SHORT NEWS TODAY : 9th July, 2018

NATIONAL

  • Department of Telecommunications (DOT) chuan India rama mobile services pahnih – Vodafone India leh Idea Cellular inzawm tumna chu a remti ta a. India rama mobile service operator lian ber an ni chho thei dawn a ni. An company pahnih hlutzawng belhkhawm hi  USD 23 billion (or over Rs 1.5 trillion) vel zet a ni dawn a, subscriber Mtd. 430 vel an nei thei tura ngaih a ni.
  • Samsung chuan Delhi bul Noida-ah khawvela cellphone siamna factory lian ber tur a din dawn a, vawiin khan Prime Minister Narendra Modi leh South Korean President Moon Jae-in ten an hawng a ni. He hmun atang hian kum khatah mobile phone mtd. 120 siamchhuah theih beisei a ni.
  • Nirbhaya pawngsual rawn case a thiam loh chantir, May 5 a thi tura an chungthu lo rel tawh mi 4-te zinga pathum- Mukesh (29), Pawan Gupta (22) and Vinay Sharma (23)-TEN Court thuremna en nawn leh tura an dilna chu vawiin khan Supreme Court chuan a hnawl a. Heng mite hi khaihlum an ni ngei dawn niin a lang. An zinga palina Akhay Kumar Singh (31) erawh chuan ngenna a thlen ve lo.
  • Central sorkar chuan India rama University 6-te chu Institution tha bik ‘‘institutions of eminence’-ah a puang thar a. Chungte chu private universities – BITS (Pilani), Manipal Academy of Higher Education leh Jio Institute bakah government institutions – IISc Bengaluru, IIT Mumbai leh IIT Delhi-te an ni. Heng University-te hi world class university ni tura a bik taka project siama kalpui an ni dawn a. Govt. Institute-te hian kum 5 chhungin cheng vbch. 1,000 theuh an dawng ang. Heng University 6-te hian mahni a thuneihna (autonomy) an nei theuh dawn a ni. HRD Ministry in Institution 20 vel thlangchhuak tura a hisap laia a thlangtu Committee-in 6 chauh an thlangchhuak leh, NIRF Ranking 2018 ah pawh la lang pha lo, University din chhoh tur mek chauh, Jio Institute thlan tel a ni hian titi a ti tam hle.
  • Ranchi hmun a Missionaries of Charity-te enkawl Home hrang hrangte chu Police ten dapin, nau nei lote hnena naute hralh thinah an puh a ni. Heng home hrang hrangahte hian raipuar dah luh thin an ni. Naute latu nupa pakhatin an naute lak tur enkawl nana cheng nuai 1.2 an pek vek tawh hnuah naute laksak leh an ni ti a police a complain an thehluh avanga he thubuai hi lo chhuak a ni.
  • UP-a gangstar lar tak pakhat Munna Bajrangi chu tukin zing dar 6:30 vel khan a tanna Baghpat prison-ah kah hlum a ni. BJP hruaitu that a puh avanga man niin, vawiin hi a court hun tura tih a ni nghe nghe.

INTERNATIONAL

  • Thailand ram, Burma ramri bul lawk Tham Luang puk chhunga tang naupang 4-te chu vawiin khan lakchhuah an ni leh ta. Pathianni khan mi 4 lakchhuah an lo ni tawh bawk. Heti hian puk chhunga tang mi 13 zing atangin mi 8 lakchhuah an ni ta a, 5 an la awm a  ni. An strict bawk a, naupang chhanchhuak lai thlalak hmuh tur a awm lo hle. Tute nge an lakchhuah tawh tih pawh hriat theih a ni lo.
  • US leh China-ten trade war nei a tax an inlaksak sauh sauh laiin India leh China chuan India siamchhuah cancer damdawi hrang hrang a chhiah lak tihniam turin an lo inrem ve mek. Khawthlang lam damdawi aia India cancer damdawite hi a tlawm zawk avangin China-ah ngaihhlut a hlawh hle.
  • India ram enthlak nana hman theih tur Pakistan satellite pahnih PRSS-1 leh PakTES-1A chu vawiin khan China-in an ram hmar thlang lama Jiuquan Satellite Launch Center atangin a kahchhuah sak. Ti hian Pakistan hian satellite 10 dawnlai a kapchhuak ve ta a, India erawh chuan tangkai taka hman mek satellite 43 a nei mek thung.
  • British foreign secretary Boris Johnson chu vawiin khan an PM Theresa May-in European Union chhuahsanna tur Brexit plan a siam duh loh vangin a bang.  Hemi hma lawk hian Brexit Minister Davis David a lo bang tawh bawk. Britain sorkar an talbuai hle a, parliament lamah inhnialna nasa tak a thleng mek.
  • Iranian teenager hmeichhe pakhat chu a bed room-a a lam lai video Instagram-a a post avangin thuneituten an man daih!