SUANGPUILAWN TLANGDUNG

July 12 & 13, 2018 chhung khan Hillsgate enkawltute chu Suangpuilawn leh a chhehvel khaw hrang hrang – Suangpuilawn, Lamherh, Vanbawng leh N.Khawlek a High School-te tlawhin kan zin chhuak a. Helai tlangdung hi mi tlawh tam lutuk loh a nih avangin la kal ngai lote tan information pawimawh a nih takin thlalak hmangin zin report tlemazawng kan han pe ang e (Thu lakna dik tawk lo avanga report dik chiah lo a awm a nih chuan a siamthat leh theih reng a. Ziah belh theih reng a ni bawk e. – Ed)

Suangpuilawn hi helai tlangdunga khaw lian ber a ni a, Aizawl atanga kalin Seling Zero point atanga Darlawn road lama kal tur a ni a. Helai kawng hi Tipaimukh road, national highway No. 150 a nih avangin kawng a tha hle. Two wheeler phei chuan 50-70 km/h a tlan zar zar theih a ni.

Seling zero point atanga km 62 vela hlaah East Phaileng khua a awm a, he khua atang hian national highway atang hian Suangpuilawn peng chu a awm ta a. East Phaileng atang hian km. 25 vela hla a la ni.

Seling atanga Suangpuilawn/Darlawn tlangdunga kal tur chuan Tuirini lei kan ngei ngei a ngai a. He lei hi February 13, 2018 a chim a ni a, helai tlangdung tan harsatna a thlen nasa hle. Sorkar leh tlawmngai pawlte, helai tlangdung mipui tangrualte chuan lei chhia helna kawng hi chawpchilh taka siamin, veivah nan ber hman a ni nghe nghe.

Lei chim avanga harsatna a thlen loh nan temporary-in kal kaina tur siam a ni. Helai chheh vel YMA-te an che tha hle.

He lei chim dawh that hna hi PWD hnuaia Mechanical Division-in  July 7, 2018 atangin an thawk tan a. Mi 15 velin hna thawkin, Hillsgate enkawltute kal lai hian chawlhkar khat tling lo deuh an lo thawk hman tawh a. An beisei anga hna an thawk thei a nih chuan July 18/19 chhoah hi chuan motor tlan theih a dawh kai theih an inbeisei a ni.

July 13, 2018-ah chuan a chanve aia thui dawh kai a ni tawh

Lei dawh nan hian hmanraw hlui hmun hrang hrang ami lakkhawm a ni a, company hrang hrang siam a nih bawk si avangin inmil lo deuh a awm thin a. Hei hian hna a ti sawt lo deuh niin helai lei dawh hna thawktute chuan an sawi a ni.

East Phaileng atanga Suangpuilawn panna kawng hi black top hlui tawh lam niin, a la tha hle a. Amaherawhchu, motor kawng hi Pat-ek in a bawh nasat avangin a nal hle a, fimkhur a ngai hle. Hei hi motor tlan a tam tawk loh vang ni berin a lang.

Kawnga Pat-ek tam lutuk chu helai kawng tlan ti sawt lo tu ber pakhat a ni. Picture a dah aia nasa zawk hi a tam hle…

East Phaileng leh Suangpuilawn inkarah hian Dil lian leh hmingthang tak, Rung Dil a awm a. He dil hi dil nupa niin, a lian zawk chu Dil pa, a te zawk, enkawl mumal loh zawk chu Dil nu niin an sawi thin.

Hei hi Rung Dil pa zawk niin sawi a ni a. YMA hmalaknain Sangha man phal a ni lo a, Sangha lian tha tak tak a tam hle. Suangpuilawn lam hnaih zawka awm a ni

Hei hi Rung Dil nu zawk niin sawi a ni a, enkawl a hlawh lo hle. Uluk zawka enkawl ni se, helai hmun hi Tourist spot tha tak a ni thei dawn niin a lang.

Rung Dil nu zawk kam kawngpuiah chuan Rulngan puitling, Feet 6/7 vel zet tur hi an lo ti hlum a….

Suangpuilawn khua hian In 400 v el niin an inchhal a, kum 2011 Census a a lan dan chuan mihring 1724 an cheng a ni. Helai chhehvel a sorkar hmun pawimawh tak a ni.

Suangpuiloawn khaw chhhung kawng hi a tha hle a. Branch YMA pahnihte hmalaknain an khaw chhung kawng chu rawng var hmanga lane fel taka siam vek a ni a, hei hian khawchhung landan a ti changkangin, khaw hmasawn tum tak an nih zia a tarlang chiang hle.

Suangpuilawn atanga km 5 vel leka hlaah Lamherh khua a awm a, chuta tanga km 7 vela hlaah Vanbawng khua a awm leh bawk. Vanbawng dawt chiah km 5 vela khaw awm leh hi N.Khawlek a ni a. Hetah hian helai tlangdung kawng hi a tawp a, a piah lawk chu Manipur a ni tawh a ni.

 

Vanbawng khua hi in 200 vel niin an inchhal

Vanbawng atanga lang thei ral lehlam hla tak saw Manipur ni tawh tak maw…