Vawk vulhtu hlawhtling – H.Lalengmawia : MYC Young Achievers’ Awardee, 2018

H.Lalengmawia (Enga/Duata) hi kum 1984 November 2 khan Cherhlun khuaah a lo piang a, a pa chu H.Hrangchhuma a ni a, a nu chu Thangrimawii a ni. Unau 5 zinga mipa mal, a upa ber dawttu a ni. Tunah hian Cherhlun Vengtharah an chhungkuain an khawsa mek a ni.

Computer hmanga (desktop publishing) kum engemawzat ei a zawn hnuah kum 2013 atangin a chak ber thin farm siam lam luhchilhin, vawk a vulh ta a. A tirah chuan Vawkpui tur leh a note pathum leiin bul an tan a, kum 2018 a nih meuh chuan Vawkpui ringawt pawh 20 chuang a vulh tawh a, a vai phei chuan vawk 140 chuang a vulh ve ta! 2018 chung hian vawk note ringawt pawh 200 chuang a nei tawh nia! Vawk note man hria chuan han chhutsak chhin teh u!

Ran vulh chhungkua an ni

An chhungkua hi pi leh pute bul (in pui) a khawsa an ni a, a pi leh pute chhungkua hrim hrim hi ran vulh nasa, engtik lai pawha ran vulh deuh reng an ni. A naupan lai atang tawhin heng a pi leh pute ran vulh hi a pui nasain, chu chuan ran vulh lama tuina amahah a pe nasa hle a. Nikhua a hriat chhoh tirh atanga a thil chak ber thin chu farm siam a ni bawk a, zan mutna thlengin chu a dream chuan hmun luahin, a dream tih hlawhtlin theih dan tur chu paper-ah ziakin a chhut nasa thin hle a ni.

Tin, a mah hi mahni a inenkawl tum mi a ni ve hrim hrim bawk. A tette atangin school chawlh ni hun remchangah chuan thing puin, thingfakte hralhin a theih ang angin sum a lo intuak ve tawh thin a. Tlema a lo leikan deuh hnu phei chuan christmas pocket money tuakin meihawl-te pawh a lo rawh ve tawh thin a  ni. Thawmhnaw tha leh man to a ngaihven ngai lo a, zuk leh hmuam a tih bawk si loh avangin a khawsak a awlsam thin hle a ni.

Desktop Publishing lam a luhchilh hmasa

Kum 2006 khan Desktop Printing (DTP) hi a buaipui chho tan a, kum 2007 atang phei chuan eizawn nan a hmang chho tawh a ni. Thlalak leh video edit-te a tuipui chho viau a, an khua Cherhlunah phei chuan hetiang lam buaipuitu bera an neih a ni. Hetianga DTP lam buaipuia hun a hman lai pawh hian Vawk pahnih khat leh ar 10-50 rual hi chu a vulh ve reng tho zel a. A nuin huan enkawl pahin a ran vulhte a enkawl pui bawk thin. A pa H.Hrangchhuma hi zirtirtu a ni a, “Sualna hun nei lo a an tuina lama an buai hi mihring tan a tha a ni” tiin a fapain a tuizawng a luhchilh chu a thlawp tha hle thin a ni.

Hetiang a nih lai pawh hian a tette atanga a chak ber thin farm siam a chakna a reh thei chuang lo a. Amaherawhchu, a chhungte hian a suangtuahnate an man thiam chiah loh avang leh, amah la puitling tawk chiah lo a an ngaih avangin an hnial thin a, chu chuan hun engemawchen chu a kawng zawh tur a ti khailak ve deuh ti pawhin a sawi theih awm e.

Kum 2010 chho atangin puitlin zir turin khaw lian zawk Hnahthial-ah thlalak siamna dawr hawngin a tal hrang chho ve ta a. Hetianga rim taka a eizawnna ber a buaipui lai pawh hian a rilru chhungrilah chuan farm siam chakna a reh thei chuang lo a. A hunawl hlekah chuan farm siam dan tur ruahmanna chi hrang hrang siamin a inchhut buai thei hle tho a ni.

A tuina ber a luhchilh chho ta…

A tawpa tawpah chuan a chhungte rilru pawh a hmin ta a, lungthlu zanin a suangtuah reng thin eizawnna chu a luhchilh thei dawn ta. Kum 2013-ah chuan vawkpui tur a a lak vawk note pathum chu a vulh tan ta a. Kum 2014-ah a pui tur 4 leh a pa, chi thlahtu tur 1 bakah talh tur chi 5 a lei belh leh a. Hetih lai hian amah chu DTP lam buaipuiin Hnahthialah a la awm tho a, a vawk leite chu a chhungten rilru zau tak puin an lo enkawl sak a ni. Hetiang a nih chhoh tak avang hian a eizawnna, DTP lam pawhin a rilru a la hleithei tawh lo a, Hnahthiala a awm leh Cherhluna a awm a inzat nawk zel a ni awm e.

Kum 2015 chhoah an vawkte an lo puitling chho ta bawk a, Cherhlun chhim lam daiah an vawk farm chu an luhchilh ta tak tak a. Hei hi farm ang tak taka bul an tan chhohna chu a ni ta a ni.

Kum 2015 chho vela PRRS avanga Mizorama vawk an tih chum chum lai khan vanneihthlak takin an him hlauh a. Amaherawhchu, an vawkten natna hrik an kai an hlauh em vangin an vawk inah midang kal an phal lo a, hei hian an vawkte hralhna pawh engemawchen chu a nghawng deuh nghe nghe. An vawk vulh chu hemi kum hian nasa takin an pung chho a, vawk in an zauh zel a, vawk 30-50 rual an vulh chho ta a ni.

Related image

Kum 2016 chhoah harsatna tawkin, an vawk engemawzat kawthalo vangin an thi a. Amaherawhchu, PRRS laka an him miau avangin chhiatpui tham lutuk erawh an thi lo hlauh a ni. Hemi kum hian an vawk note engemawzat chu NLUP a sem turin a hlawmin an hralh ve ta a, vawk pawh 50-90 inkar an vulh chho tawh a ni.

Kum 2017-ah an theih ang angin Vawkin an siamtha a, hri leng vanga vawk note hralh a har deuh avanga an duh aia tam an vulhte pawh an hralhchhuak thei tan tawh a. Vawk note mai bakah talh tur pawh engmawzat an hralhchhuak tawh a ni. Hemi kum hian vawkpui 20 leh a pa, chi thlahtu 2 an nei a. Vawk note pawh an pung nasain NLUP a sem atan pawh an la nasa hle. Hemi kum hian vawk 90-130 vel an vulh chho tawh a ni.

Kum 2018 chhung ringawt pawh hian vawk note 200 chuang an nei tawh a, engemawzat neih belh an la in beisei bawk. Vawk note bakah talh chite, vawk laklawh deuhte an hralhchhuak ve reng a, kum 2018 chhung ringawt pawh hian vawk 100 chuang an hralhchhuak tawh a, tuna an vawk vulh mek hi 140 chuang hret a ni bawk.

Chhungkaw tangrual an ni

Vawk vulhah hian an chhungkua an tangrual tha hle. A nu leh pate nen a remchan dan ang angin an inpui a, vawk chawte thlengin an inpek pui a, a farnuten in lam ngaihtuah ngai miah lovin an awl hneh hle bawk.

An Vawk farm awmna hi khua atanga km. 1 vela hla a ni a, zing leh tlaiah vawk chaw pe a an kal bakah chhunah hna hrang hrang thawk turin an kal deuh reng thin. Vawk note neih hun tur dar zat bituk theih a nih bik loh avangin hun leh hun lo a sawi theih loh a, an buai ve hle thin a ni. Kum 2015 chho vel, an duh anga vawk in an la sak theih hma phei kha chuan a vawk enkawl hi vawk chaw chhumna in tha mang lo chhuata buara phah a zan riah mai mai chang a ngah hle a ni.

Youth Commission hotute leh Awardee-te

Miten an hrethiam lo

Changkang taka Computer hmanga kum 10 dawnlai ei a zawn hnua ‘vawk vulh’ a a han inlet leh ta daih mai chu miin mak an ti thin a. Bul a tan chhoh tirh phei chuan mi thenkhat chuan lainatin, an lo khawngaih thin hial a ni awm e, thenkhat lahin an lo nuihzat lek lek reng bawk. Mahse, “Vawk 10 ka vulh a min nuihzattute hian vawk 100 ka vulh hunah chuan min nuihzat tawh lo maithei, min nuihzat tawk an lo awm a nih pawhin an kianga mite chuan min nuihzat vek tawh bik lo ang. Vawk 1000 ka vulh tlin ve theih hlauh phei chuan min nuihzattu la awm fo mah se, midang tan tangkaina ka nei ve thei tawh tho tho ang,” tiin hlim takin a sawi thin. A suangtuahna chu thleng dikin, kum 2018-ah chuan Mizoram Youth Commission chuan Mizoram pum huapa kum 40 hnuailam thalai entawn tlak zingah thlangchhuakin, nasa taka an chawimawi bakah lawmman pawisa fai cheng nuai 1 a dawng ta hial a ni.

Tui harsatna

An farm awmna hi tui a harsa angreng viau a, harsatna an tawk nasa thin hle. Thal lai phei chuan tui lei nan ringawt pawh an inseng nual zel a, vawk a lo tam tak hnu deuh phei chuan harsatna lian tak a tling chho ta a. Chuvangin, farm awmna atanga km. 2.5 vela hla ami tui an la a, an tui lakna hi a hlat tham deuh avangin tui kawng enkawl hi a hautak hle a, tui kawng enfel leh buaipui reng reng a hun hman a ngah hle. Tunah chuan an tui lakna kawng chanve velah khaw chhungah tuizem an siam a, chutah chuan haw khawl tirin, motor hmangin farm lamah an dah phei leh thin. Sorkar lamin ruahmanna siamsak thei se a duhawm hle.

MYC Young Achievers’ Award 2018 hi Mizoram Youth Commission-in thalai, kum 40 hnuailam mi hlawhtling, entawn tlak leh chawimawi tlak zual ni a a hriatte tana chawimawina a siam a ni a. District tinah DC kaihhruaiin Committee din a ni a, he committee hian an district chhung theuha chawimawina dawng tlaka miin an rawtte an lo thlifim a. State Level Committee-ah an thlen leh a ni. Award hi mi 8 hnenah hlan a ni a, award dawngtute chu heng mite hi an ni :

  1. Alinery Lalngilneii Lianhlawng, Sangau (Social Worker/MBA student, University of Sussex, UK)
  2. Dr Benjamin Lalfakmawia, Chhingchhip (Medical PG Student, AIIMS, Delhi)
  3. Dr Krista Roluahpuia, Mualbu (Bombay IITian)
  4. H.Lalengmawia, Cherhlun (Farmer)
  5. Joan Laldinpuii, Lunglei (PhysicallyDisabled – MZU B.Sc Mathematics topper 2018)
  6. Lalchhuanzela, North Chawnpui (Petroleum Geologist)
  7. Lalremsiami, Kolasib (National Hockey Player)
  8. Lalzemawia, Serchhip (Farmer)

2 Comments on "Vawk vulhtu hlawhtling – H.Lalengmawia : MYC Young Achievers’ Awardee, 2018"

  1. A entawntlak hle mai 👍👍👍

  2. A ropui kher mai, a thawhrimna leh taihmakna te Lalpan malsawm zel rawh se

Leave a comment

Your email address will not be published.


*


This site uses Akismet to reduce spam. Learn how your comment data is processed.