India fighter chhuanvawr Su-30 MKI siam zawh hlim a tla

India-in Jet Fighter a neih mekte zinga a chhuanvawr Su-30 MKI siamzawh hlim, enchhin lai mek chu nimin June 27 chawhma lam dar 11:05 khan Maharashtra a Nashik atanga km 25 a hla, Wavi-Tushi khaw bul lawkah a tla a, Ozar (Nashik) Airport atanga thlawkchhuak a  ni. He thlawhna hi Wing Commander Prashant Nair a khalh a ni a, Sqn Leader L Biswal (Flight Test Engineer)-in a khalhpui bawk. Pilot pahnihte hi an inkahchhuah hman bakah a tlaknaah thi leh hliam an awm lo niin report a ni.

He jet fighter tha tak mai hi Russia kutchhuak niin, van boruak leh lei lam a ruala bei thei (multirole) fighter a ni a, ram pahnih inbiakremna angina India ram chhungah siam chhuah ve a ni a. India hian 250 vel a nei mek a, airforce tha chakna hnar ber a ni mek a ni. He thlawhna tla ta hi Aircaft Manufacturing Division, Nashik atanga siamchhuah hmasak berte zinga mi a ni. He hmunah hian aircraft squadron thar tur, Su-30 MKI 12 vel siam zawh tawh a ni a, thlawhna pakhat hi cheng vaibelchhe 300 man vel zel a ni.

He thlawhna chesual ta hi a hma pawhin hlawhtling taka enchhin a lo ni tawh a. Vawi engemawzat thlawkchhuakin a lo tum tawh a, IAF kut a hlan mai theih tura ruahman mek a ni nghe nghe. A tlak chhan hi chhuichian a  ni ang.

June 8 leh 5, 2018 khan IAF fighter Jaguar chu a lo tla tawh bawk a, thla khat chhunga Jaguar fighter pahnih tlaah hian pilot pakhat a thi nghe nghe. Hemi hma lawk, May 23, 2018 khan IAF Cheetah Helicopter chu Jammu & Kashmir-ah a tla a, March 20, 2018 khan Advanced Hawk Jet trainer thlawhna chu Jharkhand & Odisha ramri-ah a lo tla tawh bawk.

%d bloggers like this: