NEET 2018 Result a chhuak

CBSE chuan India ram pum huapa MBBS leh BDS zir tumte tana buatsaih NEET (National Eligibility cum Entrance Test), 2018 result chu June 4, 2018 chawhnu lam dar 2:00 khan a tichhuak ta a. Exam hmachhawn tura in register mi 13,26,725 awmin, appeared 12,69,922  an awm a. Heng zingah hian Bihar tleirawl Kalpana Kumari chu a pumpuiah pakhatna a  ni. Pakhatna Kalpana Kumari hian full mark 720-ah mark 691 (99.999921 percentile) a hmu a ni.

NEET Exam hi May 6, 2018 khan India ram khawpui hrang hrang 136-a exam centre 2255-ah neih a ni a, result chhuah hun tura hisap June 5, 2018 hma ni chiahin result hi tihchhuah a ni. Result tihchhuah rual hian CBSE chuan cutoff mark a tichhuak nghal a, General tan cutoff mark hi 119 a nih lain reserved categories (SC/ST, OBC) tan 96 a ni thung. Candidate mi nuai 13 chuang zingah hian cutoff mark hmu pha, admission ti thei tura tling hi mi 7,14,562 an ni a, heng zinga nuai 6.3 chu general category a mi an ni nghe nghe.

NEET result hi India ram puma MBBS leh BDS zir theihna Institution zawng zawng, Parliament-in dan siam a a bik taka a din AIIMS leh JIPMER tih loh chuan admission tih nan an hmang mek a. Heng Institution pahnihah tih loh chuan NEET cutoff mark hmu pha lo tan India ram chhungah MBBS leh BDS a zir theih tawh loh a ni.

Topper, KALPANA KUMARI

A pumpuia pakhatna, topper Kalpana Kumari hian Physics-ah 171/180, Chemistry-ah 160/180 leh Biology-ah full mark 360/360 a hmu a. Top 10 rank holders zingah hian hmeichhia pahnih leh mipa 8 an awm a ni. NEET 2018-ah hian candidate hmeichhia an tam zawk hle a, pass percentage erawh a inang tawk viau thung.

Kum 17-a upa Topper Kalpana Kumari hian YKJM College, Sheohar atangin Bihar School Examination Board (BSEB) a Class XII exam a hmachhawn a. AIIMS Entrance a hmachhawn tho bawk. “Ka thawk rimin theihtawp ka chhuah ve a. Class XII exam dawn leh NEET exam dawn hi chuan ni khatah darkar 13 aia tamte lehkha ka zir thin. Topper nih hi ka inring miah lo” a ti a, “AIIMS MBBS entrance ka hmachhawn tho bawk a, result ka nghak mek a, ka tling lo a nih chuan ka NEET ranking hmang hian Maulana Azad Medical College-ah luh ka tum ang” a ti bawk. A pa hi DIET Lecturer a ni a, a nu pawh sorkar school a zirtirtu a ni bawk. NEET 2018-ah hian Bihar atangin zirlai 37899 an inziak tling a ni.

Toppers
(Name, Marks, Percentile Score, State):

  1.  Kalpana Kumari, 691 – 99.999921, Bihar
  2. Rohan Purohit, 690 – 99.999764, Telangana
  3. Himanshu Sharma, 690 – 99.999764, Delhi
  4. Aarosh Dhamija, 686 – 99.999606, Delhi
  5. Prince Choudhary, 686 – 99.999606, Rajasthan

MBBS leh BDS seat a pung zel

Kum 2017-ah khan India ram pumah government leh private medical college 470-ah MBBS seat 65,170 a awm a, heng zinga seat 30,000 chu government medical college seat niin, private college, Deemed leh Central University-ah seat 35000 chuang hret a awm bawk. Tin, India ram puma Dental College 308-ah BDS seat 25,730 a awm bawk. NEET hmang ve lo AIIMS leh JIPMER-ah hian MBBS seat 907 a awm bawk a ni.

Hetih lai hian March 23, 2018-a Ministry of Health and Family Welfare (MoHFW)-in Parliament (Lok Sabha) zawhna an chhan danin kum 2018-ah hian sorkar Institution-ah MBBS seat 30455 leh BDS seat 2930 a awm mek a. Private Institution-ah MBBS seat 36,165 leh BDS seat 24130 a awm mek bawk. Heti hian kum 2018-ah India ramah MBBS seat 66,620 leh BDS seat 27060 a awm mek a  ni. Amaherawhchu, hetih hunlai hian Mizoram sorkarin Medical College a din MIMER, Falkawn a mi leh Institution ding thar engemawzat, phalna hmu tharte chhiar tel an la ni lo thung.