Dr.Krista Roluahpuia : MYC Young Achievers’ Awardee (2018)

Krista Roluahpuia hi Lawngtlai District-a Mualbu (L) khua niin May 27-ah a piang a. A pianna Mualbu (L) hi khaw te reuhte, in 70 vel lek awmna khua a ni nghe nghe. K.Liannawla leh Lalchuailovi te fa paruk zinga a upa ber dawttu a ni.

Harsa chung chungin lehkha a zir thin

Pawl 1 atanga pawl 7 thleng hi Baptist Boarding School, Chawngte-ah a kal a, High School leh Higher Secondary school erawh chu Baptist Higher Secondary School, Serkawnah a kal thung. Chhungkaw rethei tak atanga seilian a nih avangin uniform tet a school kal changte, hostel fee tur pek theih loh vanga an khaw lam pana haw vang vang changte a nei thin a. Mahse, a taimakna leh tumruhna avangin a awmna apiangah zirtirtute leh thiante duhsak a hlawh thin hle thung a, Baptist HSS-a a kal chhung phei hi chuan a thiam theih em avangin school-in an chawm tawp mai a ni. He mi hma, Baptist Boarding School, Chawngte-a a kal lai pawhin an zirtirtu Pi S.Lalramengi’n Hostel fee a tumsak thin a ni.

School a kal tawhna apiangah school ti hmingthatu nih zel tum mi, theihtawp chhuah thin a ni a, exam naah pawh an class-ah chuan pakhatna ni chho char char thin a ni. Tin, Quiz Competition, Science Seminar leh a dang tamtakah a kal tawhna school a lo champion pui tawh thin. Kum 2005-a National Children Science Congress-ah phei chuan Baptist HSS, Boys Hostel a an tui hman dan a zirchianna chu A++ grade a lo hmuhpui tawh a, he grade hi North East-ah chuan hmu hmasa ber leh awmchhun a la ni nghe nghe.

Mizoram Finance Minister Lalsawta hnen atangin MYC Young Achievers’ Award 2018 a dawng. he award hian pawisa cheng nuai 1 a keng tel

Zirtirtu ni chungin College a kal

Class XII a zir zawh dawnin a zir zel dan turah a inngaihtuah buai hle a. Vanneihthlak takin Rev. V.Lalhmingsanga’n Aizawl-ah a inhlawhna tur a hmuhsak hlauh mai a. Tichuan, mahni khaw lamah pawh haw loin class XII exam zawh veleh Aizawlah a phei a, result nghah pahin Bee Zet HSS, Bawngkawnah a thawk ta a ni. Result chhuah hnuah Zirtiri Residential Science College-ah admission a ti fel a, a tir lamah Physics la zet mah se, a hma lam huna atana tha zawk tura a hriat avangin Mathematics honours-ah a inlet leh ta a ni. School-a thawk chungin 1st Year chu a zir tluan a, 2nd year a zir kumah Donbosco HSS, Bawngkawnah a thawk leh a. He school-ah hian B.Sc a zir chhuah hnuah pawh kum khat a thawh chhunzawm leh a ni.

A thawhna school-a chawhma lama a class lak turte a lak zawh tawh hnuah college a kal ve chauh thin a, a chang chuan college lamah chawhnu class tur chawhma lama lo sawn chang a awm thin a, a buai ve thin hle. College zirtirtute zirtirna a dawng tlem em em a, mahse, a hunawl remchang apiangah library-a lehkhabu chhiarin hun a hmang thung. Hetiang a nih avang hian a attendance pawh a chhe hle a, mahse, term exam-a a tih that em avangin an hotuten a exam an phal sak a. University exam thlenga a tih that chhoh tak zel avangin harsatna a tawk chhunzawm ta lo a ni. Hetiang a harsa taka zir chho chung hian MZU hnuaia B.Sc-ah mark hmu sang berin, Gold Medal a la ta hial a ni.

A student-ten an ngaisang hle

School-a a thawh chhung hian zirtirna lamah pawh zirlaiten tha an ti thei hle a. Class a lak reng rengin a bu emaw, note emaw a en ve ngai lo a, a zirtir tur lesson kha a bel em em thin a ni. Hetiang a a zirtir theih nachhan zirlaiten an zawhna chu, “Kum hnih khat kalta khan in zirlai hi hneh takin ka lo zir ve tawh a, tin, staff room-a in lo kal chuan ka zirtir tur che u ka zirchiang lai in hmu thin ang, ka awm mai mai ngai lo” tiin a chhang thin. Hetiang a nih avang hian a zirlaiten an ngaisang thin hle a, “Kei, in zirtirtu pawhin heti khawpa nasa a ka zir chuan nangni phei chuan kei aia nasain in zir tur a ni” tiin a zirlaite a fuih thin.

IIT-a zir turin a inziak tling

India rama zirna in leh research tihna hmun tha berte zinga mi Indian Institute of Technology (IIT)-ah hian luh a tum ruh hle a. Kum 2009-a B.Sc a zir zawh hnuin inhlawhin school-ah kum khat a thawk leh phawt a, kum 2010 May thlaah Guwahati-ah IIT Entrance exam khirh tak chu a zu hmachhawn ve ta a. May thla tawpa result a lo chhuah chuan a tling ve ta hlauh a, a tling tih a hriat veleh Bawngkawn Baptist Biak Inah a kal nghal vang vang a, a lo inkalh avangin Biak In varahdah-ah chuan Pathian hnena lawmthu sawiin a tawngtai ta a ni.

Integrated Ph.D zir turin IIT Bombay a thlang a, Integrated Ph.D a thlan chhan hi midangte tihbuai ngai lo a research tih paha thla tin stipend an dawn theih thin dawn vang a ni ber. Tichuan, hun rei tak atanga a lo suangtuah thin IIT chu July 8, 2010 khan a rap ve ta a ni.

IIT Mumbai hi University a ni nghal a, University Grants Commission (UGC) hnuaia awm lovin Human Resource Development (HRD) enkawl a ni. India sorkarin Institute of National Importance ti a a duat em em a ni a. Tin, khawvel a University ranking siamtuten India rama University tha bera an thlan a ni mek bawk.

IIT-ah a duai chuang lo

Krista Roluahpuia hi a zirna IIT Bombay-ah pawh a expert-na lamah chuan research scholar dangte hriat a hlawh hle a. Professor thenkhatte phei chuan an Ph.D zirlaite chu Krista rawn tur hian an kawhhmuh fo a, zan rei tak tak thlengin a room-ah leh laboratory-ah an pan thin a ni. Khawvel pum huap pawh a hmanraw vang leh changkang, Molecular Beam Epitaxy khawih thei tlemte zingah a tel a, chu mai ni lovin Molecular Beam Epitaxi research group, mi 5 chauh awmnaah group leader a ni mek a ni.

Tin, IIT Bombay-a hmanraw changkang leh man to em em, mi tlemte chauhin an khawih theih, High Resolution TEM (atomic position precise taka enna), High Resolution XRD (atomic plane zirchian nana hmanraw tha ber)-ah te hian a khawih theitu tlemte zingah a tel mai ni lovin a thu ber berte zingah telin, expert member a ni thei ngat a ni. Tin, IIT Bombay Post Graduate Academic Council member a ni tawh thin a, Institution level-ah pawh mi hriat a hlawhin a lar ve thin hle a ni. Seminar leh conference huaihawt velah pawh research scholar-te aiawhin convener a ni thin. Chutiang chuan hun rei tak atanga a lo suangtuah thin Ph.D chu a lo zir chho ta a ni.

Dr. Krista Roluahpuia, Krista rawngbawltu a hlawhtling ta!

Tin, IIT Bombay-a a awm chhung hian kum khata chawlh lak theih zat ni 30 chu hmang tangkaiin Mission Field-a Missionary School-ah a thawk thin a. Zing dar 6 atanga zan dar 10 thleng a zirtir thin. An kum khatna syllabus (Maths leh Science) chu zawh hman a ngaih thin avangin a hautak thin hle a. A haw ve pawhin an khuaah, a chhungte kiangah ni 3 vel bak a cham hman ngai lo. Hetiang hian buai reng rengin, indaih lo takin hun hmang thin mah se, Pathian tana thawk veah a in ngaih avangin a lawm em em thin a ni.

Kum 2018 August 8 khan Doctorate Degree a hmu ve ta a. A thesis chu ‘Molecular Beam Epitaxi of Group IV heretorostructures for photonics applications’ tih a ni a. Mizo tawnga hriatthiam awlsam dan berah chuan periodic table a group IV element remkhawm, a remkhawm dan leh a dik tawk loh dante, nghawng a neih theih dante leh dik zawka rem a nih theih dan turte zir bingna a ni. Tunah hian IIT Bombay-ah vek hian Post Doctoral Research Scientist angin a thawk chhunzawm mek a. Journal leh conference paper ringawt pawh 17 chuang a nei tawh a ni.

A kamchhuak thenkhat

Dr. Krista hian, “Tumah hi mi bik kan awm lo a, hriat zawng te, thiam zawng te a danglam thei a, chutiang zelin kan tangkainate pawh a inang lo. Kan zavai hian kan pawimawh vek a ni tih hi ka hringnun kaihruaitu leh philosophy ber a ni” tiin a sawi thin.

Krista hi thawmhnaw bakah thildang, changkanna emaw kan tih, ni si loah hian a inhambuai ve ngai reng reng lo a, hetianga inhambuai an tam lutuk hi a vei zawk hle thin a ni. “Changkanna hi kan thil ei, kan in leh lo, kan incheina, kan lirthei neih leh a dangteah hian a innghat lo. Mihringte hi social animal kan nih avangin mi dangte tana kan tangkai leh tangkai loh hian kan changkan leh changkan loh chu a hril ber zawk a ni” tiin a sawi thin.

“Mizo thalaipuite thurawn ka pek duh che u chu : Pathian tih tlat la, a duh dana i awm chuan a ni pawhin i duh chu a hriatpui reng ang che,” tiin Mizo thalaite a chah a ni.

MYC Young Achievers’ Award 2018 hi Mizoram Youth Commission-in thalai, kum 40 hnuailam mi hlawhtling, entawn tlak leh chawimawi tlak zual ni a a hriatte tana chawimawina a siam a ni a. District tinah DC kaihhruaiin Committee din a ni a, he committee hian an district chhung theuha chawimawina dawng tlaka miin an rawtte an lo thlifim a. State Level Committee-ah an thlen leh a ni. Award hi mi 8 hnenah hlan a ni a, award dawngtute chu heng mite hi an ni :

  1. Alinery Lalngilneii Lianhlawng, Sangau (Social Worker/MBA student, University of Sussex, UK)
  2. Dr Benjamin Lalfakmawia, Chhingchhip (Medical PG Student, AIIMS, Delhi)
  3. Dr Krista Roluahpuia, Mualbu (Bombay IITian)
  4. H.Lalengmawia, Cherhlun (Farmer)
  5. Joan Laldinpuii, Lunglei (PhysicallyDisabled – MZU B.Sc Mathematics topper 2018)
  6. Lalchhuanzela, North Chawnpui (Petroleum Geologist)
  7. Lalremsiami, Kolasib (National Hockey Player)
  8. Lalzemawia, Serchhip (Farmer)

7 Comments on "Dr.Krista Roluahpuia : MYC Young Achievers’ Awardee (2018)"

  1. A van chhuanawm teh reng ve aw. Ropui ka ti thawt a ni. Khitiang ngei khi a ni mi ropui ka tih chu.

  2. Sir Dr.Maroa,kan va’n chhuang che em!.I hun neih tlem tê i chhung te bula hmang tam lova,BCM Home Mission School pakhat BCM Putlungasih H/S-a school naupang te hnena zirtirna tha tak i pek avanga result tha tak kan neih tak te kha aw!.Chumai a la nilo,KJD fellowship ang mai mai a min la tel pui peih dan te kha!.Bru thalai te hian kan va’n chhuang tak che em!.Dam zel la,mite tan malsawmna ni zel mawlh teh!

  3. A va ngaihnawmin a va challenging em. An chhuanawm hlawm hle mai. Luawmman petute hlei hlei hi in ngaihsan awm e. Thalaite tang zel teh u. Chanchin hriat nuam lo tam tak hi han chhilh bo vek teh u khai. Pathianin hruaiin malsawm zel che u rawh se

  4. hetiang tak mai Pathian tih leh rinchhan chunga theihtawpa mahni hma zawn pal tlang thin te aia ngaih hlut tur chuang hi mihring an awm thei chuang lo…. ka va chhuang em…chi tam tak thlah a leilung luah khat tur a.. Pathian duh zawng mi ngei chu ani e

  5. A ngaihsanawm e 👍👍👍

  6. Vanlalnghaka Ralte | September 23, 2018 at 9:30 am | Reply

    A ngaihsan awmin, a chhuanawm tak zet zet a ni.

  7. Dr.Marova, i hlawhtlinna ka lawmpui a che.Fight the good fight!
    -Rev.Dr.V.Lalhmingsanga
    Cuttack, Odisha.

Leave a comment

Your email address will not be published.


*


This site uses Akismet to reduce spam. Learn how your comment data is processed.