Telangana State pian dan leh Mizoram

Andhra Pradesh atanga Telangana state dinna tur, Andhra Pradesh Reorganisation Bill (Telangana bill) hi Feb. 18, 2014-a Lok Sabha-a pass a nih hnuah, Feb.20, 2014 khan Rajya Sabha-in a pass ve leh a. June 1, 2014 zan zanlai khan India ram state 29-na atan puan a ni.

India ram State 29-na, Telangana state hian Andhra Pradesh-a district 10 – Hyderabad, Ranga Reddy, Medak, Nalgonda, Mahabubnagar, Karimnagar, Warangal, Khammam, Nizamabad leh Adilabad-te a huam a, heng bial chhunga mihring cheng zat hi vaibelchhe 3.5 vel an tling. Seemandhra bial lamah hian district 13 awmin, mihring vaibelchhe 5 vel an awm bawk. Andhra Pradesh khawpui, Hyderabad chu state pahnihte hian sorkar laipui ruahmanna angin kum 10 chhung atan khawpui (capital) atan an inhman tawm a, kum 10 hnuah Telangana state lamin a chang zui ang.

Background

Helai chhehvel buaina hi kum 1947-a British awpna hnuai atanga India a indan hma deuh atang khan a lo intan daih tawh a. India in Independence a hmuh dawn lai vel khan Muslim Lal, Nizam of Hyderabad chuan a awp chin, Hyderabad state chu a bik taka enkawl, thuneihna tamtak nei Princely State an tih anga enkawl chhunzawm zel nise a duh a. Hetih lai hian he state chhunga cheng mipui 93% zet hauhtu Hindu ho chuan ‘Join India Movement’  (India sorkar hnuaia luh) an kalpui ve thung a. Hetiang hnuaiah hian Communist Party fuihpawrhin he state chhunga lo neitute chu Nizam lakah chuan an hel ta a ni. Hetianga buaina nasa tak a chhuah tak avang hian Government of India chuan sipai chakna hmangin, ‘Operation Polo’ vuahin kum 1948 September 17 khan Hyderabad state chu a hnehchhuh ta a ni. Chuta tang chuan hnehchhuhna hmanga awp beh mipuite chuan anmahni puala rorelna neih let leh chu an tum ber a lo ni chho ta a ni.

November 1, 1956 khan States Reorganization Act hmangin  Telugu tawng hmang, tunhma a Hyderabad state ni thin leh Madras state-a Telegu tawng hmangho chenkhawmna  chu kaikawpin Andhra Pradesh state siam a ni a. State khawpui atan Telangana ho khawpui Hyderabad thlan a ni ta bawk.

Harsatna

Harsatna nasa tak thlentu Telangana dinhmun leh a mi chengte lungawilohna hrangte lo tarlang ila:

  • Andhra Pradesh huamchhunga ram bial then 3 zingah Telangana hi a lian ber a, state pum zauzawng atanga 41.47% lai an luah a ni. State population atang pawhin 40.54% zet chu Telangana mi an ni nghe nghe. Tin, he Andhra Pradesh state-in chhiah a lakluh zawng zawng atanga 76% chu Telangana atanga hmuh a ni bawk ni a report a ni.
  • Telangana mite chu rorelna diklo, thlei bik neia rorelna hnuaiah an kun reng niin an sawi thin a. Andhra Pradesh state chhunga luang, Godavari leh Krishna lui tamzawk chu Telangana area a luang ni mahse, he lui atanga tuilak (irrigation) zawng zawng atanga 74.25% chu Andhra Region lamah pek a ni a, Telangana chuan 18.20% chauh an chang ve a ni.
  • Zirna lamah – State sorkar Primary school awm zawng zawng zat atanga 9.86% chiah Telangana-in an chang a, Government degree college 37.85% chiah an chang bawk.
  • Hetiang taka mipui tam leh area zau bawk si, an state a ram hausa lai ber, Telangana hian an state budget-ah hmun thuma thena hmun khat (1/3) pawh an chang pha ngai lo a. Prof. Jayashankar chhut dan phei chuan state chhunga sorkar hnathawk zingah 20%, Secretariat hnathawk 10%, Department head 5% vel chiah Telangana miten an chang ve a, a bak zawng chu Andhra lam mite hian an chang vek a ni.
  • Tin, Justice Bhargava kaihhruai Committee chuan kum 1956 atanga 1968 chhung khan Telangana hmasawnna tur fund, Rs. mtd. 283 zet chu Andhra region lamah pawh pen a ni tih an tarlang a. Economist CH Hanuman Rao chuan he Committee report hi zirchiang lehin, an sum pawhpen zawng zawng hi Rs. 1.174 billion zet a ni zawk tih a hmuchhuak leh bawk.
  • Telangana State hran siam rawttute chuan State legislature mai bakah Lok Sabha a Telangana hmasawnna tura ruahmanna leh agreement reng reng chu ngaihthah a ni a, hetiang a nih avang hian Telangana hian state hran phut mai loh chu tihtur a neilo niin an sawi. Tichuan, ngaihthah bik ni a inhriatna chuan inlakhran duhna chu a chhem alh chho zel a, kum 58 a vei meuh chuan harsatna tamtak karah Telangana State chu a lo piang ta nawlh mai a ni.

State thar ngiatna leh a chhehvel

Telangana miten hamthatna nasa zawk an neih theih nan leh State thar a din theih nan hian hma an la nasa khawp mai a, hmalakna tlangpui lo tarlang ila:

  • 1952 Mulki agitation : Hei hi Telangana zirlaite huaihawt niin an area a hna tamtak Andhra lam miin an thawh zel avangin tualchhung mite ngeiin heng hnate hi thawk tawh rawh se tih chu an thupui a ni. An slogan chu ‘Non-Mulki go back’ tih leh ‘Idli Sambar go back’ tihte a ni. Zirlai 7 zet Police-te silai hmehpuahah an boral nghe nghe.
  • 1969 Telangana Agitation : Andhra lam mi hnathawka Hyderabad a kum 12 lo awm tawh chu tualchhung mi anga ngaih tur an ni tih dan chu kum 1969 January thla ah siam a ni a. Telangana zirlaite chuan duh loin nasa takin lungawilohna an lantir  a ni. He thu kal zelah hian Congress party an phel phah a, AP thendarh duh lotu India PM Indira Gandhi ruahmannain Telangana lam mi, PV Narasimha Rao chu kum 1971 Sept. 30-ah CM atan ruat a ni.
  • 1972 Jai Andhra Movement : Mulki Rules an tih mai, Hyderabad-a kum 15 hnathawka lo awm tawh chu tualchhung mi anga ngaih tur an ni tih duh loh avangin Jai Andhra Movement a lo chhuak leh a. He Movement kal zelah hian CM ni lai PV Narasimha Rao chu kum 1973 January 10 ah a bang a, President’s Rule puan a ni.

  • Six Point Formula of 1973 : Kum 1973-ah hian Central Government hmalaknain helai buaina chinfelna tur point 6 siam a ni a. Zirna, hmasawnna hna, hna lak chungchanga reservation, kaisanna chungchangahte Telangana mite tan hamthatna siam a ni.
  • Kum 1990-2004 chho velah khan State BJP chuan Telangana state siam tumin Movement an han siam ngial a, mahse, an thawhpui Party dangte nen an inlungrual theih loh avangin an puitlin ta lo. Hetih chhung hian kum 2000 khan BJP sorkar hian state thar pathum-Jharkhand, Chhattisgarh leh Uttarkhand an siam a ni.
  • Buaina kal zelah hian kum 2009 kum tawp lamah AP atanga Telangana state thar siam tumna avang hian Andhra lam MLA 147 leh MP engemawzat an bang a. State Cabinet-a Minister 22 ten banna an thehlut nghal bawk.
  • An harsatna chungchang zirchianga rawtna siamtu tura Central sorkar din Srikrishna Committee rawtna hrang hrangte duh lovin buaina nasa tak a chhuak chho zel a. Kum 2011 khan Telangana MLA 119 zinga 81, Minister 15 zinga 12, MP 14 ten banna an thehlut leh bawk.

Hetiang a movement hrang hrang a thlen hnuah leh thisen tamtak a luah hnuah June 1, 2014 khan Telangana chu India ram state 29-na atan puan fel a ni ta a ni.

Zawhnate hi chhang teh le!

  • Ngaihthah bik ni a inhriatna hi Mizoramah a awm vein i hria em?
  • Mizoramah hian development hi a khairual tha tawkin i hria em? Mizoram a thingtlang leh khawpui nun inthlauh dan i sawi zau thei em?
  • Mizoramah hian tawng hman inan chiah loh vanga inlakhranna emaw, inenhranna emaw a awmin i hria em?
%d bloggers like this: