Sevilla lakah Real Madrid an mualpho: Barcelona nen point hmuh zat inang zel

Nizan khan La Liga match vawi rukna khelh niin, champion lai Barcelona bakah club lian Real Madrid ten an khingpui an hneh lo ve ve a, an point hmuh zat a la inang zel.

Real Madrid hian Sevilla luhchilhin 3-0 ngawtin an lo sawp a, André Silva chuan minute 17 leh 21-naah Sevilla tan goal thunin, minute 39 naah Wissam Ben Yedder chuan Sevilla goal thumna a thun zui bawk. Real lamin an siphurh sut tumin nawr ve viau thin mahse Sevilla goalkeeper Tomás Vaclík an paltlang thei lova, Vaclík hian save tha tak tak neiin, Gareth Bale nen chauha an inhmachhawn pawn goal a chhuah duh lo a ni.

Nizan kha nikum December thlaa Barcelona laka 3-0 a an tlawm hnua Real Madrid tlawm chian lehna ber a ni a, Sevilla home-a an khelh hnuhnung pahnihah goal 3 ve ve an chhuah bawk. Sevilla home-ah hian Real Madrid hian hnehna an chang khat hle a, kum 2010 hnulamah vawi 3 chakin; kum 2015 hnuah phei chuan Sevilla home-ah hian hnehna an la chang miah lo a ni.

Real Madrid an chak loh laiin champion lai leh hmahruai mek tu Barcelona pawh an chak bik lova, Leganes lakah 2-1 in an tlawm. Barcelona hian inkhel bul tan thain minute 12-na lekah Philippe Coutinho chuan mawi takin a volley goal a, hemi hnu lawk hian Lionel Messi chuan goal kham pet perin Leganes an buai hman hle.!

Messi hian chawlhlawk hmain shot vawihnih a nei leh hman a, hei erawh naupang pet ang maiin a pet zawi ve ve thung. Inkhel thawhhnihna an tan leh hnu minute 7-na lekah Barcelona tlarhnung inthlahdah nang fuhin Nabil El Zhar  chuan an siphurh sut nan a tauh goal a, minute khat chiah an inkhel leh hman tihin Gerard Piqué chetsual nang chingin Óscar Rodríguez chuan Leganes goal hnihna leh an chakna goal ni bawk a thun zui lehnghal a ni.

Barcelona leh Real Madrid hi chak lo mahse table-a hmahruaitu nih chhunzawmin point 13 ve ve an hmu a, 3-0 a Huesca hnehtu Atletico Madrid chu point 11 nen pathumnaah an awm a, Sevilla, Alaves leh Espanyol ten point 10 theuh hmuin an dawt a ni. Zaninah nizan lama khel lo thenkhat ten an khel ve leh dawn a, heng zingah hian point 10 hmu tawh Alaves pawh telin, zaninah an chak chuan Barcelona leh Real Madrid an nihrual ang.

 Nizan inkhel result:

Espanyol 1 – 0 Eibar
Real Sociedad 2 – 2 Rayo Vallecano
Atletico Madrid 3 – 0 Huesca
Athletic Bilbao 0 – 3 Villarreal
Leganes 2 – 1 Barcelona
Sevilla FC 3 – 0 Real Madrid
Valencia 1 – 1 Celta Vigo

Zanina inkhel turte:

Alavés v Getafe 11:30 PM
Real Valladolid v Levante 11:30 PM
Girona v Real Betis 01:30 AM

La Liga Table

 

Be the first to comment on "Sevilla lakah Real Madrid an mualpho: Barcelona nen point hmuh zat inang zel"

Leave a Reply

This site uses Akismet to reduce spam. Learn how your comment data is processed.

%d bloggers like this: