Nikki Haley : US Ambassador to UN

Tunlai khawvel hmeichhiate zinga thawm na ber pakhat, chanchinthar luah zing berte zinga mi chu US Ambassador to UN Nikki Haley hi a ni awm e. North Korea chungchanga a tawngkam hman hriam tak takte, Israel chhan nana insumkarna awm hauh lo a a hmalaknate chuan nasa takin a vawrhlar a. A chanchin hian ngaihven a hlawh hle a ni. Tunge a nih chiah tih hi i lo zirchiang dawn teh ang.

Tunge a nih chiah?

Nikki Haley hi kum 1972 January 20 khan Bamberg, South Carolina-a India ram Punjab atanga Sikh chhungkaw pemlutte karah Nimrata Randhawa tih hming puin a lo piang a. Kum naupangtein politics a luh chilh a, South Carolina state rorel khawl, House of Representative-ah kum engemawzat a tel hnuah he state Governor atan hian thlan tlin zui a ni. South Carolina-a hmeichhe Governor ni thei hmasa ber a nih mai bakah Indian American-te zinga US Governor ni thei pahnihna a ni (a hma hian Bobby Jindal chu Louisiana Governor a lo ni tawh). South Carolina Governor a nih mek lai hianb kum 2016 khan US President elect Donald Trump chuan United Nations-a US Ambassador ni turin a thlang a, he chanvo hi US-ah chuan Cabinet Level a dah a ni. January 24, 2017 khan US Senate chuan 96-4 in a lo pawm ta a, Governor a nihna bansanin UN lamah a kal ta a ni.

Early Life

Tualchhung school-ah zirna tan chho in, Clemson University atangin B.Sc (Accounting) a zirchhuak a. A nu eizawnna, puan lama sumdawnna, Exotica International chu luchilh ve nghalin a hnu lawkah company hlawhtling tak, multi million dollar company an tih mai huangah an company chu an hlangkai ta nge nge a ni.

Kum 1998-ah Orangeburg County Chamber of Commerce Board of Directors atan a tling a, 2003-ah Lexington Chamber of Commerce ah tling chho lehin, kum 2004-ah phei chuan National Association of Women Business Oweners President atan thlan a ni zui ta a  ni. Hetia national level organisation a President a nih lai hian  kum 32 chauh a la ni!!

Haley hi Kristian-ah inlet tawh mah se, a nu leh pate sakhua zahna a la lantir reng a, Sikh sakhaw thiltihna hrang hrangah pawh a la tel fo thin.

Haley hian kum 1996 khan kum 24 mi a nihin Michael Haley nen an innei a, a pasal Michael hi South Carolina Army National Guard-a Officer a  ni a, a nupui Governor a ni chungin ral bei turin Afghanistan-ah kum 2013 khan tirh a lo ni ve zak zak tawh a ni. A pasal nen hian fanu Rena leh fapa Nalin an nei a ni.

A hmingchhiatna

Politics a luh chhoh a, beihna a han tawn tak tak chuan pasal nei chunga midang nena inkawpa puhna a tawk nasa hle a. Pakhat zawk chu Will Forks niin, South Carolina Governor Press Secretary a ni a. Pakhat chu Larry Marchant, politics-a a khingpui Andre Bauer-a political consultant a ni. Heng mi pahnihte hian sex pawh an hmang ngei niin an sawi ve ve niin report thenkhatah chuan tarlan a ni. Haley erawh chuan a pha nasa hle thung.

A Politics kalkawng

US President thlan dawn, kum 2012 chho vel khan khatih laia President Barack Obama khingtu Mitt Romney khan a Vice President candidate turin a thlang hman tep ni a sawi a ni a. Amaherawhchu, a ni chuan South Carolina mipuiten a ko a mawhphurhna an dah chu a ngaih pawimawh thu sawiin Vice President candidate nihna chu a hnar tur thu chiang takin a sawi a. Hetiang a nih vangte pawh hi a ni mahna, Romney khan Wisconsin Congressman Paul Ryan a thlang ta a, an tling ta lo hlauh thung.

South Carolina Governor a nih lai hian an state chhunga chi leh chi intihbuaina tihchhuah tum mi pakhatin Biak Ina mihang a pawng kah chiam chungchangah a che tha hle a. He thu kal zelah hian kum 1960 chho vel atanga an state rorelna in a Confederate flag an tar thin chu dan ang takin a hlip thla thei bawk.

US Politics khawvelah a tlangtla tawk tih a chianna chu kum 2016-a US President Barack Obama-an a term tawp dawna State of the Union address hnuhnung ber a neih tumin an party, Republican aiawh a thusawi tura thlanchhuah a ni a. Hemi tuma a thusawi thenkhatte phei chu sawi zui laih laih tham a ni nghe nghe. Hemi tuma a chet that em avang hian a hnu a President ni zui ta, Donald Trump-a running mate (Vice President) atana thlan a nih rin a ni chho hial a. Amaherawhchu, Indiana Governor Mike Pence thlan a ni ta zawk a nih kha.

U.S. Ambassador to the United Nations

A hma lama tarlan tawh angina November 22, 2016 khan President elect Donald Trump chuan United States Ambassador to the United Nations atan a thlangchhuak a, hetih lai hian kum 44 chauha upa a la ni. Trump administration a hmeichhia, nihna pawimawh chelh tura puan hmasak ber a ni nghe nghe. Trump hian Haley hi Secretary of Defence chanvo a offer a, mahse Haley hian a hnar ni a sawi a ni bawk. President Donald Trump chuan, “Governor Haley hian a record atangin mipuite, background inang lo leh party hrang hrang a mite thleng a pawtkhawm a, ram tana hmasawnna kawng zawhpui thei tur khawpin theihna a nei a ni tih a chiang a ni” tiin, “Hruaitu ropui tak, khawvel huapa kan aiawh theitu tur a ni ngei ang” a ti a ni.

Haley hi tunhma deuh atang tawha Israel tan rum rut mi a lo nih tawh avang leh, amah ang bawka Israel tan tlat mi President Trump a lo awm bawk avangin UN-ah pawh Israel tan a ti na thei hle a. Tawngkam hriam tak tak hmangin Israel chhanin, khawvel ram dangte chu Israel chungchanga an rilru puthmang chungchangah a khak fo thin. Crimean conflict avangin Russia na takin a tawng a, tawngkam a thiamin a hmang hriam thin bawk a, reilote chhungin a lar hman hle. Iran nuclear crisis chungchangah te pawh Russia hming lam dawt si lovin, “Ram thenkhat chuan International Atomic Energy Agency ten Iran an endik tur chu an dang tlat a. An endik theih si loh chuan Iran nuclear deal hi intiamna awmze nei lo (empty promise) ang chauh a ni” a ti a ni.

U.S. Permanent Representative to the UN, Ambassador Nikki Haley meets Israeli Prime Minister Benjamin Netanyahu at his office in Jerusalem, June 7, 2017.

China-in North Korea a tan tlat chungchangah na takin UN-ah China a dem thin a. Tel Aviv atanga Jerusalem a US Embassy sawn chungchangah pawh a tawng na thei hle. Hemi chungchangah phei hi chuan UN pawh na takin a bei a, Hun rei tak chhung Israel tiduhdah zawng hlira hma la” ah a puh nghe nghe. Tin, US in Jerusalem a Embassy a sawn chungchanga UN-in vote a lak dawn pawhin khawvel ram dangte chu na takin a vau a, “Vote in thlak hmain  President Trump leh US sorkar hian he vote tlak dan hi ngun taka thlirin mimal thil ang maiin an la serious a ni tih ka hrilh duh che u a. Vote thlak dan report engkim pek vek an ni ang” a ti hial a ni. He a tawngkam phei hi chuan chai a hlawh hle.

May 2015 khan mipui tana thawh that em avangin University of South Carolina chuan honorary doctorate an pe a, May 2018 khan a zirchhuahna Clemson University atangin honorary doctorate in Humanities a dawng bawk.

Haley hian ama chanchin ziahna (autobiography), Can’t Is Not an Option: My American Story tih chu kum 2012 khan a lo tichhuak tawh bawk a ni.

He Indian-American nu thawm na tak hi hun lo la awm turah US Presidential Candidate a ni chho ta a nih pawhin thil mak a ni hauh lo ang le!