INTHLAN THLIRVELNA : 2013 ELECTION-A AN CHAKNA ZAT

Mizoram MLA General Election 2018 a hnai tual tual a, official candidate pawh a tam zawh chu puanfel a ni ta! Hetiang a nih mek lai hian chak ber tur inrinsiakna a nasa em em a, ram tana tha ber tur pawh hriatthiam a har hle.

Kum 2018 election thlirlawk tur chuan election hnuhnung ber, 2013 election chungchang engemawchen hriat ve a ngai a. Chuvangin, 2013 election a chak ta MLA-te chakna theuh pawh hriat ve a ngai a  ni.

Mizoram MLA Election hnuhnung ber kha November 24, 2013-ah neih niin Congress leh ZNP an mal din a, MNF, MPC leh MDF-te chu an thawk ho thung. December 8-ah vote chhiar a ni a, result puan nghal a ni. Beisei phak bakin Congress an che tha a, MLA 34 an nei a, MNF-in MLA 5 neiin MPC-in pakhat an nei bawk. INC hian MLA 40-ah 34 neiin hneh takin sorkarna an siam a ni satliah lo a, vote tla zawng zawng atanga 44.63% hmuin anmahni hnaih bertu MNF hian 28.65% chauh an hmuh phak avangin hnehna nasa tak tih loh rual a ni lo.

Congress party candidate thenkhatte phei chuan an khingpuite hi vote sang telin an hneh a. Inhnehna nasa ber chu Tuichawng bialah thlengin INC Candidate BD Chakma chuan a khingpui MNF candidate RM Chakma chu vote 8726 zetin a hneh a. An inhnehna zat, vote 8726 hmu pha hi Mizoram pumah MLA pahnih chiah an awm a ni. Tin, Tuichawng constituency hi 2013 election a Mizoram a vote tamna ber a ni hrim hrim a, vote 26278 zet awmin, heng candidate pahnihte bakah hian BJP candidate, vote 374 chauh hmutu Victor Talukdar chiah a awm avangin Congress leh MNF candidate khian vote an insem deuh vek hrim hrim bawk.

MLA atana thlan tlinte zinga chakna hniam ber chu Tuikum Constituency atanga  thlan tlin, MNF candidate  Er. Lalrinawma a ni a, a ni hian a khingpui K.Lianzuala INC candidate hi vote 14 in a hneh a. Lunglei West-ah Chalrosanga, INC candidate chuan a khingpui Dr. R.Lalthangliana, MNF chu vote 94 chauhin a hneh bawk. Chakna tlem zual zingah hian H. Rohluna (INC-Lengteng), Lalsawta (INC-Aizawl E-II), Dr. K.Beichhua (MNF-Saiha), Hmingdailova Khiangte (INC-Tuirial)-te pawh an tel a ni.

 

1 Comment on "INTHLAN THLIRVELNA : 2013 ELECTION-A AN CHAKNA ZAT"

  1. Good

Leave a comment

Your email address will not be published.


*


This site uses Akismet to reduce spam. Learn how your comment data is processed.