MiMIR Project hmanga cheng nuai 100 dawng tur khaw 6 thlan fel a ni tawh

Planning Department, Mizoram Sawrkar buatsaih – My Project, My NEDP – Mipui Mamawh Intawm Ruahmanna (MiMIR), New Economic Development Policy (NEDP) hnuaia District hrang hranga neih chu  a hmawr bawk chhoh mek zel a ni a. He intihsiaknaah hian Mizoram chhunga Village Council leh Local Council hrang hrangten khawtlang hmasawnna tur project concept paper an insiam siak a. Chu chu Planning Department lamin tehna tur fel tak an siamsa hmangin endik an ni.

Lunglei District-ah powerpoint presentation hmanga inelna neih a ni

Heng Concept paper-te endik tur hian District hrang hrangah District MiMIR Committee din a ni a. He committee-ah hian DC Chairman-na hnuaiah SDO (Sadar) chu member Secretary a ni a, member dangte chu (i) Engineering Department (PWD, P&E, PHE) aiawh mi pakhat ṭheuh. (ii) District Research Officer (Economics & Statistics. (iii) DUDO (UD&PA). (iv) DLAO (LAD) (v) DRDO (RD) (vi) DFO (EF&CC) (vii) SDEO (School Education) (viii) District chhunga mi thiam bik leh mi challang 3 (prominent citizens)-te an ni.

Heng project-te hi tehfung hrang hrang heng- Innovation, Sustainability, Community participation, Livelihood generation, Benefit to public, Presentation & Plan preparation etc te hmangin mark pek an ni a, District tina mark hmu sang ber, pakhatna theuh hian an project tihhlawhtlin nan cheng vaibelchhe khat (nuai 100) an dawng dawn a ni. Project tha ber thlan chhuahte hi a kaihhnawih Department-ten uluk takin Detail Project Report an siam sak leh ang a, thuneitu sang zawkah thehluh leh a ni ang a, pawisa hi September thla chhung hian pekchhuah hman tum a ni.

Project thlan dan Criteria:-
(i) Project hi mipuite mamawh inṭawm leh mipui harsatna bik sutkiang thei, ‘community asset’ a ni tur a ni a.
(ii) Project hi peng te te a in then loa hlawm lian pakhat a nih chuan ngaih pawimawh zawk a ni ang.
(iii) Project tih na khuaah hmasawnna nasa tak thlen thei tur a ni.
(iv) Eizawnna ngial nghet siam thei Project ngaihpawimawh a ni ang.
(v) Project atan hian ram mamawh khawtlangin a nei sa tur a ni a, Project atangin ram lei theih a ni lo ang a, Sorkarin ram a lei thei lo bawk ang.
(vi) Project hian Sorkar tan recurring cost a siam tur a ni lo.
(vii) Innovative Project, thil thar la chin ngai loh thil chu naihhlut zual a ni ang

A hnuaiah hian District hrang hrang result chiang zawka tarlan a ni a, hun ruat lawk chhunga District 6-ten an zawhfel vek theih laiin he thu buatsaih lai thleng hian Lawngtlai leh Siaha District-ten an la zo fel ve lo a. Lawngtlai District hian August 10-ah top 20 an thlang ang a, August 17-ah final selection neih theih an inbeisei a. Siaha District hi DC leh Official pawimawhte training neia an la buai rih avangin an la final thei lo bawk a, amaherawhchu,  final mai theih turin DC kutah file a awm vek tawh niin Hillsgate chuan thu a dawng a ni.

Winners List

%d bloggers like this: