Success story : Pu Lalduhthlana Ralte, Indian Foreign Service (Rtd), CIC, MIC

“College leh University-a Class attendance 95% kan neih a, uluk taka lecture kan ngaihthlak bawk chuan UPSC-ah pawh mahni subject-ah chuan inbuatsaihna dang vak a ngai lo”

Pu Lalduhthlana Ralte hi Mizo-ten Indian Foreign Service (IFS) kan neih tlemte zinga mi niin, Officer chhuanawm leh hnathawk tha taka ni a. Khawvel hmun hrang hrangah India ram aiawhin hna a lo thawk tawh thin a, India sorkar thil pawimawh vawrtawp chi hrang hrang a lo buaipui tawh thin. Officer chhuanawm leh hnathawk tha tak a nih avang a Mizoram sorkar-in Chief Information Commissioner ni tura a chah chhuah ngat a ni a. Mizoram Chief Information Commissioner pathumna ni tur hian December 21, 2016 khan Mizoram Governor-in a la lut a ni.

Family Background

Pu Lalduhthlana Ralte hi Pu SR Vala, IAS (Rtd) leh Pi Lalchhungi-te fapa niin kum 1956 October 17-ah a lo piang a. Mizo zingah chuan pafa a All India Service/Central Service a lut thei tlemte zinga mi an ni. An unau hi 5 niin, mi chhuanawm tak takah an chhuak vek a ni.
Kum 1984-ah Pi Lal Thanziki nen inneiin fa nula pahnih- Lalremruati leh Zorammawii an nei a. Lalremruati hian Philipines-ah hna a thawk mek a ni.

A nupui fanaute nen

Education Background

Orissa (Odisha) leh New Delhi-ah lehkha a zir thin a. Lehkha thiam thei thawkhat tak a ni a, infiamna chi hrang hrang- Football, Hockey, etc-ah a tui thin hle.
Stewart School, Bhubaneswar-ah class 11 thleng lehkha a zir a, Biology subject bikah a tuiin a thiam pawh a thiam hle a. Mahse, Doctor hna chu a thawh peih tur chi ni a a ngaih si loh avangin biology chu a lak chhunzawm duh ta lo a. La chhunzawm lo mah se, a tui em avangin biology class-ah zirtirtute remtihnain a la thu ve fo tho a ni.
IIT Delhi-ah Civil Engineering a zir a, kum 5 zir tur a nih laiin kum 4 a zir zawh hnuah a bansan a. A bansan lai hian result a neih that em avangin an zirtirtute pawhin an ui hle a ni awm e. Engineering atangin Arts lamah a inlet leh ta daih a, Utkal University, Bhubaneswar-ah BA (Philosophy) a chhunzawm leh ta a ni. Delhi IIT-a a zir lai hian Delhi MZP Secretary-te pawh a lo ni ve tawh bawk.

Graduate exam zawh rualin inbuatsaihna hranpa pawh nei miah lovin UPSC Civil Service Exam a hmachhawn leh nghal a. Hemi hnu hian tuifinriata Oil laihchhuahnaah hlawh tha tak neiin hun rei vak lo a thawk leh rih a. Hemi hnu MA (Economics) zawm lehin, MA a zir laiin UPSC Prelims result chhuakah a tling ve leh hlauh a. Coaching kal miah lovin, inbuatsaihna hranpa pawh nei miah lovin, regular taka MA class a kal leh class-a an zir chu rin pui bera hmangin UPSC Main exam a hmachhawn a, a tling leh hlauh a. Interview a paltlang hnuah a service duhthlanna ngat, Indian Foreign Service (IFS) a zawm ta a ni. UPSC Exam a hmachhawn tum hian India ram pumah Scheduled Tribe zingah pakhatna a ni nghe nghe.

“College leh University-a Class attendance 95% kan neih a, uluk taka lecture kan ngaihthlak bawk chuan mahni subject-ah phei chuan inbuatsaihna dang vak a ngai lo” a ti. A zirna kawngah classroom a hmang tangkai hle tihna a ni.

Indian Foreign Service

Kum 1983-ah Indian Foreign Service a zawm a. IFS Officer a nih chhung hian khawvel hmun hrang hrangah a awm kual a, hna pawimawh tak tak thawkin India sorkar tan mi tangkai tak a ni.
IFS a nih chhunga a awmna leh a hna chelh hrang hrangte:

1985-86 : Hongkong-ah Chinese tawng zirin foreign posting hmasa ber a nei.
1987-90 : Beijing, China-ah post leh a ni.
1991-93 : Delhi-ah awmin Soviet Union, Yogoslavia leh Czechoslavakia kehdarh chungchang buaipui tute zingah a tel.
1994-97 : USA-ah post a ni.
1997-2000: Shanghai, China-ah post a ni.
2001-04 : Nairobi, Kenya-ah dah a ni leh a. Hetah hian Dy. High Commissionerhna leh UNEP leh UN-HABITAT-ah Dy.Permanent Representative hna a chelh kawp.
2004-06: Ministry of External Affairs, New Delhi-ah Jt. Secretary hna a chelh. Hetih chhung hian sorkar laipui thu pawimawh vawrtawp an khawih hnem hle.
2007-’10 : Hongkong-ah Consul General hna a chelh.
2010-13 : Brunei-ah High Commissioner (Ambassador)-in sawn a ni.
2014-16 : Manila, Philipines-ah Ambassador-in a awm a, hetah hian a pension thlengin a thawk a ni.

Pu Lalduhthlana IFS (Rtd) hi Mizo zirlaite hmakhua ngai tak a ni a. Mizo thalaite hmasawnna tura hmalakna lamah a tih theih zawng a awm chuan tlanchhe mai mai ngai lo a ni. A fate pahnih pawh Mizorama awm tam lo, Mizo tawng pawh pai deuh lek lek an ni chungin Mizoram an la vei hle a. Mizoram hmasawn nan theihtawp an chhuah mek a ni.

Indian Foreign Service (IFS) Officer senior tak ni a hun engemawchen a hman hnuin Mizoramah Information Commission-a Chief Information Commissioner (CIC) ni turin a lo chhuak a. A hun chawhnu lam chu Mizoramah ngei hun a hmang ve thei ta a ni.

Be the first to comment on "Success story : Pu Lalduhthlana Ralte, Indian Foreign Service (Rtd), CIC, MIC"

Leave a comment

Your email address will not be published.


*


This site uses Akismet to reduce spam. Learn how your comment data is processed.