni. Basel tan hian game 79 khelin goal 20 a thun hman.

Chelsea a zawm erawh a tifuh lo ve hle a, a ni aia player tha an lo kawl hnem avangin khelhna hmun a chang thei lova, Italy lamah loan a chhuahtir lawp lawp a ni. Chelsea hi January 2014-ah a zawm a, February 2015-ah Florentina-ah loan a kal tir niin, August 2015-ah AS Roma-ah an kal tir leh bawk. Chelsea tan hian vawi 19 chiah a khel hman a, goal hnih a thun ve a ni.

Italy-a a sulhnu
Chelsea-in loan-a an chhuahtir hmasak zawk hi season chanve chiah a ni a, a chhuah chhung rei lo mah se Fiorentina tan erawh a che tha hman hle thung. Game 26 khelin goal 9 a thun hman a, goal thun hnem pathumna a ni pha nghal a ni.

Season tawp hnuah Fiorentina hian loan-a hawh chhunzawm an tum hle a, mahse AS Roma chuan a hawh man (pawisa) an pek tam theih zawk avangin Chelsea chuan 2015-16 season khan Rome khawpuiah an kaltir a, an duh chuan a ngheta lalut nghal turin inremna an ziahpui bawk.

Roma tan a season hmasa berah vawi 42 khelin goal 15 a thun a, club top scorer leh player of the season chawimawina a dawng nghal a ni. A chet that em avangin an inremna siam angin Roma hian a lei zui nghal chat a, Chelsea tan erawh an thuthlukna siam sual langsar tak a ni zui ta thung.

Roma tana a season hnihna (2016-17)-ah pawh a che tha chhunzawm reng a, club inghahna laimu ber a ni. Hemi season hian game 41 khelin goal 19 a thun leh a, club tana goal thun hnem pahnihna a ni leh bawk.

England-ah a kir leh
Ropui lo taka a chhuahsan England ramah kum 2017 June thla khan Liverpool player man to ber niin a let leh a, inngaitlawm tak chungin a sulhnu chhe tak chu a thai chhe chho mek.

Chelsea tana khel pha lo kha tunah chuan Premier League-a goal thun hnem ber (31) a ni a, game hnih khelh tur ala neihah goal a thun leh a nih chuan Premier League record siamin season khat chhunga goal thun hnem ber a ni dawn.

Intihsiakna hrang hrangah goal 43 thun tawhin club record a siam mek a, Europe rama season khat chhunga goal thun hnem ber hnena an pek thin ‘European Golden Shoe’ dawng tura a elpui ber pawh Lionel Messi a ni vah tawh mai. Season tir khan tuman Messi leh Salah hi goal thun tam lamah an inel tawk viau ang tih an ring pha awm lo ve!!
Mimal chawimawina hrang hrang a dawn zingah African Footballer of the Year, PFA Player of the Year leh nimin lawka a dawn FWA Footballer of the Year-te chu a langsar an ni a, FWA Award hi African zinga dawng thei awmchhun a la ni nghe nghe.

Tun season-ah record 10 zet a siam tawh a, inngaitlawm, ze zawi leh football pawn lama ler lo tak a nih avangin football fans-te ngainat rawn a hlawh hle.

Season tawp hunah chuan chawimawina pawh a dawn belh ngeiin a rinawm, a record siamte nen chiang zawkin “Egyptian King” chanchin hi kan la tarlang chho zel dawn nia.