Indian Navy Drone IAI Heron a tla leh ta…

Indian Navy hovin enthlakna atan bera an hman mek, mihring chuan ngai lo chi thlawhna, an drone chhuanvawr, Israel company  Israel Aerospace Industries siam Heron Unmanned Aerial Vehicle (UAV) chu vawiin (April 14, 2018) chawhnu lam khan Gujarat-a Porbandar INS Sardar Patel naval base atanga km 25 velah a tla. Hei hi chawlhkar thum chhunga helai hmuna Heron Drone a tlak vawi hnihna a ni.

He Drone hi a hun hman thin pangngai anga enfiah hna thawk tura thlawkchhuak a ni a. Lei lam atanga control-na a fel tawk loh avanga tla ni a sawi a ni.

Heron hian vansang feet 35,000 (10.5 km a sang) a thlawk chungin enthlak hna tha takin a thawk thei a. Chawl lovin darkar 52 zet a thlawk thei bawk. GPS hmanga control theih a ni a, remote control hmang kher lo pawhin a thlawhna tur set sa in hun rei tak a thlawk thei bawk. He drone hian ralthuam erawh a pai ngai lo.

Heron drone version hrang hrangte hi kum 2011 atang khan Indian armed forces hnuaiah hman tan a ni a. A that em avang leh a tangkai em avangin India hian engemawzat lei belh tumin hma a la mek a ni. Tin, IAI Heron kher lo pawh hi Israel siam Drones engemawzat India hian a kawl mek bawk a, Army ringawt pawh hian drones 200 chuang an service tir mek a ni.

%d bloggers like this: