TIPS for Developing Confidence

Confidence kan tih hi mahni inrintawkna, “Ka ti thei a ni” tih rilru put tlatna hi  a ni ber a. He mahni inrintawkna rilru hian kan thil tum ti hlawhtling tura kan theihna zawng zawng sawrchhuak turin nasa takin chakna min pe thei a ni. Mihring tumah, thiltih a pianga hlawhtling an awm ngai lova, mahse, miin mahni inrintawkna a neih tlat chuan a hlawhtling leh nge nge thin. Hlawhchham chang awm bawk mah se, hlawhchhamna karah chuan an chak lohna an zawngchhuak a, an insiamtha thuai thin.

Over-confidence laka inven

Mahni theihna/chakna chin hriatchian tawk lohna avangin mahni inrintawkna hi a nasa lutuk palh thei a, chu chuan hlawhchhamna nasa tak a thlen daih thei. Hetianga mahni inring tawk leh lutuk avanga chesual tate hian beidawnna/depression an nei hma bik a, an hlawhchhamna an hrethiam lo/an pawm thei lo fo thin. An hlawhchhamna chu an vanduai vangah te, thil fair lo tak engemaw a awm vangahte an puh fo bawk. Hetiang mite hian ngaihtuahna dik, an thiltum tihlawhtling tura an theihna/chakna tihhmasawn nachang hriatna an mamawh a ni. Mahni theihna chin chiang taka hriat a, thil tihhlawhtlin theih loh turah leh beiseiawm lo lutukah te inhambuai loh a tha ber.

  Self-Confidence neih theih nan…

             Tuk tin thil danga i buai hmain minute 2/3 vel tal inngaihtuah vang vang la. Pathianin uluk taka a siam, target chi hrang hrang tihlawhtling thei tura theihna danglam tak nei i ni tih leh, nangmah ang chiah kha khawvelah a siam ve reng reng lo tihte ngaihtuah ang che.

             I chak lohna laite kha rilru tluang takin chhut let la, vawilehkhata i chaklohna laite tihhmasawn thut tum lovin a tahtawl te a hmasawn tum rawh. Ngun takin i theihna leh thiamna hrechiang turin ngaihtuah la, i thiam leh theih ve reng thilah chuan huaisen taka awm tum rawh.

             Thil tihhlawhtlin theih ngei chauh tih tum la, sang lutuk leh harsa lutuk tih tum ngai suh.

             Hlawhtlinna pakhat i neihin overconfidence i neih loh nan lawm dan tawk thiam a tha. Thil pakhata hlawhtlin avanga phur lutukna lamah hian a aia sang zawk panna kawngah a inchhuih tluk daih theih.

             Mahni indah hniam riauna (inferiority complex) i nei thin em? I lo nei thin a nih chuan i nun atanga i nuaibo ngei ngei a ngai dawn a ni. He rilru, mahni indahhniamna hi Car nalh tak, a pang vel khuar thliah thluah ang mai a ni a, rang taka siamthat vat a ngai a ni. Siamtha thei turin engvanga chutiang rilru chu lo nei ta mai nge i nih tih ngun takin ngaihtuah la. Retheihna vangte, taksa lama rualban loh vangte, vun rawng vangte leh thildang tamtak vang a ni thei ang.

Hetiang harsatna chinfel hi thil harsa lutuk a ni lo. Retheihna avanga hniam bik riau a inngaihna i nei thin a nih chuan pawisa nei thei deuh, hausa deuhte bulah tal tam lo la, an nundan anga nun ve kher tum lo mai rawh. I taksa tlin lohna vang anih chuan taksa hi tihdanglam theih, tihhmasawn theih a ni tih hria la. Danglam thei tawhlo a nih pawhin chu i induhkhawp lohna khum zak thei tur chuan thildangah i theihna i tihpun a ngai a ni mai. Kawng tinrenga duhthusam mihring hi a awm theih reng reng loh tih hre reng ang che.

             Confidence nei tur chuan eng thil pawh ni se practice tam a ngai a ni. Kan practice tam na na na chuan kan thiam chiang a, chu chuan inrintawkna nasa tak min pe thei a ni.

             Hmel hmuh nuam leh personality sang tak neih hian kawng tamtakah tangkaina nei mah se, hetiang mi i ni ve lo a nih pawhin hmelthatna leh personality ringawt hi hlawhtlinna ber a ni lo tih hria la. Amaherawhchu, first impression hi mi tamtak rilru siamtu pakhat a nih avangin incheina uluk tluk a awm lova. Smart thlap, fit tak leh simple tak si a inchei fo tur a ni.

             Engtik lai mahin taksa leh thawmhnaw rim hi a chhe tur a ni lo. Rim diklo pai chungin confidence a neih theih ngai loh tih hriat reng tur a ni.

             Be Positive: Rilru dik leh tluang tak put tum tur a ni. Ngaihtuahna reng reng hian a tha lam, a eng lam, a theihna lam hi a kawk zel tur a ni a. Hei hian rilru hahna chi hrang hrang nasa takin a tikiang thei a. Hmalam pan zelna tur kawngah ke pen a dik duh bik a, harsatna a lo thlen pawhin hmachhawn a awl zawk thin.

Mi inring tawk tak, beiseina a khat leh hmel hlim tak pu reng thei i nih chuan khawiah pawh hmalam panin i kal zel thei ang.

Harsatna hi tlanchhiatsan tura siam a ni lova; hmachhawn a, chinfel tura siam a ni zawk. Harsatna tawk ngailo mihring ropui a awm theih loh a, harsatna tawk a, paltlang nasa apiangte hi an hlawhtling thin a lo ni!