PHAI LAM ADMISSION : 10 POINTS TO REMEMBER

Tunlai hian India ram hmun hrang hrang atangin Institution Advertisement kan hmu leh tan a, phai lama admission ti turte tan admission tih hun pawimawh tak a ni. Hetiang hunah hian Institution tha tawk lo tamtak an inlar ve thin avangin fimkhur a ngai em em a, fimkhur tawk loh avanga talbuai zui ta hi an awm kumtin thin a ni. Chuvangin, phai lama admission ti turten heng a hnuaia mite hi hriat reng ni se:

  • Mizoram a rawn in advertise emaw, education fair vela lo kal satliah ni lo, zirlaite contact number la a admission ti tura a um a um chi Institution-ah reng reng Admission tih loh a him! Institution thain admission ti turin zirlai an zawng/um ngai lo, zirlaiten an pan khawm zawk thin a ni.
  • Technical Course lam zir turten kan zirna tur Institute chu All India Council for Technical Education (AICTE) approved a ni em tih hriatchian tum hmasak ngei ngei tur a ni.
  • Admission kan tihna tur Institution chu University Grant Commission (UGC)-in fake University List a tihchhuah thinte zinga mi nena inzawm, chutiang fake university-a in affiliate chu an ni em tih hriatchian hmasak a tha. Kan pan tur College/Institution chu University rintlak tak hnuaia awm a ni ngei ngei tur a ni (https://www.ugc.ac.in/page/Fake-Universities.aspx)
  • Phai lama Nursing (B.Sc Nursing/GNM) admission ti turten Indian Nursing Council (INC) emaw, an awmna State Nursing Council-ten kha Nursing institute kha an approve/recognized em tih hriatchian hmasak ngei ngei tur a ni. Tin, practical a tam tawk theih nan Hospital attached ngei ni thei se duhthusam a ni bawk.
  • Phai lama admission i tihna tur Institute-ah chuan medium of instruction atan eng nge an hman? English an hmang em? Hindi or others hmang chauha classroom teaching kalpui thin an ni em tih hriatchian hmasak a tha. Hetianga tawng thiam loh avang hian zirlai tamtak admission tih hnuah beidawngin an lo haw leh thin.
  • Technical Course zir tur reng rengin sorkar quota hmang a zirin course fee a tlawm bik thin a ni tih hriat a tha. Private Institution-ah phei chuan entrance paltlanga lutte leh management quota a lutte course fee a inthlau thei hle.
  • Admission kan tihna tur Institution chuan hostel an nei tha em tih leh, lo nei lo ta se, hostel dang hnaivaiah a awm em tihte, inluah tur emaw, PG awmna tur emaw a awm hnai/tha em tih hriatchian hmasak a tha.
  • An fee structure hriatchian hmasak ngei ngei tur a ni a, fee an tarlan pangngai bak kum laklawh a zirlaite fee sang tak tak charge belh ching an ni em tih hriatchian hmasak a tha hle.
  • Lo awm hmasa tawh Mizo zirlai/hnathawk emaw, Mizo Association-te emaw biak rawn hmasak hi a him hle.
  • Khawi hmunah pawh nuamsa taka lehkha zir tum kher loh a tha. Mahni in ang maia nuamsa a lehkha zir tum tan hmun dangah hlawhtlin a har thin. Tin, LEHKHA ZIR tura awm kan ni tih hriat nawn fo a tha hle bawk.