MotoGP record thar siamtu Marc Marquez

Spanish rider Marc Marquez chuan nimin (Sunday) khan  Motul Grand Prix of Japan-ah hnehna changin, kum 2018 MotoGP champion a ni a, kum thum a zawna a champion na a ni bawk. Marquez hian kum 2013 atangin Bike intlansiknaa inelna sang ber MotoGP a luhchilh a, kum 2015 tih lohah chuan a la champion vek a ni.

Nimina a champion hian kum 25 leh ni 246 a upa a ni a, MotoGP-a vawi nga champion thei naupang ber niin, kum 26 leh ni 221 a upa ni chunga Valentino Rossi record lo siam tawh chu a khum ta a ni.

Motorcycle intlansiak lama thuneitu sang  Fédération Internationale de Motocyclisme (FIM) hian kum 1949 atangin khawvel huap motorcyle intlansiak hi an buatsaih tan a, category hrang hrangah thenin kum 1996 thleng khan 500cc, 350cc, 250cc, 125cc, 50cc leh Sidecar ah te intlansiakna an buatsaih thin a. Kum 1997 atangin category pathum-500cc, 250cc leh 125cc ah sawrzim a ni a, he kalphung hi tun thlengin an la hmang ta zel a ni. Kum 2002-ah 500cc chu MotoGP tia thlak a ni a, kum 2012 atang khan MotoGP hi 1000cc ah tihsan a ni a, 250cc leh 125cc pawh Moto2 leh Moto3 tiin an thlak ve leh bawk.

Heng category hrang hranga an champion zat hi World Champion an nih zata chhinchhiah a ni a, Marquez pawh hi MotoGP a luh hmain 125cc leh Moto2-ah vawikhat ve ve a champion hman a, World Champion vawi sarih ni tawhin; vawi sarih champion thei naupang ber record kum 1966 a Mike Hailwood-a siam, kum 26 leh ni 140 a upa chu Marquez hian a khum nghal bawk a ni.

Vawi sarih emaw a aia tam World Champion ni thei hi Marquez tih loh chu mi pasarih chiah an la awm a, chungte chu- John Surtees (7), Phil Read (7), Carlo Ubbiali (9), Mike Hailwood (9), Valentino Rossi (9), Angel Nieto (13) leh Giacomo Agostini (15) te niin, kum 1984 hnulama champion thei Rossi leh Marquez chiah an awm thung.

Tunge Marc Marquez.?

Kum 1993, February 17 khan Spain rama Catalonia huamchhung khawpui pakhat Cervera-ah a lo piang a, a hming tak hi Marc Márquez Alentà a ni. Kum 2008 khan Bike intlansiak luhchilh tanin 125cc-ah Repsol KTM a zawm a, hemi kum hian 13-na niin, kum 2009-ah pawh 8-na a ni pha chauh bawk. Kum 2010-ah team thar Red Bull Ajo Motorsport a zawm a, hetah hian vawikhat nan World Champion a ni a, kum 2011-ah Moto2-ah a insawn chho ta a ni.

Moto2-ah hian Team CatalunyaCaixa Repsol-a a zawm a, season khatnaah pahnihna niin, kum 2012-ah Moto2-ah a champion leh a, hemi kum vek July thla hian MotoGP team Repsol Honda chuan an rider chawl tur Casey Stoner thlak tu atan contract an ziahpui nghal a ni. Kum 2013 atangin MotoGP-ah kan hmu tan a, a season khatna atangin World Champion a ni nghal a, 2014, 2016, 2017 leh 2018-ah te a champion vek bawk.

MotoGP a luhchilh atang hian Repsol Honda team tan intlansiak ala hmachhawn char char a, Honda RC213V  khalhin, Bike number-a 93 a hman chhan hi a pian kum 1993 anih vang a ni. Kum 25 chauh ni siin MotoGP-ah sulhnu ropui tak tak a hnutchhiah tawh a, hetiang renga a kal chuan mi tam takin Bike khalh thiam bera an ngaih Valentino Rossi a khum thei vatin a rinawm hle.

2018 MotoGP Season- Riders’ standings

March 18 khan Qatar-ah intlansiak hmasa ber an nei a, vawi 19 intlansiak turah vawi 16 intlansiakna nei tawhin Australia (Oct 28), Malaysia (Nov 4) leh Spain (Nov 18)-ah te intlansiak an nei leh ang. Intlansiak vawi thum la nei dawn mahse Marc Marquez hian point 102 laia hma a hruai fal tawh avangin lehpelh theih a ni tawh lova, hahdam takin season tawp a hman theih phah dawn a ni.

Intlansiaka point an hmuh dan:

Pos. Rider-Points
1. Marc Marquez – 296
2. Andrea Dovizioso – 194
3. Valentino Rossi – 185
4. Maverick Viñales – 155
5. Cal Crutchlow – 148
6. Johann Zarco – 133
7. Danilo Petrucci – 133
8. Jorge Lorenzo – 130
9. Alex Rins – 118
10. Andrea Iannone – 113
11. Dani Pedrosa – 95
12. Alvaro Bautista – 83
13. Jack Miller – 74
14. Franco Morbidelli- 38
15. Tito Rabat – 35
16. Pol Espargaro – 35
17. Hafizh Syahrin – 34
18. Aleix Espargaro – 32
19. Bradley Smith – 23
20. Takaaki Nakagami- 19
21. Scott Redding – 12
22. Mika Kallio – 6
23. Karel Abraham – 5
24. Katsuyuki Nakasuga- 2
25. Michele Pirro – 1
26. Thomas Luthi – 0
27. Xavier Simeon – 0
28. Stefan Bradl – 0
29. Jordi Torres – 0
30. Sylvain Guintoli – 0
31. Christophe Ponsson- 0

Be the first to comment on "MotoGP record thar siamtu Marc Marquez"

Leave a comment

Your email address will not be published.


*


This site uses Akismet to reduce spam. Learn how your comment data is processed.