MYC Young Achievers’ Awardee (2018) : Alinery Lalngilneii Lianhlawng

Alinery hi Pu L. Hmunlal (L) leh Pi C. Lalengmawii-te fa naupang ber niin Sangau, Lawngtlai district-a piang leh seilian a ni a. Tunah hian University of Sussex, United Kingdom-ah M.Sc Master of Business Administration a zir mek a, Sussex University hi Development Studies-ah World Number 1 ranking nei lai a ni. Heta a zir dawn hian Development Studies telin course 3 a  apply-a, a tling vek a, Social Entreprenuership & Innovation, Leadership leh Development lam hi a tuina a nih avangin hemi base deuha course duan, MBA hi thlangin tunah hian London, United Kingdom-ah a khawsa mek a ni.

Alinery hi naupan lai atanga lehkha thiam thei tak a ni a, Pawl 1-9 (1996-2005) hi Sangau-ah kalin, Pawl 1 atanga Pawl 9 a zir chhung zawng hian an pawlah pakhatna  a ni char char a, first division chunglamah zel a pass a ni. High school a luh tan tirh, Pawl 8 a zir kum hian Sangau RD Block hnuaia Talented exam buatsaihah Sangau RD Block hnuaia High School awm zawng zawng, English leh Mizo Medium-a kalte intihsiaknaah a thiam 3 thlan chhuah zingah a tel leh a, High School a kalchhung zawng hian scholarship a hmu a ni. Pawl sawm (2006-07) hi DM Higher Secondary School, Lungleiah kalin High School Board exam-ah an sikul atanga ti tha ber niin Distinction-ah a pass a, Letter a dawng nual bawk. Pawl 11 leh 12 (2007-09) hi Gov’t Mizo Higher Secondary School-ah kalin  Science a la a, vanduaithlak takin Pawl 12 a zzir kum hian mit lamah harsatna a neih avangin a fail ve hlauh mai a; mahse, hemi kum veka Special Exam-ah khan Mizoram pumah parukna a ni leh ta tho a ni.

Pawl 12 a pass hnu hian Asian University for Women (AUW), Chittagong, Bangladesh-a zir turin entrance exam-ah a  inziak tling ve a, India ram quota a zir tur mi 6 thlan zingah telin full scholarship a hmu bawk.

AUW  hi Asia ram hrang hrang 20 vela atanga hmeichhia leadership potential nei tha leh lehkhathiam rual thlanchhuahte kal khawmna hmun a ni a. Student tin tan scholarship tih a niin a tam zawkte hian merit scholarship an hmu a, Alinery pawh hi Abbott Pharmacy, American Worldwide Healthcare Company scholar-te zinga mi a ni a, anni hnen atang hian zirna senso zawng zawng kum tin USD 12,000-15,000 (Rs. 9-10 lakhs) a hmu thin. He laiah hian thil harsa ve tak a awm a, an scholarship maintain tur hian an exam reng rengah 80% chunglam zel an hmuh a ngai a, kum 5 chhung hian Pathian zarah 80% chung lamah zel semester tinah a hmu thei a ni. An zirna hi American-style Liberal Arts based, Havard Curriculum anga an zir avangin an zir chhung hi kum 5 (2010-2015) a ni. Tuna MBA a zirna pawh hi Young Female Leader-te tana ruat merit AUW-Sussex Einhorn-Oestriecher Scholarship hmu a zir a ni.

Hnathawh mek

Zirlai ni chungin social enterprise NGO-ah nasa taka inhmangin High School thleng a zirna hmun Sangau-ah Library dinin lehkhabu leh computer/laptop-te zirlai naupangte tan a chhawpchhuah sak a, Aizawl, Champhai leh India ram hmun dangah he project hi an zauh mek zel a ni. Sangau local medium-a High School thleng zir ni mah se, a tumruhna leh taihmaknain a hruai thui hle a; college undergraduate a zirna senso zawng zawng leh tuna Master a zirna pawh hi merit scholarship niin, full funding a hmu a ni.

Pu Zothan Khuma, Secretary, Mizoram Youth Commission-in chawimawina trophy leh cheque (cheng nuai 1) a hlan

International Conference leh internship-te UN, JICA Japan, EXIM Bank- South Korea, Hong Kong, China leh Europe hmun hrang hrangah thla tin deuh thaw kal chhuakin, University of Oxford-a professor leh zirlaite nen social project an ti ho mek zel a. Heng a experience leh a thiamnate hi midangte tan pe chhawng a, chhawp chhuak reng duh mi a nih avangin NGO a din Rochun: Pay it Forward (For Education) tih a kal chhoh pui mek a. Rochun hian component pahnih neiin Library sak chhoh zel leh Leadership Academy and Consultation a zirlai leh thalai tam zawkten India ram pawnah lehkha an zir theih dan tur leh funding an hmuh dan turte, conference kal dan, career guidance leh hmasawnna kawng inhrilh hriatna, Mizoram thalaite khawvel thlirna zauh a, pen chhuak ve thei tura hma lakpui turin theihtawp a chhuah mek a ni.

Zawhna zawt a, hrechiang duh tan Facebook leh Istagram-ah Rochun: Pay it Forward tiin a zawn hmuh theih a, amah be tlang duh tan pawh inhuam rengin, “Lehkha zir nen buai viau mah ila, ni khatah pakhat tal zawhna chhan a tul chuan call/msg hmang emawa tanpui turin ka inhuam a, ka ti chho mek a ni,” a ti.

MYC Young Achievers’ Award 2018 hi Mizoram Youth Commission-in thalai, kum 40 hnuailam mi hlawhtling, entawn tlak leh chawimawi tlak zual ni a a hriatte tana chawimawina a siam a ni a. District tinah DC kaihhruaiin Committee din a ni a, he committee hian an district chhung theuha chawimawina dawng tlaka miin an rawtte an lo thlifim a. State Level Committee-ah an thlen leh a ni. Award hi mi 8 hnenah hlan a ni a, award dawngtute chu heng mite hi an ni :

  1. Alinery Lalngilneii Lianhlawng, Sangau (Social Worker/MBA student, University of Sussex, UK)
  2. Dr Benjamin Lalfakmawia, Chhingchhip (Medical PG Student, AIIMS, Delhi)
  3. Dr Krista Roluahpuia, Mualbu (Bombay IITian)
  4. H.Lalengmawia, Cherhlun (Farmer)
  5. Joan Laldinpuii, Lunglei (PhysicallyDisabled – MZU B.Sc Mathematics topper 2018)
  6. Lalchhuanzela, North Chawnpui (Petroleum Geologist)
  7. Lalremsiami, Kolasib (National Hockey Player)
  8. Lalzemawia, Serchhip (Farmer)

1 Comment on "MYC Young Achievers’ Awardee (2018) : Alinery Lalngilneii Lianhlawng"

  1. 👍👍👍
    Ka ngaisang hle mai

Leave a Reply

This site uses Akismet to reduce spam. Learn how your comment data is processed.

%d bloggers like this: