Thalai loneitu hlawhtling : LALZEMAWIA, Serchhip (MYC Young Achievers’ Awardee, 2018)

Lalzemawia hi ni 6/12/1978 khan Pu Vanmalsawma leh Pi Lalvuli, Serchhip Dinthar a awmte fa u ber niin a lo piang a, chhungkaw harsa leh khawsak harsa ve tak atanga lo piangin, unau mipa pakhat leh hmeichhia pahnih a nei a ni.

Zirna lamah chhuan tur a nei lo

Zirna lamah chuan pawl sarih (7) a pass a, sikul a kal chhung hian a nu leh pate kut hnathawka eizawng an nih avangin hnathawh pawh a pui nasa hle thin a ni. Tleirawl sualte han nei ve zeuhin, a sikul kal chu chawlhsanin ram lam hna a thawk ta a. Kum 1996-ah Vanlalmawii nen an innei a, an inneih atanga rei lo teah an in dang a, chhungkaw harsa tak an nih avangin engmah nei lo leh inhlawh chawpin in hrang an chang ve a ni.

 

Mat phaiah bul a tan, a hlawhtling mai lo!

Mi hnuaia inhlawh ringawt chu chhungkua intun nun nan a har dawn ema a hriat avangin kum 1997 khan Zawlpui mat phaiah mi ram hawhin nul (zikhlum, antam etc.,) hmun siamin bul an tan a; mahse, hemi kum hian an thlai chin zinga an inghahna ber zikhlum chu an seng hmain tui lianin tibuaiin an thlai chu an seng thei lova, an hawhchham chiang hle a ni. Chutia an hlawhchham takah chuan mi hnuaiah hun eng emaw chen chu inhlawh bawkin an khawsa leh a, kum 2000 chho atangin Zawlpui mat phaiah bawk a hlawhchham tawhna bei nawn leh turin a lut leh a; hemi kum atang hian hma sawn cho hret hretin Pathian malsawmna an dawng tam tial tial a, an thlai hmun siam pawh zau zawkin hma an la ta zel a ni.

Thlai chi hrang hrang ching chho zelin an thlai tharte chu zawlpui mat phai atangin Em (dawrawn tin 3 dawng)-a phurin Serchhip bazar-ah an hralh thin a; chutianga hun eng emaw chen an inphurh hnuin ramte a lo changkang zel a, lirtheite a lo tam ta a, mi motor man chawia hmangin an inphur chhuak ve ta thin a ni.

Thlai hralhnain in a sa, huan ram bakah motor a lei ta zel…

Kum 2003 a  lo inher chhuah chuan in hmun leh nul ram, bigha 12-a zau chu an thlai thar atanga a lo inkhawl ve chuan a lei a, theihtawp chhuah lehin kum 2005-ah inhmun lei lehin Assam type In a sa a, kum 2008-ah nul ram bigha 12-a zau chu Pathian malsawmna an dawn atangin an lei leh a ni. Tichuan, an thlai tharte lo pung zelin; an thawh chhuah atangin Power Tiller chu an hnathawh nan tiin an nei ve ta a, chumi hnuah thlai thar phur chhuah nan tiin Maruti Van secondhand chu an nei ve leh a, an tangkaipui hle bawk.

A thawhchhuah ngeia a lei motor hmangin an thlai tharte an phurchhuak a….

Zau zawka hma la lehin an thlai tharte a lo pun ve zel takah chuan Maruti van chu hralhin 207 Pick Up, a thar hlak chu mamawhnate a lo san takah chuan Pathian malsawmnain an lei ve leh a; chuta tang chuan an thlai tharte chu Mizoram hmun hrang hrangah an sem kual ta thin a ni. Pathian malsawmnate dawng zelin, kum 2016-ah chuan an thlai thar an hralhna atangin RCC in an sa a, an eizawnna hmasawn zel an tiin an ram neih sa bakah, mat phaiah bawk chuan ram zau mai bigha 18-a zau Rs. 350,000 (3.5 lakhs) man chu kum 2007 khan an lei belh leh a; hei hian an eizawnna te a lo ngelngheh zawk nan a puih a beisei hle a, tunah chuan chhungkaw mamawha hman atan tiin Car leh Scooty-te an nei ve ta hial a ni.

Huan thlai hralhna man atangin Car tha tak a lei ve tawh a…

An thlai chin thinte chu Bawkbawn, Zikhlum, Antam, Hmarchapui, Tomato, Broccoli, Radish, Dania, Purun sen, Anthur, Bean leh Channa-te a ni a; heng bakah hian ser huan nimbu tin khat leh chanve hmuna zau an nei bawk. Pu Lalzemawia leh Pi Vanlalmawii te hian fa duhawm tak tak pathum C. Lalremruata, Esther Laltlanhlui leh Lalhmangaihsanga-te an nei a ni.

Engmah nei lo a bul tan khan kum 40 a nih meuh chuan rim taka an thawhchhuah, an thlai thar hralhna atangin chenna tur in nuam tak an sa thei ta!

Chawimawi tlak a ni

Kum 2003 khan Serchhip Block-ah Farmer hlawhtling chawimawina 1st price cheng 10,000 leh certificate, Agriculture Technology Management Agency (ATMA)-in an pe a; kum 2016-ah Indian Farmer Fertilizers Co-Operatve (IFFCO) chuan Golden Jubilee Award chu dawng tur an tih avangin Aizawlah hlan a ni leh a, kum 2017-ah Best Horticulture Farmer, Serchhip Divison Award chu a dawng bawk. Tunah Mizoram Youth Commission buatsaih MYC Young Achievers’ Award, 2018 chu a dawng leh ta a ni.

Lalzemawia leh Mizoram Youth Commission Chairman Joseph Lalhimpuia, MLA

MYC Young Achievers’ Award 2018 hi Mizoram Youth Commission-in thalai, kum 40 hnuailam mi hlawhtling, entawn tlak leh chawimawi tlak zual ni a a hriatte tana chawimawina a siam a ni a. District tinah DC kaihhruaiin Committee din a ni a, he committee hian an district chhung theuha chawimawina dawng tlaka miin an rawtte an lo thlifim a. State Level Committee-ah an thlen leh a ni. Award hi mi 8 hnenah hlan a ni a, award dawngtute chu heng mite hi an ni :

  1. Alinery Lalngilneii Lianhlawng, Sangau (Social Worker/MBA student, University of Sussex, UK)
  2. Dr Benjamin Lalfakmawia, Chhingchhip (Medical PG Student, AIIMS, Delhi)
  3. Dr Krista Roluahpuia, Mualbu (Bombay IITian)
  4. H.Lalengmawia, Cherhlun (Farmer)
  5. Joan Laldinpuii, Lunglei (PhysicallyDisabled – MZU B.Sc Mathematics topper 2018)
  6. Lalchhuanzela, North Chawnpui (Petroleum Geologist)
  7. Lalremsiami, Kolasib (National Hockey Player)
  8. Lalzemawia, Serchhip (Farmer)

1 Comment on "Thalai loneitu hlawhtling : LALZEMAWIA, Serchhip (MYC Young Achievers’ Awardee, 2018)"

  1. a va entawn tlak em

Leave a Reply

This site uses Akismet to reduce spam. Learn how your comment data is processed.

%d bloggers like this: