Serchhip-ah Mizoram Kailawn 2018 inhrilhhriatna hun hmang

Vawiin (May 1, 2018) hian Serchhip DC Conference Hall ah Mizoram Flagship Programme, New Economic Development Policy (NEDP) hnuaia hmalakna pakhat, Mizoram Kailawn, 2018 chungchang inhrilhhriatna hun hman a ni.

He hun hi Chuauhnuna, Addl. DC chuan kaihruaiin, Entreprenuership Development Scheme (EDS) hnuaia Master Trainer Dr. Lalbiakzuali’n NEDP hnuaia Entreprenuership Development Scheme chungchang leh kan ramin entrepreneur tha a mamawh dan te, chutiang mi ni tura thil pawimawh hrang hrangte a sawifiah a. Chumi hnuah Lalrinngheti Sangsiama, Mizoram Consultancy Group chuan he hmalakna kal zela Mizoram Kailawn (Business Plan Contest) 2018 chungchang chipchiar taka sawiin, a tel duhte tana tel ve dan pawh a lem nena entirin a sawifiah nghal a ni. Tin, he hunah hian Lalsiamthara, Serchhip, Mizoram Kailawn 2017 a pakhatna la tu pawhin EDS hnuaia training hrang hrang an neih dan leh a hlawkpui dan te sawina hun a nei bawk.

Mizoram mi tupawh, kum 18 chunglam sumdawnna emaw thil siamchhuahna thar remchang hria, a taka chang ngei tur eizawnna/sumdawnna suangtuah chhuak thiamte tan kuminah hian intihsiakna (Business Plan Contest) Mizoram Kailawn buatsaih leh mek a ni a. He intihsiakna hi May ni 10 thleng thehluh theih niin internet www.mizoramkailawn.org kaltlanga thehluh tur a ni a, May ni 23 ah result puan a ni ang. A thehlut zinga a ti tha zualte thlan chhuah an ni ang a, chung mite chu June 11-15 chhungin uluk taka training pek zui an ni dawn a ni. Chumi hnuah an tih that dan a zirin Entreprenuership Summit, 2018-ah lawmman pawh pek an ni leh ang. Tun tum Mizoram Kailawn atan hian lawmman Rs. 10 lakh dah a ni.

He programme-ah hian zirlai naupangte, Self Help Group hrang hrang member te, chanchinbumite, sawrkar hnathawk leh midang engemawzat an tel a a ni.

Mizoram Kailawn, 2018 chungchang inhrilhhriatna hun hi naktukah Mamit-ah neih leh a ni ang.