Match Report – France 4-3 Argentina

FIFA World Cup 2018, Round of 16 inkhel hmasa berah France chuan Argentina 4-3 a hnehin quarter final an lut a, he inkhela langsar ber chu Lionel Messi ni lovin goal hnih thuntu, kum 19 leka upa Kylian Mbappe a ni.

FT: France 4-3 Argentina

FRA: Griezmann (P) ’13, Pavard ’57, Mabppe ’64.’68

ARG: Di Maria ’41. Mercado ’48. Ageuro ‘90+3

 

Tuten nge khel?

France: (4-2-3-1) Lloris, Pavard, Varane, Umtiti, Hernandez, Kanté, Pogba, Mbappé, Griezmann, Matuidi, Giroud.

Argentina: (4-3-3) Armani, Mercado, Tagliafico, Mascherano, Rojo, Otamendi, Banega, Di Maria, Perez, Pavon, Messi.

Kazan Arena-a inkhelah rin loh takin Sampaoli chuan player a thlang a, striker Aguero, Higuain leh Dybala te luh tir lovin Messi chu false 9 angin a khelh tir. France erawh an that dan berin an inrem thung a, midfield khawng taka remin Messi dan chah chu an tum ber a ni.

Inkhelh tan atangin France-in bul an tan tha zawk a, Messi leh a pawlte inrin ve hmain goal an khung nghal. Minute 10na lekah PSG forward Mbappe chuan kawlphe ang maia chak leh rangin anmahni lam atangin ball an tlan luh pui a, penalty box a thlenin Marcos Rojo chuan a lo ti tlu thei hram! Rojo hian yellow card hmu zuiin penalty pet turin Atletico chhuanvawr Griezmann a rawn ding a, France hmahruaina goal a rawn khung. Griezman hi Zinedine Zidane (2006) hnua World Cup vawikhata group stage leh knock-out a goal thun leh thei hmasa ber a ni.

Didier Deschamp-a’n game 80 a enkawlnaah hian France hi chak zui tur beisei nghal an ni a, tharum leh tlanchak lamah Argentine player ten an khan loh deuh avangin goal khat lek pawh an chakpui theih mai a rinawm hman. Mahse, chawlhlawk hma minute li chiah a awm tawh tihah throw ball atanga ball kal zel chu Di Maria chuan changin  yard 30 vel atangin pui lutuk tak main a shot goal a, Argentina-in beiseina nen chawlhlawk an hman phah a ni.

Second half tirah Argentina coach Sampaoli chuan yellow card hmu tawh Rojo ai defender palian Fazio a dah lut a, goal chhuah tawh loh a tum hle. Minute 3 chiah an khel hman tihin freekick an pet atanga ball kal zel chu Messi chuan goal-ah a shot a, heihi Mercado chuan lo dang pialin Lloris a dan theih lohin a lir lut a, rin loh zawk Argentina-in 2-1 in hma an hruai ta.

Hemi hnu hian France chuan an nawr chhunzawm a, first half-a langsar Mbappe bawk a langsar leh zel. Minute 50 an khelh chhungin Mbappe vangin Argentina player pathum Rojo. Tagliafico leh Banega ten yellow card an hmu hman a, Kante a tih tluk avangin Macherano chuan yellow card a hmu bawk. Minute 57 naah France chuan an siphurh an sut ve leh a, left back Hernandez ball cross chu Pavard chuan box pawn hret atangin mawi lutukin a volley a, keeper man hman lohin a thlawk lut delh delh mai a ni.

2-2 anih hnuah France bawk an hlauhawm zel a, tlanchak vanga langsar Mbappe hun a thleng ve ta a, 3-2 a hma an hruaina goal minute 64-naah a thun leh nghal. Argentina-in nawr ve tumin minute 66-naah Aguero an dah lut a, mahse minute 68-naah Mbappe bawk a rawn lawr leh a, Giroud a ball pek tha tak chu France goal li nan a thun lehnghal a ni. 4-2 a an tlawm hnuah Higuain emaw Dybala lut tura rin nimahse Sampaoli chuan Meza zawk a rawn luh tir a, awmzia a awm thei lo hle.Minute 80 hnulamah France lamin Griezmann leh Mbappe lachhuakin Fekir leh Thauvin an dah lut a, hahdam taka quarter final luh an tum tawh a ni.

Hun pangngai tawp hnuah minute 4 pek belh leh an ni a, Argentina lamin nawr ve zelin minut 93 naah Messi cross tha tak chu Aguero chuan a tauh goal ve leh a, phur thar leh viau mahse goal dang thun leh nan a tlai lutuk tawh! Hamrik hnunhnung a ri chhunzawma, Lionel Messi leh a pawl ten an puanthuah an tel a ngai ta a ni.

Argentina hian kumin World Cup match vawi 4 an khelhah first 11 leh formation mumal an nei lova, a thar zel an hman an tuara  tih theih ang. Coach Sampaoli an ban thu kan hre zui vat tura beisei a ni.

Group stage a beisei pha lo leh match thuma goal thum chiah thun thei France team erawh beisei ang takin a rawn khel ta a, midfielder an neih that an chhawr tangkai a, Messi pawh an tum angin an veng hneh viau. Group stage-ah goal thum chiah an thuna, zaninah goal 4 an thun thung. Striker hriam tha zek zawk nei phei se chuan tun aia hlauhawm thei daih tur an la ni.

France hi kum 2014 khan quarter final-ah an tla tawh a, kuminah erawh champion ngei an tum hle. Uruguay leh Portugal inkhel a chak zawk zawk an tum leh ang.