Manchester United hnawltu Maguire

England defender Harry Maguire chuan transfer lai khan amah lei tum tu an awm ngei tih sawiin, mahse Leicester City tana rinawm taka khelh a thlan zawk thu a sawi.

Kum 25 a upa Maguire hian World Cup khel zawh takah khan chhinchhiah tlak khawpin a khel tha a, pali-na an nih theihna kawnga player pawimawh ber pawl a ni. Heivang hian nipui transfer inhawn velah Manchester United chuan lei tumin an veh nghal a, Maguire man atan hian pound maktaduai 60 lai an thehchhuak hman niin sap ram chanchinbu te chuan an sawi.

He thil hi a dik thu Maguire chuan sawiin, “lei min tum hnu khan club hotute ka bia a, mahse anni chuan hralh min tum loh thu sawiin, an thuthlukna kha ka dah pawimawh ber a ni” tiin Manchester United a zawm loh chhan a sawi.

Leicester City tana a rinawm chhan sawi zuiin, “Premier atanga kan (Hull City) relegate hnuah he club hian Premier League khelh leh theihna hun tha min pe a, ka theihna lanchhuah tir hun min pe a ni. World Cup ka khelh theih phah bawk a, ka tan chuan thil ropui tak a ni. Heivang hian an thuthlukna ka zah a, he club lakah hian bat tam tak ka nei a ni” tiin Leicester-in an rintawk avanga lawmthu sawiin, season tha taka an hman chhoh ngei a beisei.

Maguire hian nikum June thla khan Hull City atangin Leicester City hi kum 5 chhung atan £12 million-in a zawm a, a man hi £17 million a la sang thei tura tih a ni. Leicester a zawm hnuah an rinrawl ni nghalin; season hmasa khan premier league game zawng zawng a khel kim vek a, season tawpah Leicester City Player of the Season leh Players’ Player of the Season atan thlan a ni nghe nghe.

Season hmasaa a chet that avang leh FIFA World Cup-ah mit tlung taka a khelh avangin defender mamawh Jose Mourinho chuan tun nipui transfer khan lak a tum viau a, mahse Maguire berin Manchester United zawm ai chuan The Foxes tana rinawm zel a la thlan rih avangin a hlawhtling ta lo a ni. Maguire bakah Tottenham atangin Toby Alderweireld leh Atletico Madrid atangin Diego Godin te chu Mourinho hian lei a tum a, a hlawhchham vek a ni.

Be the first to comment on "Manchester United hnawltu Maguire"

Leave a comment

Your email address will not be published.


*