Jet Fighter lamah Indian Air Force (IAF) dinhmun a tha viau lo

Indian Air Force chuan France atanga fighter tha Rafale 36 a lei turte chu kum 2019 September thla atanga dawn tan theih a inbeisei a. Heng a fighter lei thar turte khalh dan leh enkawl dan zir tur hian India fighter pilot leh engineer engemawzat chu France-ah hian an awm mek a ni Tun tuma India in indo thlawhna a lei tur hi kum 22 chhunga ram pawn lam atanga a lei lehna hmasa ber tur a ni nghe nghe.

Rafale fighter, India in a duh ang taka a siamtir leh a tihdanglam tir dan tur chu

India leh France hian kum 2016 September thla khan Rafale fighter 36 leina tur inremna, $ 8.7 billion senna tur chu an lo ziak tawh a. Hemi hma hian India hian fighter 126 zet leina tur ruahmanna thui tak a lo buaipui hman tawh chu harsatna chi hrang hrang avangin tihtawp a ni a, a aiah emergency-a mamawh hnawhkhahna atan Rafale hi 36 lei a tum leh ta rih zawk a ni.

India hian khawchhak lam (China) leh khawthlang lam (Pakistan) a indona hmachhawn kawp thei tur chuan fighter squadron 42 zet a mamawh laiin tunah chuan squadron 32 chauh a nei a ni. Squadron 1-ah hian thlawhna 16-18 vel a awm.

Tunah hian China hian fighter squadron 60 a nei mek a, Pakistan-in squadron 25 a nei ve bawk a. A ruala China leh Pakistan fighter 1500 vel bei turin India hian fighter 550 vel chauh a nei tihna a nih chu!

India fighter chhuanvawr : Su-30MKI fighters

Fighter squadron neih ngah leh ngah loh ringawt hi van boruak lama chakna tehna tur ber chu a ni hauh lo a, ral do thei tura an fit dan leh fighter tunlai deuh zawk an neih danah a inghat thui hle ang. Indian Air Force-in squadron 32 a neih zinga 11-te chu thlawhna hlui tawh, MiG-21 leh Mig-27 squadron an ni a. Heng thlawhna te hi hun reilote-ah chawlhtir an ni tawh ang. India innghahna, a fighter chhuanvawr Su-30 MKi hi squadron 13 vel an awm a. France siam Mirage 2000 fighter bakah Jaguars leh MiG-29 ho hi squadron 9 vel an awm bawk. Mirage leh Jaguar-te hi an hunlai chuan thlawhna tha ber ber a chhal ni mah se, 4.5 generation fighter hmachhawn tur chuan an rin leh duap tawh viauin a rinawm. Tin, India hian ama kutchhuak ngei LCA Tejas hi 83 order a tum mek a, he Tejas fighter hian eng inbeihna mah a taka la hmachhawn lo a nih avangin hriatthiam a har rih viau bawk.

France siam Mirage 2000 upgrade (Mirage 2000 hi Kargil war-ah khan a tangkai hle)

Indian Air Force fighter squadron neih zat hi a tlem hrim hrim bakah India fighter neih tam zawkte hi a tunlai tawh lo hlawm hle a. Ram changkang zawkten 4.5 gen fighter leh 5th Gen. fighter lama hmasawnna nasa tak an neih chhoh mek bawk si avang leh, thenawm ramte nena indo thei reng dinhmun a kan awm bawk si avangin Indian Air Force dinhmun a him lo ru hle a ni. Chuvangin, Airforce lam thuamchak hi India tan a hmanhmawhthlak ta hle a  ni.

Be the first to comment on "Jet Fighter lamah Indian Air Force (IAF) dinhmun a tha viau lo"

Leave a Reply

This site uses Akismet to reduce spam. Learn how your comment data is processed.

%d bloggers like this: