Retheihna paltlangtu – Lalchhuanzela, Petroleum Geologist (MYC Young Achievers’ Awardee, 2018)

Lalchhuanzela hi Pu Lalengzaua leh Pi Lalzamliani-te fa paruk zinga naupang ber dawttu niin kum 1994 October 14 khan North Chawnpui, Kolasib District-ah a lo piang a. A pianna khua North Chawnpui hi Kolasib District hmar thlanga lama awm niin, in 70 vel awmna khua a ni.

North Chawnpui-ah hian Primary School leh Middle School a zir chhuak a, naupang lehkha thiam thei tia a sawi tur ni lo mah se, class I – VII thleng hi pakhatna a nih loh pawhin top-3 ahte a lang chho ve char char thin. Class VII (khatih lai kha chuan Board Exam a la ni)-ah phei chuan an centre pumpuiah pahnihna a ni ve ngat a ni.

Aizawl an risk! Pawl 8 zir chungin in a luah ve…

Naupang lehkha zir mi tak a nih laiin an chhungkua an harsa ve hle mai si a, an buai ve thin hle. Pawl 7 a pass hnu hian an khuaah High School a awm ve loh avangin zir chhunzawmna tur an buai hle a. An zirtirtute thurawn anga Aizawl lama zir chhunzawm ve ngei a duh bawk si avangin admission tihna tur leh uniform/zirlaibu leina tur pawh engmah nei lovin, Zawngtah zawrh chawp tur kengin a nu nen Aizawl an pan ta tawp mai a. A u pasal nei tawh, Bawngkawna awm bel turin an rawn kawhchhuak ve tawp mai a ni.

Aizawlah pawh hian school tha a kal chu hisap pha lovin, fee chawi ngai lo a kalna tur an zawng ta tawp a, Govt. Bawngkawn High School-ah admission an ti ve ta thawr mai a ni. An belh tum ber a u pasal nei tawh lah la indang lo, a mo-na a la awm mai a nih bawk si avangin mahni inkhawr hran ve a ngai si a, Bawngkawn Lunglei road-ah in Rs. 500/- man luah vein, a nuin kar khat vel a awmpui hnuah a hawsan ta a.  Hetih lai hian kum 13 mi lek a ni a, eirawngbawlna gas-te nei zo hek lo, khawnvartui hmang chi stove nena inchhawpin, Aizawl khawpuiah amah chauhin nun bul a tan chho ta mai a ni.

Amah lehkha a lo zir mi fe reuh a, pawl 8 a zir chhung hian term exam apiangah pakhatna a ni chho ta zel a, a nungchang a lo tha reuh bawk si nen an zirtirtute hriat leh duhsak pawh a hlawh hle a. Chhungkaw harsata avang leh a nu dam loh avanga thla 2 vel zirna chhunzawm thei lo a a awm hnuah pawh an zirtirtute hian hrethiamin, final exam a hmachhawn an remtih sak zel a. Thla 2 vel zirna chawlhsan e ti lovin, a ni lah chu pakhatna a rawn ni ve leh mai bawk a..!

Chaw ei tur a nei lo zeuh zeuh thin

Aizawla Rs. 500/- man in luah chuan hautak lutuk lo a inchawm ve theih nawk nawk tur angin lang mah se, a ni naupang kum 13 mi lek tan chuan harsa tak a ni. In lam atangin tanpuina a lo thleng hleithei bik si lo a, a u pasal nei tawh, a pasal taxi driver-te chuan pui ve thin mah se, inpuih reng sen ni hek lo, chaw chhum tur neih loh vanga chaw nghei changte pawh a nei chho ta zauh zauh mai a ni.

School kalna rothap

Kum 2007-ah pawl 9 a zir chhoh dawn laiin a belh ve ber, a u pasal nei tawh chu, a pasal taxi driver-in accident-in a boral san leh ta hlauh mai a. Amah hnathawk tak tak thei rual la ni bawk si lo, innghahna tur awm ta ngang lo chu an khua North Chawnpuiah a haw leh ta hnak hnak mai a. Zirna chhunzawm thei tawh lo tura a in ngaih laiin an khua atanga km 14 vela awm Bilkhawthlir a an chhungte la hnaivai deuh takin an khawngaih a, admission leh thildang mamawhte tumsakin, Bilkhawthlir High School-ah chuan zirna chu a chhunzawm ve leh thei ta hlauh a. Mahse, an khua North Chawnpui atang chuan km 14 vel zeta hla a nih miau avangin a namai lo hle. Amaherawhchu, Zela chu a zam duh mai bik lo a, nitin darkar 2 vel ramhnuaiah mahni a kalin, pawl 9 chu a zir zo ve leh ta hram a.

A kum lehah pawl 10 chu a lo kal tlangnel ve zuai tawhna Bawngkawn High School lamah a han chhunzawm leh ta a. Mahse, a zir laklawh laiin chhungkaw harsatna avang bawkin an khaw lama haw a ngai leh ta a. A school chawlh tur thu leh transfer certificate a mamawh dante a han sawi chuan an Science zirtirtu nu, Miss Vuli chuan a lo remti ta hauh lo mai a. An ina awmpui atan sawmin, an ni chhungkua chu a bel ta rawih mai a. Hetianga mi chhungkua a bel chung hian hunawl remchang ang angte chu tangkai taka hman tumin, a remchang apiangah inhlawhin a mamawh a tuak ve reng a. Chawhmehte zuar lawp lawpin, Matric a zir atanga Master Degree a zawh thlengin a inhlawh tluan ve zak a ni.

Retheihna avangin Doctor a zir thei lo, college kalna tur tuakin vawk a vulh

Matric second division-a a pass hnuah kum 2012 khan HSSLC Science chu Second Div-ah tho a pass leh a. Doctor nih tum ber mah se, chhungkaw harsatna avangin a zir thei ta si lo a. Technical Entrance-ah pawh a ti tha pawl tak ni mah se, zirna man turah a buai miau si avangin a kal thei ta lo a. Student loan-te lak tumin nasa takin a bei a, a hlawhchham thak hnuah kum 2012-ah college kalna tur nei tawh ngang lovin beidawng takin an khaw lamah a haw thla leh ta a ni.

Hetia an khaw lama a haw thla leh ta hi vawk vulin a intuak ta ngat ngat mai a. Kum khat zet vawk a vulh hnuah kum 2013-ah chuan Pachhunga University College-ah B.Sc (Geology) a zir chhunzawm thei ta a. Hetia college a kal pah hian High School leh Higher Secondary School-ah Warden cum Teacher hna  a thawk pah reng bawk a, hetiang a lehkha zir chho hian kum 2016 khan B.Sc chu First Class-ah a pass ve ta a ni.

Chawimawina a dawng

College a kal chhung hian lehkha zir paha a mah a inchawm theih avang leh a chhungte a puih ve zeuh zeuh theih avangin zirlai mahni intodelh tum pawl, Students’ Self-Suppoort Union (SSU), Gen. Headquarters chuan zirlai ni chunga mahni intodelhte chawimawina, Self-Support Award 2015 an hlan a (he award hi SSU hian kumtin a pe thin). He chawimawina hian certificate leh pawisa fai Rs. 10,000/- a keng tel nghe nghe. Hemi kum vek hian Progressive Mizo Society (PROMISE) pawhin chawimawi tlaka ngaiin ‘Amazing Mizo Award 2015’ an hlan bawk.

Master Degree zir turin a phar buai leh ta!

Master degree zir zawmna turah pawh a buai hle a, phai lam University tha a luh ve ngei a duh rualin a chhungte erawh chuan inhlawhna zawng tawh mai turin thurawn an lo pe ve reng bawk a. A nu leh pa atanga tanpuina beisei tur a awm chuan loh avangin senso hautak si lo, University tha bawk si a zawng nasa hle. Bhubaneswar lamah chhuk rawihin Mizoram University lam result chhuah tlai avangin a admission dilna an lo reject a, beisei nei taka thla khat leh a chanve vel a zu awm ren rawn hnuah beidawngin a lo haw leh ta a ni.

Hetiang a nih mek lai hian Gujarat lama Master of Petroleum Geology zir turin, MS University of Baroda lama entrance a peknaah seat a hmu leh hlauh a. Zirna senso-ah cheng nuai 3 vel a ngaih si avangin a buai hle a, admission ti turin an rawn call tlut tlut tawh si! B.Sc a zir ve laia a sum khawl tlemte leh a ute, an Miss te, a awmnate puihnate sawmkhawmin Gujarat chu a pan ve ta rawih a. Thianthate inah invawm lutin, kum khatna chu engtin tin emaw tha takin a zo ve ta mai a.

Lehkha zir kar lak a Mizoram a lo chuan chhuah chang chuan a nu leh pate a theih ang angin a pui ve thin

Student Loan a la thei lo..

A kum leh a zirna tur a neih tak si lohah chuan Mizoram lamah student loan lak tumin lehkha pawimawhte kengin a lo haw a. SBI lamah rei ngial a beih hnuah an pek theih tak ngang si loh avangin a mangangin Chief Minister Office a pan ta rawih a. Pi Duhawmi Chawngthu (PS to Principal Secretary to CM) a han pur ta rawih a. Pi Duhawmi chu a guarantor-ah lo tang thei hlauhin, MUCO Bank, Zarkawt atangin Personal Loan a mamawh ang zat chu a zir chhuah ruala rulh leh nghal turin an la thei ta hram a ni.

Zofate zinga Master of Petroleum Geology hmasa ber a ni ta!

Tichuan, Gujarat lamah bawk chhuk thla lehin zirna a chhunzawm thei leh ta a, a sum zawng buai vel avangin thla khat leh a chanve emaw velin a tlai phah nghe nghe. Master of Petroleum Geology chu kum 2018-ah Zofate zinga hmasa ber ni turin a zir zo ve thei ta a ni. Master Degree a zir zawh rual hian Dubai Oil Company leh Canada lamahte thawhna tur hmu nghal mah se, engemaw rokhawlhna avangin a kal thei ta lo a. Mizoram sorkar lamah thawhna tur a awm a a hriat avangin beiseina sang tak nen a lo haw a. Directorate of Geology and Mineral Resources lamah lut thei mai tura a in ngaih laiin Recruitment Rules (RR) an lo ti danglam hman a. A post ni thei tura a ngaih Exploratory Geologist (Oil leh Gas zawngtu/laichhuaktu) tur post chu Joint Director level a an lo leh tak daih si avangin a hlawhtling leh thei ta lo a. Gujarat lamah, Gujarat State Petroleum Corporation Ltd. lama thawk turin a chhuk leh ta rih a ni.

Imperial College, London, UK leh Sultan Qaboo’s University, Muscat, Oman-ahte pawh Research/Ph.D ti tura offer hmuin, research tih zawm leh chu a chak hle a, mahse, a loan rulh tur lamin a tih buai tawh bawk si avangin hnathawh a ngai ta rih a. Hun remchang hmasa a research tih zawm leh theih erawh a la inbeisei hle a ni.

Hnu kharna

Harsatna chi hrang hrang leh retheihna-ten hual vel reng mah se, Pathiana innghat tlat mi, Pathian tih tlat mi a nih avangin heng harsatnate hi a paltlang zel a. “Lalpa a kan innghah tlat a, amah kan rin tlat a, a duh zawnga kan awm chuan kan duhnate pawh min hriatpui ve a ni” tiin a sawi thin. Bible chang, Sam 37:5 “I awm dan tur chu Lalpa chungah nghat la, Amah chu ring la, aman a ti vek ang” tihah hian a in nghat tlat thin a ni.

Gujarat-a lehkha zira a awm chhung hian harsatna a tawk nasa ve thin hle a. Zirlai pawlahte pawh theih ang anga inhmangin Gujarat MZP-ah Vice President nihna a chelh ve a ni. Tin, Gujarat-a a awm chhung hian Pu Lalnunmawia Chuaungo, IAS chuan a pui nasa hle a, an chhungkaw chungah hian a lawm hle. Damdawiin a thichhawnga a awm laia a mah buaipuitu an hotupa Jehova te, an zirpuite chungah pawh a lawm hle a. Tin, a zirna kwng hrang hranga amah pui tawhtute chu ‘a let tamtakin Pathianin malsawm rawh se’ tih chu a tawngtaina a ni.

MYC Young Achievers’ Award 2018 dawngtute leh MYC Chairman Joseph Lalhimpuia, MLA

MYC Young Achievers’ Award 2018 hi Mizoram Youth Commission-in thalai, kum 40 hnuailam mi hlawhtling, entawn tlak leh chawimawi tlak zual ni a a hriatte tana chawimawina a siam a ni a. District tinah DC kaihhruaiin Committee din a ni a, he committee hian an district chhung theuha chawimawina dawng tlaka miin an rawtte an lo thlifim a. State Level Committee-ah an thlen leh a ni. Award hi mi 8 hnenah hlan a ni a, award dawngtute chu heng mite hi an ni :

  1. Alinery Lalngilneii Lianhlawng, Sangau (Social Worker/MBA student, University of Sussex, UK)
  2. Dr Benjamin Lalfakmawia, Chhingchhip (Medical PG Student, AIIMS, Delhi)
  3. Dr Krista Roluahpuia, Mualbu (Bombay IITian)
  4. H.Lalengmawia, Cherhlun (Farmer)
  5. Joan Laldinpuii, Lunglei (PhysicallyDisabled – MZU B.Sc Mathematics topper 2018)
  6. Lalchhuanzela, North Chawnpui (Petroleum Geologist)
  7. Lalremsiami, Kolasib (National Hockey Player)
  8. Lalzemawia, Serchhip (Farmer)

 

4 Comments on "Retheihna paltlangtu – Lalchhuanzela, Petroleum Geologist (MYC Young Achievers’ Awardee, 2018)"

  1. Ka van ngaisang tak em.. Lalpan malsawm zel rawh se

  2. Ka u ka chhuang takzet che👍

  3. A va pui ve le… Ngaihsanawm kher mai.

  4. Mi Tumruh Leh Huaisen Zela. Ka ngaisang takzet che

Leave a Reply

This site uses Akismet to reduce spam. Learn how your comment data is processed.

%d bloggers like this: