Success Story : Squadron Leader Lalrinchhana Zote, IAF Officer

Indian Air Force a Squadron Leader (Army a Major level) a kaisang hlim, Mizo tlangval chhuanawm tak LALRINCHHANA ZOTE, Bethlehem veng, Aizawl tlangval chanchin hi mi tamtak tan chuan zirlaibu ropui tak a ni ngei ang. Zirna ngaisang em emtu a nihna te, beidawng duh lo, tum sang tak nei tlat mi, thawkrim em em a nihnate, Pathian tih tlat mi a nihnate hi entawn tlak tak a  ni. 

Family Background

Lalrinchhana Zote hi kum 1985 June 25 khan Pu Rualkhuma Zote (L) leh Pi K.Lalmawii te inkarah Saron Veng, Aizawlah a lo piang a. Unau mipa pathum niin amah hi a pahnihna a ni a, a u hi V.L.Peka Zote niin a nau  Lalhriatpuia Zote a ni bawk. A pa hian kum 1996 khan Cancer natna avangin a boralsan tawh a, hei vang hian a pi leh pute kiangah, Bethlehem Vengah an khawsa zui ve leh ta a ni.

Education Background

Primary School leh Middle School hi Bethlehem Veng atangin a zo a. High School pawh Govt. Bethlehem High School atangin  I Division-ah a pass. HSSLC erawh chu MICE, Venghlui atangin I Division-ah a zo thung. Class XII (Arts) a pass hnu hian Indian Airforce-ah Airmen in a lut a, heti chung hian zirna a chawlhsan duh chuang lova, BA pawh Open-ah, CSJM University, Kanpur atangin II Div-ah a pass a, he University atang vek hian MA (Sociology) II Division-ah a pass leh bawk. Zirna ngaisang mi leh mi tumruh tak a ni tih a chiang hle.

A naupan lai atanga sipai lama tui ve hrim hrim a ni a, a thiante zawng zawng an infiam a, an inkhelh laite hian ani chuan a aia naupang deuh rualte khawmin sipai nunchan a zir pui chiam thin. A mi ngaihsan zawng pawh Adolf Hitler, Napolean leh Alexander tih te a ni daih. Tet te atanga Pathian tih mi a ni a, a theih ang chin chinah Kohhran lamah pawh a inhmang ve thin a ni.

Service lamah

Sawi tawh angin, Class XII (Arts) a zawh hnu kum 2003 khan Indian Air Force-ah Airmen in a lut a. Hetia Service a a luh hnu pawh hian harsa chung chungin zirna a chhunzawm zel a. MA a zawh veleh a tette atanga a lo chak em em thin Sipai Officer nihna kawng chu a lo inhawng ta a ni. MA a zawh hnu hian kum tin a buatsaih thin Airforce Common Admission Test (AFCAT) a exam a, he exam hi a hautakin, Airforce hnuaia Pilot, Engineer leh Ground Duty Branch a lut turten an hmachhawn vek thin. He exam hi paltlangin, SSB (Staff Selection Board) interview hmachhawn turin No.1 AFSB (Airforce Selection Board), Dehradun-ah koh a ni a. SSB hian test chi hrang hrang hmangin ni 5 chhung teh meuh an lo endik leh a. India ram hmun hrang hrang atanga mithiam rual kalkhawm karah Pathian tanpuina in he test hautak tak hi a paltlang leh a. Chumi hnuah medical test hautak zet paltlang lehin, result a lo chhuah meuh chuan All India Merit List-ah a lang ve ta hlawl mai a. Kum 2011 July 16 atang khan Air Force Academy, Hyderabad-ah training tanin, hlawhtling takin a training chhuak a, Air Force Officer tak tak a lo ni ve ta a ni.

Airforce Academy-a a training puite nen

Air Force-ah hian Branch hrang hrang a awm ve a. Arina hi Administrative Branch-ah Officer a ni. Flying Branch leh Administration Branch-te hian training an zawh hnu hian Trifurcation Board an paltlang leh a. Hei hi an kalna tur line tak tak thlanfelna hun a ni deuh ber. Flying Branch ho chu an performance azirin Helicopter, fighter leh transport-ah an thliar leh a. Chutiang bawkin Administration Branch lam pawh Pure Administration, Administration (Fighter Controller), Administration (Air Traffic Controller) ah an then hrang leh a. Arina hian a duhthlanna ngei, Fighter Controller a hmu thei hlauh a, hei vang hian Air Defence College, Lucknow-ah thla 6 chhung Fighter Controller Officer Course a bei leh nghe nghe a ni. Tunah hian Arina hi

Training kalhmang

Airforce Academy (AFA) ah hian Branch hrang hrangte training hovin, thil an zir chikim hle a. Firing, swimming, fieldcraft training (indo nunchan), Academics, Drill, Squadron Activities-te hi an training routine a ni a. A khat tawkin Guest Night, Dining-in-night, Date with Commandant, etc an nei deuh reng a.Hengte hi senior officer-te leh officer community a an culture practice-na atana tih a ni. Public speaking leh table manner ringawt pawh an zir uluk hle.

Arina hian training-na ah pawh a ti tha hle a. Physical fitness-ah phei chuan Exellent grade-ah a zo vek a, Academics-ah pawh a pumpuia ti tha ber pawl a ni. Hetiang taka a tih that avang hian a duhthusam, Fighter Controller pawh a hmuh theih phah a ni.

Physical Test-ah hian hmeichhe trainee (Lady cadets) ho tan pawh ngainatthiamna a awm chuang lova, mipa nen training thuhmun an pe vek  a ni. Chawlhni zing tin km. 8 leh a chanve an tlan a, hetah hian hmeichhe tan km.6 tih a ni tih mai loh chu duhsakna leh hriatthiamna bik engmah a awm lo.

Training-na ah hian Hindi an hmang ngai meuh lova, English deuh vek an hmang thin a.  Lo lut tharte an awm a, English an thiam that loh emaw, engemaw tul bik thilah tih chauh loh chuan Hindi an hmang ngai lo.

Airforce-ah hian Branch hrang hrang an awm a-

Ground Duty Officer Course branch hrang hrangte:  Administration, Logistics, Accounts, Education, Mateorological Branch.

Flying Branch :  Flying (Pilot), Flying (Navigation)

Engineering Branch : Aeonautical Engineering (Electronics), Aeonautical Engineering (Mechanical).

Airforce-ah Airman angin lo thawk tawh mah se, Officer-a lut tura a beihna (AFCAT) kawngah hamthatna emaw, duhsak bikna emaw a awm hauh lova. Civilian lehkhathiam tak tak, Institution tha ber bera zirchhuakte nen ang khat vekin an inel a ni.

Sawi tawh angin Arina hi Fighter Controller a  ni a. Hriatna tizauah an hna kalphung tlangpui lo tarlang ila:

* Air Defence – Radar atanga air space vil reng tur an ni a. Ram dang thlawhna in Indian air space an rawn thlawh luh a, lo chhui nghal tur leh, a tul chuan kap thla nghal tura Fighter rual, base hnai bera awmte hnena thu petu tur, kaihruaitu tur an ni.

* Air Defence chungchangah regular takin fighter pilot rualte briefing an pe thin.

* Fighter Controller Officer-te hi naupang te tein Flight Leautenant emaw, Squadron Leader rank emaw, Commanding Officer-te an ni thuai thei a. A hna a challenging em em a, medical fitness a pawimawh hle bawk.

Hetiang hi a nih avangin Air Force rau rauah pawh Fighter Controller hi hna zahawm a ngaih a ni a, an en sang hle. Tin, force chi hrang hrang- Army, Navy leh Airforce zingah hian Airforce Officer-te hi chuan ngaihsan an hlawh hle a ni.

Sipai Officer nih a hlawk

Sipai Officer Promotion hi a chak hle. An hlawh pawh hi tha tak a ni. Arina te pawh hian an Commissioned velleh hian Mizoram a Officer senior pangngai hlawh ang zat an hlawh pha nghal der a. Chu mai bakah facilities chi hrang hrang, Civil Officer-te dawn ve loh an dawng nasa hle-  Medical, ration, quarter, children education grant, loan chi hrang hrang awlsam tak taka lak theihna, etc. An hlawh pangngai bakah hian sipai nih vang hrim hrimin hlawh chuang pek an ni a, an awmna hmun hlauhawm dan azirin an hlawh a sang dawrh thei bawk.

Indian Air Force bika rank leh promotion kal dan hi lo thlir ila:

  • On Commissioning – Flying Officer
  • 2 yrs after commissioning – Flight Leautenant
  • 6 yrs after commissioning – Squadron Leader
  • 13 yrs after commissioning – Wing Commander
  • Group Captain
  • Air Commodore
  • Air Vice Marshal
  • Air Marshal
  • Air Chief Marshal
  • Marshal of the Air Force

Wing Commander chung chiah, Group Captain atang hian vacancy awm dan a zira selection a kalpui a ni tawh a ni.

Tanlak a ngai

Tunah hian Indian Airforce Officer Mizo tlangval 4/5 vel chauh an awm a, naupang te te, service la rei lo tak tak an ni hlawm. Tunhma a Mizo Officer chhuanawm tak tak- Wing Commander Lalhmingliana te, Wing Commander Lalzawmliana-te ho hnungzuitu hi kan lo awmlo rei hle mai a. Chuvangin, thalaiten hetiang hna duhawm leh ngaihsanawm hi kan bawh a ngai a. Exam hautak paltlang turin nasa taka intah hriam, inbuatsaih a ngai a ni.

Arina chanchin kan ziah tak atang hian zirlai ten zir tur kan ngah hle.   Chhungkaw khawsak harsa tak atanga lo chhuak a ni satliah lova, nu leh pa thlazar hnuaiah pawh seilian thei lo, pi leh pute bula seilian a ni. School tha ber ber atanga zirchhuak a ni lem lova, a thiam thei ber ber pawh a ni  hek lo. Science subject  a la lova, arts-ah pawh Distinction-a a pass kan hre lo. Mahse, school tha ber bera kal a, result tha ber ber nei thin mi tamtak an tlak laiin a ni chu a tling chho zel a, Airforce Officer a ni daih mai a ni!

Fuihna thu ropui leh dangdai tak a dawng bik lova. A pi leh pu, Pi Kaisangi leh Pu RK Liana te hian, “Lehkha engmah kan zirtir thiamlo che u, kan zirtir theih chhun che u chu LALPA TIH HI FINNA BUL A NI tih hi a ni” tiin an fuih thin a. Chu chuan an nun a kaihruai nasa hle niin a lang.