THINGS TO LEARN FROM AIZAWL – Armstrong Pame

THINGS TO LEARN FROM AIZAWL – Armstrong Pame

“Tlangchhip a rem tak leh awmze nei taka inrem, he kan thenawm state Mizoram khawpui Aizawl hi ka vawikhat tlawhna a ni a, a mihring chengte nelawm lutuk avang hian ka ngampa nghal siah thei nia…. He khawpuia chengte hi a tu tehrengin nge maw hetiang em em a fai tura lo zirtir bik ni! An kawngpuite chu a zimin mipui an tam ve em em tho, mahse a fai em em tlat! Hei hi India ram khawpui tamtak zinga za a sawmkua pakua (99%)-ahte chuan thil thleng theilo tluk a ni; he khawpuiah hian Sazu leh Thosi han awm vena tur chi awm reng reng a awm lo nia. Khatiang khawpa traffic jam ve nasa si, horn pe bengchheng miah lova thuawih taka awm thei kha khawvel hmun dangah awm ve tak maw…. Hetiang thil hi chu khawvel hmun dang, civilised world chauh a thleng tura ka lo ngaih thin a ni asin mawle!

Zarkawt, Aizawl

Rim taka hna kan thawh zawh hnu hi chuan kan chauh tawh avangin mitin hi kan thin a chhe tawh thin a, kan kawng dala awm reng reng lakah dawhtheihna kan lantir ngai meuh lo niin ka lo hre thin. Mahse, heng Mizote hi chu, hmanhmawh taka tlan laia zebra crossing pawh ni lova miin kawng an lo cross pawhin nui sangin an indawr thei zel nia, hetiang tur hian tuin nge maw lo zirtir bik le (hmun lun lai thenkhatah erawh chuan zebra crossing dah ngei nise a tha zawk maithei).

Aizawl City

Tourist-te hip turin hmunhlui pawimawh leh lar i nei lo a ni maithei..mahse a siamchawp theih tih erawh he hmun atang hian a chiang. Mizote chuan tlang pang hmun rem tak si-ah Solomon’s Temple leh Taj Mahal sak nachang an hre tlat! Tlawh chakawm tak leh tlawh hmanhla tak a ni reng bawk a. Ka theihnghilh theih miah loh tur thil pakhat chu…an world class international stadium-te kha an ni! Tuin nge hetiang tlangramah hian hetiang world class stadium a awm hi beisei teh lul ang? Hetiang stadium hi Aizawlah pahnih ka hmu a, District tin deuhthawah pakhat theuh a awm thu leh a dang pawh siambelh zel tum a nih thu min la hrilh zui (India ram chhunga football stadium hrang hranga Mizo inkhel i hmuh hian mak ti suh).

Rajiv Gandhi Stadium, Mualpui

Amaherawhchu, he khawpui hi lirnghing natna zone a awm a nih miau avangin kei chu ni ila, a chhawng sang zawnga hmasawn erawh ka duh hauh lovang. Aizawl mipuite u, ram in la nei zau tho si a, khawngaihin a sang zawng ni lovin, a zau zawngin hmasawn tum zawk teh u. Satellite towns (khawpui zi mup mup atanga inthiarfihlim a inzarpharh) lamte hi ngaihtuah zawk teh u. Khawpui tawt lutuk a lirnghing vanga chhiatna thleng thei hlau reng reng a awm ai chuan khawpui daifemah, km 10 vel lek han tlan a, fianrial nuam taka thlamuang taka mut siai siai chu a hlu zawk daih asin, a har miah si lo!

Laipuitlang landslide

Tuna Aizawl khawpuia in leh lo sak dan hi chu a hmunhma ngaihtuahin a rit lu deuh vek niin a lang. Aizawl khawpuia ka cham chhung hian mihring thau over pakhatmah ka hmu miah lo! Rihna pung chak lutukte tan pawh Mizote thil ei dan hi entawn atan a duhawm ngawt mai (spices leh oil lam kan cut a hun ta viau). Rei lo teh mah se, tun tum chu zinvahna nuam leh hriatreng tlak a ni chiang e. Aizawla ka zin theih nana min puitute zawng zawng chungah lawmthu ka sawi e.”

He thu ziaktu, kum 2009-a IAS a inziak tling Naga tlangval Armstrong Pame hi a chanchin kan hre tawh maithei. Kum 2013-a a chawrchhuahna Tamenglong District-a Tousem SDO a nih laia sorkar tanpuina tel miah lova km 100 a sei ‘Peoples Road’ an tih mai sialtu, ‘The Miracle Man’ an tih mai, National Media hrang hrangin a chanchin an ziah laih laih kha a ni. A chawrchhuahna division hi IAS a nih hnuah fang lehin, ke ngatin thingtlang khaw 30 chuang a fangchhuak vek a. Thingtlang mite retheih dan chu chiang takin a hmu a, km 50 leka hla an district capital pan tura ke a an kal dante, ration thiara an hah dante, motor kawng a awm miau loh avanga hmunpui lam pan a damlote mau hmanga an zawn dante a tak ngeia a hmuh chuan a rilru a khawih em em a.

Armstrong Pame

Mipuite hnenah chuan eng nge an duh ber tiin a zawt a, anni lah chuan “Kawngpui” an ti mai bawk si. Tichuan, sorkar-ah kawngpui siamna tur a dil a, sorkarin pawisa a neih si loh avang leh mipuite a lainat bawk si avangin social media kaltlangin donation a khawn ta a ni. A hmasa berah ama’n Rs. nuai 5 a thawh a, Delhi-a awm a unaupa in nuai 1, a nuin a pa pension Rs. 5,000/- a thawh ve bawk a. Chung thu chu social media lama a darh hnu chuan ram pawn atangte, India ram hmun hrang hrang atang tein tanpuina a lo lut ta chur chur a, Rs. nuai 40 zet an ngah ta mai a. Chu pawisa chu kawng siam nan em chuan tlem hle mahse, tualchhung contractor-te chu an lei laihna khawl leh road roller-te thawh tura hminin, tualchhung mite hnatlang tha nen kawngpui km 100 zeta sei chu an siam zo thei ta mai a ni.

(Hetiang khawpa chhuanawm IAS Officer hian kum 2016 October thla tawp lam khan Aizawl a rawn tlawh a, Aizawl leh a chhungte chengte a hmuh dan ngaihnawm tak facebook lamah a tarlang bawk a, a ropui em avangin a ma phalna ngeiin Mizo tawngin kan han tarlang a ni)

3 Comments on "THINGS TO LEARN FROM AIZAWL – Armstrong Pame"

  1. Tha hle mai, mi ngaihsan awm tak ani Mr. Armstrong hi.

  2. Thawnglianthanga | November 23, 2018 at 11:34 pm | Reply

    Hills gate hian ka nunkawng chhiar zelna turah min va tanpui thin teh reng em??

  3. He pa hi chu a chhuanawm takzet a ni. I-day ah pawh khuallianin an hmang a, ruah a sur avangin nihliap va khumtir an tum pawh khan lo hnawlin naupangte pawhin an do chuan, “Kei pawn ka do ve tur a ni” ti ngat mihring kha a ni a, ka ngaisang takzet a ni.

Leave a comment

Your email address will not be published.


*


This site uses Akismet to reduce spam. Learn how your comment data is processed.