MIMER, Falkawn-a MBBS zir man Rs. 80,550/-, Hostel Fee Rs. 17,700/- TOTAL – Rs.98,250/-

June 11, 2018 chawhnu khan Chief Minister Lal Thanhawla kaihhruaiin Chief Minister’s Office Cabinet Room-ah MIMER chungchanga thu pawimawh hrang hrang sawiho a ni. Health Minister Lal Thanzara; Advisor to CM RL Rinawma; Commissioner and Secretary for Health Dept. Lalrinliana Fanai bakah Health & Family Welfare Department hotulu dangte, MIMER leh P&E Department hotute an tel a ni.

Chief Minister chuan MIMER tihlawhtling tura Health Department bakah a kaihhnawih Department hrang hrang te leh a bika thawktu tura ruatte hmalakna len thawhhona that avanga thui tak kan thleng tawh a ni, a ti a. MCI chu an duh ulukin, sawi lawk loin enfiah tura a an rawn inlan thut thin a, bawhzui turte bawhzui zelin Ministry lam atanga lehkha pawimawh hmuh tur angte pawh hmuh a nih  tawh avangin a lawmawm hle a ni a ti. Chutihrual chuan MIMER chu medical college tha leh changtlung taka siam tum a nih avangin hmabak la awm ang angte chu chak leh uluk taka bawhzui tul a tih thu a sawi a  ni. Hetih lai hian MIMER Director chu inrelbawlna tha zawk a awm theih nana zau zawka thuneihna pek a ni leh DDO a ni tel ta bawk chu lawmawm a tih thu a sawi bawk.

Meeting-ah hian thawktu indaihlohna tlem la awmte, hospital leh thawktu chenna quarter leh hostel a kawlphetha pek chungchang te, hostel leh staff quarter siamthat leh furniture lei chungchang te, security, admission leh fee chungchang bakah First Renewal Inspection, kumin kum tawp a hmachhawn tura beisei atana inpuahchahna kaihhnawih thilte sawiho a ni.

 

MIMER ah hian seat 100 kum khatah zirlai thar tan awm tura  ruahman niin, hetatang hian State chuan 70% changin, Central leh NRI zirlai te tan 15% ve ve dah a ni a. NRI quota hi hnawhkhat zo NRI atanga an awm loh chuan State kutah a dah theih a ni. Admission hi NEET exam kaltlanga tih tur niin, Higher & Technical Education Department chuan Mizoram Quota zirlaite tan Online Counselling a buatsaih dawn bawk.

MIMER a lut turte fee chawi zat tur chu kum khatah Rs. 80,550/- niin, Hostel fee Rs.17,700/- nen a vaiin  kum khatah Rs.98,250/- a ni dawn a ni.

%d bloggers like this: