NCC kaltlanga Indian Army Officer-a lut CAPT. M.S.DAWNGSANGA

Ngopa a piang, Aizawl Ramthar Venga khawsa thin tlangval chhuanawm tak MS Dawngsanga hi Mizo zinga NCC atanga Army Officer-a lut kan neih tlemte zinga mi a ni a, a chanchin ngaihnawm tak hi Mizo Army Officer pakhat tal kan neih belh theihna hmanraw tangkai takah lo chang mawlh teh se.

NCC LAMA A DINHMUN?

“Kum 2008-ah Chaltlang HSS-a ka kal laiin NCC ka zawm tan a. Hemi kum tawpah hian CATC leh Attachment camp, Manipur-a neihah ka kal a. Kum 2009-ah Hrangbana College-ah ka lut a, 2009 kum tawpah Republic Day Parade a tel tur thlannaah ka tel a, ka tling chho zel a, kum 2010 Republic Day-ah khan Delhi-ah ka zu parade ve ta nghe nghe a. Heta ka zu tel avang hian BA First Year ka exam theih loh phah ta nghe nghe a ni”

“Kum 2011-ah NCC ‘C’ Certificate ka nei a, 2012 ka chawl a, 2013-ah ti hian sipai-ah ka lut chho ta a ni”

ENGVANGA NCC ATANGA LUT NGE I NIH? NDA/CDS LAMTE HI?

“Ka kum a over tawh vang a ni. NDA-ah chuan kum 16-19 inkar an duh a, class XII kan pass khan kum 18 ka ni tawh a, result a chhuah meuh chuan ka tlai tawh a ni. Ka Graduate hlim khan Combined Defence Service Exam pawh vawi khat chu ka hmachhawn hman a, mahse result chhuah hmain NCC through hian ka lut ta si a, ka ngaihven zui ta lo a ni”

“NCC kaltlanga luhte, CDS kaltlanga luhte leh NDA kaltlanga luhte hi a inang deuh vek a. CDS a lut pawh tuna kan luhna tur OTA (Officers Training Academy)-ah tho hian an rawn lut ang”

Biodata

Name : MS Dawngsanga
Dad : Ngurthankhuma
Mom : Sailothangi
DOB : 19th July, 1990
POB : Ngopa
Address : Ramthar Veng, Aizawl
Edn. Background
Elementary : Camfort Intensive School, Ngopa
VIII : Govt. High School, Ngopa
HSLC : LTM High School (I Div. 73%)
HSSLC : Chaltlang HSS, Aizawl (56%)
BA (Gen) : Govt. Hrangbana College (58.85%)

NCC ATANGA SIPAI OFFICER-A LUH DAN…

“NCC ‘C’ Certificate neite tan hian NCC Special Entry Scheme a awm hrim hrim a, written test a awm lo a, direct interview tawp a ni a. Mahse, direct interview hmachhawn tur khan criteria min rawn pe ve a. Certificate ‘C’ rau rauah pawh khan Grade A emaw, Grade B emaw kan hmuh a ngai a, tin, NCC-ah kum 2 tal kan tan a ngai bawk. Graduate result-ah khan 50% tal hmuh a ngai bawk. Hetianga kan tling a nih chuan dilna kan thehlut ang a, kan dilna an pawm a nih chuan interview turin min rawn ko mai dawn a ni”

NCC KALTLANGA SIPAI A LUT HI AN VA TLEM VE..??

“A chhan ber chu kan tum tawk lova, kan zir nasa tawk lo bawk a ni ber mai. Keipawh hi ka inzir nasa a, tlaivar chang ka ngah mai. Physical lamah pawh ka tang nasa. Tin, army officer ka be tam a, an tawng dan thlengin ka zir nasa. Internet atangin Indian army video ka download nasa a, ka zir nasa thin. Tin, ka tawngtai nasa bawk.”

“NCC cadet tamtak Army Officer-a an luh theih lohna chhan lian ber pakhat chu Graduation-ah 50% an hmuh phak loh thin vang a ni. NCC-a tel chung hian lehkha zirna lamah tih that a ngai em em tho a ni tih hi kan hre tawk lo thin ni berin ka hria”

“Interview-ah hian Psychologist hovin ni 5 chhung teh meuh min test a, keimahni a engkim hi an hre vek a ni ber mai. Dawt sawi hi a thiang lo, dawt sawi chu an man chhuak rang lutuk. Mizote chu rinthu a thil sawi kan ching a, zawh zui kan dawl lo lutuk thin a ni. Hei hi mi tamtak tlin loh chhan lian tak pakhat a nih ka ring tlat”

PHYSICAL TEST HI A HAUTAK EM?

“Hautak lutuk lo. Tlan tak tak phei chu minute 3 vel emaw chauh kan tlan. Ni 5 chhung kan interview khan kan thluak an en nasa ber. A dan a dang lutuk”

INTERVIEW?

“Interview centre hi 3 -Allahabad, Bhopal leh Bangalore a awm a. Keini chu Allahabad-ah hian kan interview. Centre pakhat hi Major General pakhat zelin an awp a ni. SSB hrang hrang/Centre hrang hrang atanga tlingte chu kan tih that dan ngun taka an teh hnuah All India Merit List an siam leh a. A ti tha zual 50 chiah an la thin. Chutah chuan keipawh 8-na ka ni ve hlauh a, Mizo zingah chuan ranking sang ber ka la niin ka hria a, ka lawm ve khawp mai.”

INTERVIEW DETAILS HRIAT A VA CHAKAWM VE…

“A sei lutuk a, chawhma sawi a daih thei ang. Mahse, tawifel deuhin han sawi dawn ila:

“Day-I hi Picture, Perception and Description Test (PDT) kan ti a. Screen-ah hian picture engemaw an rawn kap a, chu picture kan hmuh dan chu ziahchhuah tur a ni thin a. Kan hmuh dan azir khan kan mizia an zir thin a ni. Tin, IQ Test an ti bawk a, zawhna 30 kha minute 27 chhunga chhan zawh tur a ni. Engemaw picture emaw, number emaw an rawn tarlang a, next-ah enge awm tur tih ang chi kha. Hemi zawhah hian Intelligent Test kan nei leh a, chutah chuan Day is to Light, Hot is….. tih ang chi…zawhna 30 kha minute 30 chhungin kan chhang zo leh a. Chumi hnuah Group Discussion kan nei leh bawk”

“Group Discussion-ah hian mi 15 zel hi Group khatah min dah a. Min endiktu Officer pathum hmaah min thut tlar tir a, a hma a milem min entir kha kan sawiho a, common story siam tur a ni. Heta an en ber ni a ka hriat chu midang thu kan ngaihchan thiam dante, thu lai lak kan thiam leh thiam loh leh mi chi hrang hrang ngaihdan lakhawma ngaihdan fel taka chhuahtir dan kan thiam leh thiam lohte a ni berin ka hria”

“Heng Test chi 4 kan neih hnu hian result an rawn tarchhuak nghal a, 80% vel an tla thin a, an haw nghal thei tihna a ni. Hei vang hian Day-I hi screening Day an ti thin bawk”

“Day-II hi Psychological Test an ti a. A hmasa berah WAT an tia, Word Association Test tihna a ni a. Word pakhat hi second 15 chhung an tilang a, chumi chhung chuan sentence siam zawh hman tur a ni. Chutiang chu word 60 an rawn tilang a, chu chu minute 15 chhunga chhan vek tur a ni a, chhan loh awih a ni lo. A hahthlak em em a, thlan a tla bawrh bawrh thei a ni. Chumi hnuah TAT an ti leh a, milem 20 min entir a, picture pakhat kha second 30 an tilang a, chumi hnu minute 3 chhung a story kan ziak a. Chumi zawhah blank picture a lo lang a, kan hmuh dan, kan ngaihtuah dan kan ziak leh a. Chumi hnuah Self-Description an ti a, mahni inhmuh dan ziah tur a ni. Minute 15 chhunga ziah tur a ni. SRT (Situation reaction test) an ti leh a, entirnan, class kal nan minute 5 chauh i nei tawh a, i bula mi kha car-in a rawn su thlu a, engtin nge i tih ang tih ang chi kha zawhna 60 min rawn pe a, minute 30 chhunga chhan zawh tur a ni. Chhan zawh hman ngaihna a awm lo a, kei pawhin 39 chiah ka chhang hman”

“Day III-ah hian GTO Test an ti a, pawnah min hruai chhuak a, test chi hrang hrang, kawng leh luikawr harsa lai deuh cross dan tura kan remhriatna an enchhin leh vek a. Chumi hnuah Group Discussion kan nei leh bawk. Chumi hnuah Lecturate an ti a, mi hma a kan thusawi dan an endik leh a. Kan thiante zawng zawng hmaah an topic min pek kha minute 3 chhung kan sawi a. Chu mi hnuah snake race an ti a, mi 10 vel zelin tent kan zawn a, kan intlansiak a. Bang lawnliam ngai tih angreng tamtak a awm a, chuta kan chet dan chu an en uluk hle. Helaiah hian kan YMA rilru, midangte tanpui duhna rilru hi ka lo apply nasa a, a tha an ti khawp mai”

“Day IV-ah chuan Individual Obstacle, physical lam min en leh a. Alkatra barrel bung an ti tlu a, zuankan tur a ni a, long jump nen. Engmah harsa a awm lo. Hruia uai te, zig zag a tlan te, tiger jump an tih maite chu Mizo tlangval tan chuan engmah harsa a awm lo. Vai ho erawh chu nuihzatthlak ngial ngial an awm ve fo mai”

“Heng zawng zawng kan tih zawh hian Final Group Task an ti a, commander-ah kan tang a, kan hote kan enkawl dan min endik leh vek a ni”

“Day V-ah hi chuan Conference a ni tawh mai a, min test-tu officer zawng zawng an lo thu kual a, an hma ah kan va thu a, an duh duh min zawt a. Hetah hian final decision an siam thin. Chawhnu lamah result an tarchhuak a, a tling zawngin medical kan ti nghal thin. Heng ni 4 chhunga hun remchang laiah hian a personal interview kan nei bawk. Minute 30 chhung kan interview a, keima mimal chanchin chiah min zawt”

I HNUNG ZUI TURTE TANA THUCHAH DUHTE I NEI EM?

“Thil pathum- pakhatna ah chuan straight forward…i hriat loh chuan hre lo tawp rawh. I hriat erawh chu hrechiang hle rawh. Entirnan, football ka khel thin i tih chuan football field zau zawng, AIFF President, football chanchin chipchiar taka i hriat a ngai. Hria i intih a i hriat si loh chuan i tla nghal ang. Pahnihna ah chuan mahni inhriatchian a ngai. Kan chakna, kan chaklohna lai hriatchian a pawimawh em em. Pathumna-ah chuan dawt sawi loh a ni mai. He mite pathum hi kan hriat reng chuan tlin a harsa lo”

“Hlawhtlinna hi Institution-ah ni lovin a mihringah a innghat nasa zawk. Kei pawh thingtlang a lehkha zir, Aizawl atanga College chhuak ve mai ka ni. Mahse, thahnemngai taka ka zirna leh ka tawngtaina avangin India rama University tha pui puia zir chhuakte pawhin min tluk chuang lo. Mite zir let zel hi zir ila, hlawhtlinna chu a lo lang mai a ni”