Medical & Healthcare

group of doctors in hospital smiling and looking friendly

Hna kalhmang :                

Eizawnna tamtak, hun inher dan mila mamawh zui tawh loh a awm thin a, Medical lama eizawnna erawh hi chu mihring awm chhung chuan mamawhna a sang hle reng a, a thiam tan chuan eizawnna tur a awm reng a ni. Tin, medical lam thiam mi, a bikin Doctor-te phei hi chu khawvel khawi hmunah pawh ngaihsan an hlawh reng a ni. Medical lam hna kalphung hrim hrim hi eizawnna a nih rualin midang tanpuina/enkawlna a ni a. Hetah tak hian damlohna-in hunbi a thliar si loh avangin damdawi lama thawk tamber hi chuan hnathawh hunbi an nei thei tak tak lo a, zan rei a chet thut thut, hun pawimawh dang awm laia inkoh thut thut awm thei a ni a, chhungte zinga awm hman loh chang a tam hle bawk. Hetiang a nih avang hian medical lam hna reng reng hi midang tanpui duhna rilru pu tan chuan hna duhawm ber a ni thei a, chutiang rilru pu lem lo tan chuan hna hrehawm berte zinga mi a ni thei thung.

Medical lamah hian eizawnna chi hrang hrang a tam em em a, a tlangpui lo tarlang ila:

Doctor :

Doctor hi chi hrang hrang- MBBS (Bachelor of Medicine and Bachelor of Surgery), BAMS (Bachelor of Ayurveda Medicine and Surgery), BHMS (Bachelor of Homoeopathic Medicine and Surgery) a awm a. Bachelor degree atanga Specialist, Super Specialist thlenga zir theih a ni a. Doctor zir tur chuan Class XI leh XII ah Science (Biology) lak ngei ngei a ngai thung. Tin, India ram pum huap entrance test, NEET (National Eligibility and Entrance Test) paltlang ngei ngei a ngai bawk.

India ramah hian Doctor indaih lohna a nasa hle a, Doctor hna hmu lo a awm theih tak tak loh a ni. Tin, MBBS mai ni lo, Specialist leh Super Specialist thlenga zawh theih phei chuan hna hmuh loh a awm thei lo reng reng a. Private-a practice  duh tan pawh chance a thain a hlawk em em reng a ni.

Nursing :

Nurse chi hnih – B.Sc Nursing leh GNM (General Nursing and Midwifery) a awm a, B.Sc Nursing zir turin Science (Biology) lak a ngai a, GNM tur erawh chuan Science kher a ngai lo. B.Sc Nursing zir turin Class XII-ah 45% hmuh ngei ngei a ngai a, GNM turin 40% hmuh a ngai bawk. Institution tha pangngai a lut tur chuan entrance exam paltlang a ngai a, private institution tamtakah erawh entrance hmachhawn kher lovin a luh theih thung. Tin, ANM, Health Worker kan tih mai hi Matric pass tan a zir theih bawk. Nursing lam reng reng hi hna a tam a, ngaihsan hlawh tak a ni. Sorkar leh private hospital bakah Sipai lam thlengin officer (Military Nursing Service) nih theihna chance a tha hle a. Kum reilote chhungin Captain leh Major a kai mai theih a ni. Amaherawhchu, Military Nurisng Service tur hian B.Sc Nursing deuh kher an duh thung.

Nurse hna zirchhuak tan chuan foreign-a hnathawhna chance a tha hle a. Khawvel ram changkang zawkahte  mamawhna a san avangin Nurse hna hi hlawk lutukin a thawh theih a, US, Australia leh European ram tamtakah Nurse an mamawh em em reng a ni.

Pharmacy :

Damdawi lam zirna (dam lo enkawl dan ni lovin), Pharmacy hi Diploma (D.Pharm),Graduate (B.Pharm), Master degree (M.Pharm) leh a chunglam thlenga zirna a awm a, career tha tak a ni. A zir man erawh a to ve deuh.

Dental :

Ha doctor zirna, BDS (Bachelor of Dental Surgery) a awm a, sang tak thlenga zir theih a ni a, eizawnna tha leh hlawk tak a ni. Zir theih dan pawh MBBS-te nen a inang reng a, NEET entrance kaltlanga admission hmuh theih chauh a ni.

Others :

Heng bakah hian Medical field-ah hian hna chi hrang hrang a tam em em a, professional course tha tak a ni hlawm a ni. A zavai a tarlan sen ni lo mah se, tlemzawng lo tarlang ila: Laboratory Technician, Medical Assistant, Medical Transcription, Physiotherapy, Dietician & Nutrition, Sports Medicine, Radiography, etc.