IAS TOPPER 2016 – TINA DABI

Union Public Service Commission (UPSC), Civil Service Exam hi India ramah chuan exam hautak bera chhal a ni a. Kumtin mi nuai 4 velin exam hi an hmachhawn thin a, heng zing atang hian mi 900 atanga 1200 vel an tling thin a ni. Tlin a harzia chu Mizote zinga IAS leh central service dang kan tlem sawt zia atanng hian a hriat mai awm e.

Chutiang karah chuan Delhi nula, hnam hnufual chi khat, Scheduled Caste mi (Dalit) Tina Dabi chu kum 22 lek a upa a nih laiin topper a ni thei a, UPSC exam vawikhat a hmachhawnna chauh a ni lehnghal.! Engtin nge lehkha a zir bik ang le..

Tina Dabi hi Bhopal a piang niin, class VII a zirlaiin Delhi-ah an insawn a, a nu leh pa hi Indian Engineering Service (IES) officer ve ve an ni. Convent of Jesus and Marry School, Delhi-ah school a kal chhunzawm a, kum 2011 khan India rama Institution tha berte zinga mi Delhi University hnuaia Lady Shri Ram College-ah lutin, heta tang hian B.A. Political Science-ah a graduate ta a ni. Kum 2011-a College a kal rual hian Rau’s IAS Academy-ah Coaching a kal nghal bawk.

IAS topper a nih chiaha a sawi pakhat chu, “Ka hlawhtlinna bulpui chu ka nu hi a ni. Ka nu hian Class XI kan zirlai atangin IAS atan hian min buatsaih tan tawh a, nasa taka min kaihruaiin min pui nasa em em a ni” a ti. A nu hian voluntary pension-in a hna chawlhsan a ni.

Tina hian HSLC exam-ah 90.2% lai hmu mahse a nu hian science lak a phal lova, a kawng tur a ruahmansa a zawh tir zawk a, a tifuh hle. Class XII-ah CBSE topper a ni a, College-ah pawh topper a la ni thei zel. UPSC exam meuh chu competition a liantham bawk a, tlin chu inring ve tho mahse pakhatna a nih theih em em chu a inbeisei bik chiah lova, “Ka tlin ve mai theih chu ka beisei ru ve tho na a, pakhatna nih erawh ka suangtuahna piah lam thil a ni” a ti.

A lehkha zir dan tlangpui an zawhna chu chhangin, “Regular takin nitin darkar 8-9 vel ka zir thin a, exam dawn hnaih tak takah chuan nikhatah darkar 14 vel ka zir thin” a ti a, a thawhrimna rah chu sengin IAS tling tawh zinga naupang ber a ni thei ta a ni.

  • Nikhatah darkar 8 vel lehkha a zir thin. Exam dawnah chuan darkar 14.

  • IAS exam turin Class XI a nih atangin a inbuatsaih tawh

  • College a kalrualin IAS coaching a kalnghal.

  • Hetiang dinhmun a thlen theih nan a nuin a pui nasa hle.

Mizo zirlaiten entawn tur kan ngah viau awm e. Kohhran leh khawtlanga kan inhman loh ngam a ngai a, kan zirchhuah hunah inhmanna hun tur kan la nghah dawn. Chutah chuan kan tangkaina pawh a nasa zawk ngei ang. Tin, nu leh pate pawn kan fate zirna kan ngaihven pui a ngai nasa a, High School an kal lai atangin an kawngtur kan thlanpui a ngai nasa hle. Class X an pass that vanga Science lak tir tum ngawt a fuh ber lova, an mize milpui leh an tuizawng anih loh chuan kan fate hmakhua tichhe tu kan ni thei a ni. A thiam leh hre zawkte rawn kual hnem a, tun aia nasa zawka Career Guidance kan kalpui a hun takzet a ni.

1 Comment on "IAS TOPPER 2016 – TINA DABI"

  1. CD.Lalthlamuana | November 15, 2018 at 2:05 am | Reply

    A bengvar thlak hle mai,zirlaite fuihna tha tak a nih rualin nu leh pa. Khawtlang mipui te pawhin tih tur kan nei tih a chiang hle mai.

Leave a comment

Your email address will not be published.


*


This site uses Akismet to reduce spam. Learn how your comment data is processed.