Old Trafford-ah 3-0 in Tottenham-in Man Utd an sawp!

Brighton an hneh lohna mangchhia nuai reh tuma rim taka kar tluana an inbuatsaihna chuan  awmzia nei lovin, English Premier Leage match thumnaah Man Utd chu an mikhual Tottenham chuan Old Trafford-ah ngei 3-0 in an hneh! Man United mang a chhe chhunzawm rih a, inkhelh zawhah Mourinho pawh media mite hmaah a angchhuak leh hlak bawk.

Lineups

Man Utd : 1 de Gea, 21 Ander Herrera, 12  Smalling, 4  Jones, 25 Valencia, 6  Pogba, 31 Matic, 17  Fred,  23  Shaw, 14  Lingard, Lukaku

Substitutes : 2 Lindelof (s 58′), 7 Sanchez (s 55′), 10 Rashford, 13 Grant, 18 Young, 27 Fellaini (s 61′), 39 McTominay

Spurs : 1 Lloris, 2 Trippier, 4 Alderweireld, 5 Vertonghen, 3 Rose , 19 Dembele, 15 Dier, 20 Alli, 23 Eriksen, 27 Lucas Moura, 10 Kane

Substitutes : 6 Sanchez, 8 Winks (s 89′), 13 Vorm, 18 Llorente, 24 Aurier (s 76′), 33 Davies (s 82′), 40 Amos

Brighton an hneh loh tum khel player 6 ngawt Mourinho chuan thlakin Man United-in tha takin bul an tan a. Hun hmasa lamah phei chuan hmuhnawm takin an khel thei a. Second half-a Harry Kane head goal leh PSG winger hlui Lucas Moura goal hnih avangin Man Utd an mualpho zui ta a ni. Tottenham boss Mauricio Pochettino pawhin Spurs a enkawl hnua Old Trafford-a a zawna vawi 4 ngawt a team-te a chak loh pui hnuah a chak pui ve thei ta bawk.

Sawi tawh angin first half-ah Man Utd an khel tha a, goal 2/3 vel thun theihna hun tha an insiam thei. Lukaku pawhin chance tha tak tak vawi 3 vel a nei a, mahse goal-ah a chantir thei chuang lo. First half-a an chance neih that an chhawr tangkai loh miau avangin second half-ah  Spurs lamin hremna an pe ta a. Minute 50-naah Spurs striker Harry Kane chuan vei lam kil atanga Kieran Trippier corner kick chu a tauh goal a, hei hi Old Trafford-a a goal hmasa ber a ni. United lam insiamthat hman hmain minute 52-naah Tottenham-in PSG winger an lak thar Lucas Moura chuan yard 12 a hla atangin United goal dinglam kilah a khung zui ve leh nghal a. United beiseina a thamral tan ta a ni.

Man Utd chuan substitution an siam nghal vat a, minute 55-naah Alexis Sanchez chuan Ander Herrera a rawn thlak a, mahse danglamna a thlen tam lo. Minute 58-ah hamstring injury avanga Phil Jones a talbuai tak avangin Victor Lindelof a lo lut a, minute 61-naah Marouane Fellaini chuan Nemanja Matic a rawn thlak zui ve bawk. Fellaini lo luh hnuah Man Utd lamin ball an vawrh tam sawt a, mahse awmzia a nei tam lo.

Minute 85-na a ni a, halfway line bulah United player thar Fred chuan ball a hloh a, chu chu Harry Kane-in chang Smalling tlanpeltu Lucas Moura a pass a, a ni hian nalh takin United goal-ah a khung leh ta a. Hun tawp thlenga goal luh belh tawh lovin Old Trafford-ah ngei Man Utd an mualpho ta a ni.

Man of the Match – Lucas Moura

Mourinho kamchhuak

“Chawlhkar tluanin rim takin kan inbuatsaih a, a khelh pawh kan khel tha. Half time-ah khan 2-0 emaw, 3-1 emaw, 3-0 emaw laia hma hruai thei khawpin kan khel tha a. Mahse, hun reilote chhungin a inthlak leh ta vek a ni. 2-0 a hma an hruai lai kha chuan kan team-te kha game-ah an la awm thei a, goal 3-na khan game a thlak ta vek a ni” a ti.

Inkhelh zawh hnuah hian  Mourinho chu  Stretford End  lama an fans la chambangte hmaah kutbengin a va ding a. A hnua chanchinbu mite hmaah a interview-naah hemi chungchang an sawichhuah laiin chanchinbumi pakhatin, “3-0 laia i chak loh pui chung pawhin..” a lo ti zauh pek a. Mourinho chuan, “Manager dang 19-te tih theih loh tiin Premier League title 3 ngawt ka la tawh reng alawm…” tiin zawhna dang zawhzui theih lohin a chhuak nghal daih!

Tottenham aiin Man Utd-in ball an chang tam zawk a, goal shot an ngah zawk a, goal zawna shot erawh an inang viau.

Tunge Mourinho thlak ang?

Hetiang result an neih leh nghal avang hian Man Utd atanga Mourinho chhuak mai tura rinna a nasa leh sawt a. Chhuak ta se, tuin nge thlak ang tih pawh an inrinsiak nasa viau mai.  Media hrang hrangin Mourinho thlak tur ni a an rinte an tarlang a, rin hlawh zual tlemazawng lo tarlang ila:

Tu hi nge Mourinho thlaktu atan i awh ber le?

Be the first to comment on "Old Trafford-ah 3-0 in Tottenham-in Man Utd an sawp!"

Leave a comment

Your email address will not be published.


*


This site uses Akismet to reduce spam. Learn how your comment data is processed.