MZP-in Zofate chawlhbuk sak tumin hma la leh dawn

  • Ramri chungchanga sorkar hmalaknaah MZP-in lawmna tur an hre lo!
  • Mizorama dan lova hnamdang sumdawng pung chak lutuk an ngaimawh..

Aizawl May 1, 2018: May 1, 2018 a MZP General Headquarters executive meeting chuan Bairabi Zophai hmuna Mizoram Chief Minister hmasa ber Ch. Chhawnga(L) nupui Lalrothangi’n MZP te ram a pekah Zofate Chawlhbuk sak hnatlang chu hun remchang hmasa berah koh leh nise tiin a rel.

MZP-ten Chawlhbuk an sakna hmun

MZP thuchhuahin a tarlan danin MZP General headquarters bul tuma Bairabi Zophai hmuna Zofate Chawlhbuk sak a tum, Central Sorkar atanga rawtna State Sorkar pahnih Mizoram leh Assam State-te hmala tura a ruatte hmalakna chu ngun takin an ngaihtuah a. MZP chuan State Sorkar pahnih hmalakna chu lungawina tur leh lawmna tur awma an hriat loh avangin Central Sorkar rawtna leh ngenna chu zahawm viau mahse Bairabi Zophai hmuna Mizoram Chief Minister hmasa ber Ch. Chhawnga (L) nupui Pi Lalrothangi’n MZP te ram a pekah Zofate Chawlhbuk sak hnatlang chu hun remchang hmasa berah koh leh nise an ti a ni.

MZP chuan tunlai a Mizoram chhunga dan lo a hnamdang sumdawng an pung chak ta lutuk leh an huangtau ta lutuk chu ngaimawh thu an tarlang a. Mizoram chhunga ram hmasawnna tura dan dik taka hnathawkte chu a welcome-in hna tha takin thawkse a duh em em a. Chuti nilo a Mizo hming hawh leh Permit-in a huam loh thleng thleng a duh duh dana sumdawngte chu MZP meeting chuan tha lo a ti hle a. Mizo hming hawh tira hnamdang sumdawnpuite chu a demin hnam phatsantuah ah ngaih thu an sawi a ni.
Hnamdang mahni duh dan ang a sumdawngte pawh an dapchhuah tur thu leh, an chunga na taka hremna lek a nih theih nan thuneitute hnena an thlen tur thu an sawi bawk.

MZP chuan Mizoram chhunga dan lova hnamdang sumdawngte leh Mizo hming hawh a sumdawngte dapchhuakin a tul angin hma a la chhunzawm zel dawn a, hnamdang dan lo a sumdawngte dapchhuah kawngah hian MZP chuan Mizo mipuite thlawpna an ngen a ni. Heng dan lo a hnamdang sumdawngte hi an sumdawnna tihtawp a nih theih nan MZP chuan hmalak chhunzawm zel a tum a, hnamdang dan lova sumdawngte chungchanga hmalakna tithuanawp zawng leh hnamdang thlavang lo hauh lo tura Mizo mipuite an ngen thu MZP chuan an tarlang bawk.