Mizoram Youth Commission-in ‘YOUTH SUMMIT & ROAD SHOW’ BUATSAIH DAWN

Mizoram Youth Commission chuan April 17-18, 2018 hian Assembly Annexe, Treasury Square-ah ‘Youth Summit and Road Show, 2018’ a buatsaih dawn a. Youth Summit hi kawng hrang hranga Mizoram ṭhalaite hmasâwnna tûra infuihna leh inzirtîrna hun atân te, Skill Development lama ṭhalaite hmasâwnna tûr thil ṭul chi hrang hrang inhrilh hriat nân te, lehkha zirna leh hna thawh tûr thlenga kawng in kawhhmuh nân ṭangkai taka hman tûra ruahman a ni.

Mizoram District tin khawpui ṭheuhah April/May 2018 chhûngin neih chhunzawm zêl a ni ang a; District danga tih zawh hunah a khârna chu Lungleia hman tûra ruahman a ni bawk.

Youth Summit & Road Show 2018 ah hian Skill Development leh Youth Affairs lama hmalâkna neiho Mizoram sawrkâr Department hrang hrang eng emaw zât bâkah Private Agency/Firm eng emaw zât nên thawk hoin hun hman a ni dâwn a; he hun hmannaah hian MYC chuan Stall 50 vêl a siam dâwn bakah, Mizoram ṭhalaite hmâkhua atâna pawimawh hrang hrang kawng inkawhhmuhna te, programme hrang hrang tân Stall tinah exhibition neih te, video film siam, photography leh arts/ painting-a ṭhalaite tâna intihsiakna buatsaih a ni dâwn bawk.