SAMUEL VANLALNGHETA PACHUAU – Indian Forest Service (IFS)

 

(Armed Veng tlangval, kum 2013-a Indian Forest Service (IFS)-a inziak tling hi tlangval ngaihsanawm tak a ni. A chanchin hi thu thar ni lo mah se, mi hlawhtlingte hlawhtlinna chanchin hi Zirlai ropui tak a nih zel avangin Mizo thalaite cho chhuah nan kan han tarlang a ni)

Samuel Vanlalngheta Pachuau hi kum 1987 khan Civil Hospital, Aizawl-ah Pu P.C. Lalfela leh Pi Kumsangi-te inkarah a lo piang a. An unau hi pathum, hmeichhia pakhat leh mipa pahnih an ni a, Armed veng, Aizawlah an khawsa a ni.

An chhungkua

EDUCATION BACKGROUND
Mary Mount, Tlangnuam-ah zirna tan chhoin nursery atanga cl -VII a zawh thlengin a kal a. High School hi St. Paul’s High School, Tlangnuam-ah a zir thung. HSLC hi Distinction-ah a pass a, English, Science leh Mizo subject-ah letter a hmu nghe nghe. HSSLC hi St. Paul’s -ah bawk zir zawmin 1st Div-ah a pass a ni.

Samuel-a hian Ph. D nih a, University Professor nih a tum ruh hle a. Mahse, a chhungte’n MBBS zir turin an ti thung a. HSSLC a zawh hnu khan MBBS zir tumin State Technical Entrance Examination (STEE) kha a hmachhawn a, mahse, MBBS zir tur chuan a tling lo chiah chiah a. A duh chuan BDS zirna hmun tha thlang thei a nih laiin B. Sc (Forestry) a thlang ta hlauh zawk a. Counselling a member thu zinga pakhat phei chuan a ui viau a ni awm e!

B.Sc (Forestry) chu Dr. Y.S. Parmer University of Horticulture & Forestry, Nauni, Solan, Himachal Pradesh-ah a zir a. B.Sc a zir atang hian lehkha a zir nasa zual sauh a, ‘hnamdang zingah a thiam ber ka ni thei a ni’ tih rilru puin nasa leh zualin a zir a. B.Sc a zawh meuh chuan Topper (Gold Medalist) a ni ta hial a ni. B.Sc a zir lai hian Semester tinah pakhatna a ni tluan parh a ni.

IFS nih hi a tette atanga a tum lawk a ni lova, B.Sc a zir lai pawh hian a rilruah IFS nih tumna a la nei chuang lo. MSc a zir lai, dissertation a tih lai hian ngaihtuahna pakhat a nei thar a. Pawn lam atangin environment-te zirchiangin nasa takin hma la mah se, a tihhlawhtlinna (implement) lama thawktu a nih si loh chuan awmzia a awm tak tak lo tih a hrechhuak a. Chuta tang chuan IFS lama luh pawi tih lohna leh chakna a rilruah a rawn intuh tan ta a ni.

B.Sc a zawh hnu chuan NEC kaltlanga Mizoram-in seat 1 kan neihna Wildlife Institute of India, Dehradun, Uttarakhand-ah M.Sc zir turin a inziak tling leh a. M.Sc entrance, Wildlife Institution of India (WII) entrance-ah hian tribal zingah 1-na a ni a. Tribal zinga 1-na a nih avangin M.Sc a zir chhung hian a zirna senso cheng nuai thum vel leh a zirna atana a mamawh zawng zawng chu a zirna institution hian an tum sak vek a ni. M.Sc a zir zawh thleng hian a kal leh hawnaah hian thlawhnaah a chuang ve ngai lo a, zirlai nih laia hautak taka awm a duh loh vang a ni ber.

Kum 2011 khan M.Sc a zo a, All India-ah 2-na a ni. M.Sc a zawh hnu pawh hian Ph.D nih chu a la tum ta fan a. Ph.D niha Professor nih chu a tum ber a nih avangin IFS lam pawh chu a hlamchhiah deuh a, syllabus pawh chu B.Sc a nih lai angin a bih ngun ta lo a. Oxford University, United Kingdom leh USA atangte pawhin Ph.D zir tura sawmna pawh hi a hmu a. A zirna senso foreign student tan cheng nuai 13 vel a ngaih avangin an tlin ngang si lo.

Kum 2012 khan Cambridge University, United Kingdom-ah Poster present-in a zu kal ta tho a. Hemi kum vek hian Oxford University, UK-ah Visiting Scholar-in a zu awm leh bawk. Hemi tum hian Oxford University-a an Professor nen thla hnih chhung an zu inhrawn hman a. Hei hian Professor nih a chak zual tir hle a ni.

Oxford University atanga a rawn haw hnu hian IFS exam turin a inbuatsaih ta tak tak a. A lak ngai loh Zoology subject a lak a ngai tlat mai a, thla thum chauh hun a awm tawh chungin subject thar Zoology chu a bul atangin chawpchilh takin a han zir tha leh ta a. Tichuan, IFS exam chu kum 2012 June thla khan a hmachhawn a, vanneihthlak takin a tling ve ta hlauh a ni.

A LEHKHA ZIR DAN
Zanriah ei kham atanga dar 2 thleng a zir tlangpui thin, a lehkha zir hi a nuin dar 10 thleng a nghak thin bawk a. Dar 10-ah thingpui a lum sak ziah a, thingpui a in zawhah a nu hian a mut san chauh thin a ni. A piin bang loin a tawngtai sak ziah bawk a, “Eng nge an ziah a, eng nge an zir tih ka hre ve lo chung hian an pen hmawr thlengin ka tawngtai sak thin,” a ti.

A lehkha zir chhung zawng hian vawikhat mah tuition a la ngai lo a. IFS exam a beih dawn pawh hian coaching class vawi khat mah a kal lo bawk a ni.

PERFORMANCE/ACHIEVEMENT
St. Paul’s High School-ah an class a naupang fel lawmman, Miss Sangpuii Award a dawng ve tawh a. B.Sc-ah topper a nih avangin Jawaharlal Nehru Memorial Fund, New Delhi chuan Merit Award an hlan bawk. Hei bakah hian Wildlife Institute of India chuan a zirna sen so thla tin an sponsored bawk. M.Sc a zir lai hian Dampa Wildlife Sanctuary-ah thla 4 chhung tehmeuh mai chu Hauhuk chanchin, ram chereu tawha Hauhuk nungchang leh ramngaw la tha tak hnuaia Hauhuk nungchang inan lohna zirin Dampa ngawpui hnuaiah a zu riak ve ren rawn tawh bawk.

Outstanding Performer Award of Himachal Pradesh State 2008-2009 a dawng a. Hei hian Trophy leh Citation a keng tel a, Himachal Chief Minister-in lawmman hi a hlan nghe nghe. Zirna sang zawk a zir lai hian a zirna hmunah zirlai hruaitu a lo ni zak zak tawh a. North East Students’ Asssociation-ah 2005-2009 chhung khan President leh Secretary hna a chelh thin.

– Uniform nen

IFS EXAM CHU LE….
IFS Exam-a written an tih lai hian Paper pakhat a tichhe deuh a, darkar 3 chhan turah darkar 2-ah a zo fel daih a, hrehawm a ti hle a. GK pawh ti tha a inti lutuk lo. A dangah chuan har tih em em a nei lo. Interview pawh zam hauh lovin a hmachhawn thei a, a lawm ve hle.

Samuel-a hi tawng rang tak a ni a, B.Sc leh M.Sc a zir lai pawh hian an zirtirtute’n, “I tawng rang bawk si a, thil han zawh che hian min chhang nghal zung zung a, a tha lo. Nakinah interview i la hmachhawn ang a, i chhan thuai thuai chuan zawhna an zawt hnem bik ang che. I thiam reng pawh hi ngaihtuah ni awm takin second sawm (10) vel awm thin rawh” tiin an hrilh hial a ni! IFS interview a hmachhawn pawh hian zawhna an zawt hnem hman viau a ni awm e.

“Interview-naah hian kan subject lam min zawt nasa hle a, nuam ka ti khawp mai. Interview Board Chairman kha Meghalaya mi a ni a, Aizawl-te pawh, St.Pauls awmna thlengin a lo hre ve viau a. Tin, Board member pakhat kha ka zirna college Professor hlui a ni bawk a, ka vannei ang reng. Tin, minute 15 chhungin zawhna hi 40 vel min zawt hman a, opinion lam min zawt tam lova, facts min zawh nasat avangin ka chhang zar zar mai a ni” a ti.

ZIRLAITE A FUIHNA…

“Mizo zirlaite hian nih tum kan ngah lutuk hi a tha lo. Hna zawnnaah pawh exam theih zawng zawng kan exam a. Hei hian kan inbuatsaihnaah min tihnufum a. Nih tum (career goal) hi chiang tak neih tur a ni a, chu kan nih tum chu hlenchhuak tura insawrbing tur a ni” a ti.

“Lehkha zir tam tluk hi a awm lo a. Lehkha thiam thei tak aiin taima taka zirte leh ti hram hram thinte hi an hlawhtling zawk thin,” tiin a sawi bawk.

NOTES
* Oxford University a a awm chhung hian India ram zirna nena a danglam zia a hmuchiang hle. An professor-te kha a hming hmasa in an ko mai a, “Sir” an ti ve reng lo reng reng. An friendly em em a, mi puih an hreh ngai lo. “India ramah chuan Professor-te hi biak an har tlangpui. Ka paper/project-ah pawh a tawpa report ziahah pawh ka hming min ziah hmasak tir ber a, chumi hnuah Wildlife Institute of India a kan professor-te pahnih, a tawp berah amah a inziak ve chauh a ni. India ramah chuan kan Professor-te hming ziah hmasak ber a ngai zel” a ti.

* IFS Exam hma hian a ma subject pawh ni lo, Environmental Science-ah NET a pe a, a tling leh mai bawk.

* “Master Degree-ah khan research lam kan ti nasa a, khangte kha Competitive-ah chuan a lo tangkai vak si lova. Keipawh B.Sc ka pass hlim khan exam ila chu ka tlinna a rei tawh ang a, service pawh ka nei rei thei zawk ang” a ti.

* Ram ngaw a Hauhuk awmte chuan theirah an ei nasa a, ramngaw chereu tawhna hmuna chengte chuan thing chawrno an ei nasa tih a hmuchhuak.

%d bloggers like this: