Mourinho leh season thum : An ban leh nge nge dawn e.?

Khawvela manager tha leh ropui berte zinga mi Jose Mourinho hi club pakhatah season thum a awm tlin meuh chuan an hne viau thin niin a lang a, club hotuten chhuahtir dan an dap chung tawh thin a ni ber mai.

Khawvelin Jose Mourinho hming a hriat hnuah club lian tak tak FC Porto, Chelsea, Inter Milan, Real Madrid leh Manchester United a enkawl tawh a, Chelsea hi vawihnih enkawl tawhin, buaina nei lova a chhuahsan awmchhun chu a larchhuahna FC Porto chiah ni thung. A hmasain hlawhtlinna a chan chhoh dan hi en ila, football an khelh chhan ber trophy a chawi hnem zia a hriat theih ang.

FC Porto:

  • 2001-02: Kum 39 leka upa ni chungin Porto a enkawl tan a, manager-ah chuan a naupang ber pawl a ni. A enkawl tira pangana kha season tawpah pathumna a nih pui.
  • 2002-03: Primeira Liga , Uefa Cup leh Portuguese Cup-ah a champion pui a, football khawvelin an hrechiang tan.
  • 2003-04: Primeira Liga leh Portuguese Super Cup-ah a champion nawn bakah Champions League-ah champion-in a lar chak hle a, season tawp rualin english club lian Chelsea chuan an manager atan an la nghal a.

Chelsea:

  • 2004-05: Premier League leh League Cup-ah a champion pui nghal a, Champions League-ah semi-final a thlenpui bawk. ‘Special One’ tih hming a invuah.
  • 2005-06: Premier League-ah champion nawnin, Community Shield an chawi pui.
  • 2006-07: Premier League-ah pahnihna niin, FA Cup leh League Cup champion anih pui a,  Champions League semi-final a thlenpui leh bawk.
  • 2007-08: 2007 September thlaah inbiakremna neiin Chelsea a chhuahsan

Inter Milan:

  • 2008-09: Serie A leh Supercoppa Italiana a chawipui nghal.
  • 2009-10: Serie A , Champions League, leh Coppa Italia -ah champion in Inter Milan chu treble champion a nih pui a, khawvelin Special One an ngaisang hle. Season tawp rualin Inter a chhuahsan a, spanish club lian Real Madrid a zawm.

Real Madrid:

  • 2010-11: Copa del Rey -ah a champion nghal a, La Liga-ah pahnihna niin, Champions League semi-final a thlenpui.
  • 2011-12: Barcelona vanglai dang chatin La Liga nomawi a chawipui a, Champions League-ah semi-final a thlenpui leh.
  • 2012-13: Supercopa de Espana a lakpui leh a, Champions League-ah a vawithum nan semi-final a thlenpui leh a, Copa del Rey-ah runners-up an ni bawk. Season tawp hmain inremsiamna neiin Real a chhuahsan a, Chelsea lamah a kir leh a.

Chelsea:

  • 2013-14: Premier League-ah pathumna a nih pui a, Champions League semi-final a thlenpui bawk.
  • 2014-15: Premier League leh League Cup-ah champion puiin, hunrei zawk Chelsea enkawl tur beisei a ni.
  • 2015-16: Buaina neuh neuh a neih chhoh avangin 2015 December thla-ah Chelsea a chhuahsan.

Manchester United:

  • 2016-17: Europa League leh League Cup-ah a champion pui nghal a, Premier League-ah parukna a ni thung.
  • 2017-18: Premier League leh FA Cup-ah runners-up an ni ve ve.
  • 2018-19: Premier League game sarih khel tawhin point 10 chauh an la hmu a, kum 29 chhunga Manchester United-in season bul an tan chhiat ber an tawng mek. Star player Paul Pogba nen an intithiam lova club chhungah nghawng tha lo tak a nei mek. An club legend Rio Ferdinand chuan club hotuten manager chungchangah thutlukna lian tak an siam thuai a ngai niin a sawi. Mourinho an ban mai a rinawm hle.!

Tinge an ban thin…?

A kalna a pianga trophy la thei em em manager hi tinge an ban leh thin? Chhan hrang hrang a awm ngei dawn a, a chhan tak erawh hriat mai a harsat avangin pawn lam atang chuan rinthu bak sawi tur a vang hle. Amaherawhchu, an buaina hrang hrang lo irhchhuak te leh, tawngkam thlahdah zeuh ching a nih avangin a tum aia hmain club a chhuahsan fo a tih theih ang. Club a chhuahsan dan leh buaina neuh neuh a neih te lo en ila:

  • FC Porto: Hetah hian buaina em em a nei lova, Champions League thlenga a champion pui vek hnuah chona thar hmachhawn turin club lian zawk a pan a, Porto lam hian ui tak chungin an thlah a ni.
  • Chelsea : Porto atanga Chelsea a zawm hnu season hnih chhung ropui takin hun a hmang a, season thumna atangin buaina neuh neuh sawi tur a awm tan a. Club neitupa Roman Abramovich nen player lei chungchangah intithiam lovin, seaoson 4-naah thlahnih chiah a enkawl hman tihin an ban ta nge nge a ni.
  • Inter Milan : Season hnih enkawlin champion theihna zawng zawngah a champion pui vek a, season hnihnaah hian treble champion lai a nihpui. Inter Milan lamin chhawr chhunzawm zel an tum a, mahse ama thuin Real Madrid enkawl turin ruahmanna a lo siam vek a, Inter Milan an thinrim hle. Inter Milan leh Real Madrid president ve ve ten inremna zawnga inbiakna an neih zak zak hnuah, Real hian zangnadawmna sum thahnem tak Inter hnenah an pe a, lungawi lo takin Mourinho an chhuahtir hram.

  • Real Madrid : Barcelona (tiki taka) vanglai dangchat turin beiseina nen Real a enkawl a, season hnihnaah a hlawhtling nghal bawk. Mahse senior player thenkhat nen buaina an nei nasa a, heng zingah hian Iker Casillas leh Pepe te chu Mourinho mil lo zual tu an ni. Season thum an enkawl zo hman tep tihin eng nomawi mah a chawipui dawn lo tih a chiang a, game hnih khelh tur la awm tihin an chhuahtir ta nge nge a ni.
  • Chelsea : A vawihnih nan Chelsea a enkawl  leh a, season hnihnaah Premier league leh league cup a chawipui leh mai a, a reilo berah kum 10 tal Chelsea enkawl tur an duh thu an sawi hman, Mahse, season thumnaah buaina bawk a chawkchhuak leh a, a tawng thlahdah vangin club doctor te nen buaina an nei a, club doctor te a ban tir hnuah amah pawh club hotuten an ban leh ta nge nge a ni.
  • Manchester United : Season hmasa berah Europa League leh League cup a chawipui nghal a, fans te pawh an phurin an zuang tawr tawr a ni ber e. Sir Alex thlak tu tur an hmu-ah ngaiin Red Devils hote chu khiang rah tla ang maiin an khi hui hlawm a, mahse an lawmna erawh season thumna an hman meuh chuan a tawp chiang hle. Player lei chungchangah club hotute nen an thu inhmu lo chungin season bul an tan a, game 7 chiah an khel hman tihin Mourinho ban duhtu chu fans zahve aia tam daih an awm nghal.! An player man to ber Paul Pogba nen buaina nasa tak an nei mek tih chu pawnlam atangin an hriat theih a, heihian an game-ah pawh nghawng thui tak neiin, Mourinho dinhmun a derthawng sawt hle a ni.

Season thum bak a daih thei meuh lo hi engvang tak ni ang maw.? A khelh tir dan hi a hneawm viau nge ni anga, a chapo(?) vang zawk ni ang.?

Be the first to comment on "Mourinho leh season thum : An ban leh nge nge dawn e.?"

Leave a comment

Your email address will not be published.


*


This site uses Akismet to reduce spam. Learn how your comment data is processed.