Lalrinpuii Hrahsel, IDES

Pu Zasanga Hrahsel leh Pi Thangziki-te fa pali (4) zinga naupang ber dawttu Lalrinpuii Hrahsel, Chanmari, Aizawl nula hi tunhnai kum engemawzat chhunga Mizo nula chhuanawm berte zinga mi a ni a.  Hnamdang kara zam ngai lo, eng thil pawh hmachhawn se zam chhe mai lo tura inzir leh intat hriam tawh a ni ti ila kan tisual awm love.

Union Public Service Commission Civil Service Exam 2012-ah khan tlingin, hemi tum a Mizoram atanga tling awmchhun a ni nghe nghe. UPSC Result a chhuah hma hian Mizoram Civil Service Exam, 2012 result Feb. 29, 2012 a tichhhuah ah tlingin, 8-na a lo ni tawh bawk. UPSC Civil Service Exam-ah hian Indian Defence Estate Service (IDES) pek a ni a, MCS zawm lovin IDES hi a zawm ta zawk a ni.

Hetiang mi chhuanawm hi kan nei zen zen lova, chuvangin, amaha zir tur awm zawng zawngte sawrchhuak vek thei lo mah ila, zirlai tlemazawng talin kan tangkaipui ngei beiseiin a chanchin kan ziak ta a ni.

Curent Posting : CEO, Danapur Cantonment Board, Danapur, Bihar

Education Background:

Nursery atanga Class VII thleng chu Neuhof School, Chanmari-ah a kal a. Hetih hunlai hian thiamthei pangngai tak niin Top 10-ah pawh a lang ve fo thin. Class VIII leh IX St.Paul’s HSS-a a kal lai vel hi an tleirawl harh vanglai a ni a. NCC lamah a inhmang nasa a, lehkha a zir hleithei ta reng reng lo mai a. Class IX chu a fail phah ta hial a ni.

Tamtak tan chuan vawi khat hlawhchhamna hi tlakchhiatna thlentu a nih laiin Rinpuii-ah chuan a ni ve hauh lo. Hetia Class IX a fail zeuh atang hian thahnemngaihna tak tak a nei ve ta chiah a, MA a chhuah thlengin First leh Distinction-ah a pass ta vek  a ni.

Class X hi Home Missions School-ah a zir zawm a, HSLC First Division (63.6%)-ah a pass a. HSLC a pass hnu hian hmunpui lama zirna tha zawk panin, Samaritan Residential School, Yelagiri, Tamil Nadu-ah Class XI & XII (Science-Bio) a zir zawm leh ta a. He School hi School tha tak mai, India ram hmun hrang hrang leh thenawm ram atang pawh an pankhawm ve thin a  ni a. Kum 1984-a din niin Samaritan Educational Trust enkawl lai a ni. He school atang hian HSSLC chu Distinction-ah a pass leh bawk.

Tamil Nadu-a Yelagiri atangin State capital Chennai lamah a insuan leh a. Kum 1915-a din Women Christian College, Chennai-ah B.Sc (Biotech) a zir zawm leh a. Tha taka pass-in 72% a hmu leh a ni.

B.Sc tha taka a pass hnu hian Science lak chhunzawm lovin Stella Maris College, Chennai-ah  MA (International Relations) a zawm ta daih a. A zir ngai loh leh ngaihven ngai loh ni mah se, MA pawh hi I Division-ah 66% hmuin a pass leh ta tho a ni. Stella Maris-a a kal lai hian I year-ah Proficiancy Award a dawng nghe nghe. Stella Maris College hi Catholic Institute niin kum 1947-a din a ni a. Christian College tha tak a ni.

Nih tum nei lo, Pathiana innghat ngam!

Mak tak maiin Rinpuii hian lehkha a zir laiin nih tum mumal tak a nei ngai reng reng lo a. Mahse, a zirlai a thiam thin hle niin a lang. B.Sc a pass hnu phei chuan zir chhunzawm tumna pawh a nei tawh lem lova. Mahse, Stella Maris College-ah hian MA (International Affairs) hi hawn thar a la ni a, a subject hi a zir chak zawng tak a lo nih avangin entrance a pe ve a, a lo tlin tak hlauh avangin a zir ve leh rawih mai a ni. MA a zir lai pawh hian Civil Service-a luh tumna a nei ngai reng reng lova. UPSC-in Civil Service exam a conduct dan pawh chiang taka hriat a nei hauh lo. Mahse, a luhchilh tak tak erawh chuan amaha inrintawkna leh taimakna te, Pathian hnena a innghah tlatna te chuan hlawhtlinna a pe ta a ni ti ila kan tisual awm love. A nu leh paten an career tur an vei em em a, a nu phei chuan a tawngtaipui reng thin. Hei hian a nunah pawh puitlinna a pe nasa a, a hlawhtlinna ah hian kawngro a su nasa hle.

UPSC hnuaia Civil Service a exam pawh khan Pathianah a innghat nasa a. A subject lak ngai loh a exam avangin exam hall a a chhan mawlh mawlh lai pawhin, word by word-in a chhannate chu Pathian hnenah a hlan mawlh mawlh mai a ni.

Lunglen/Khawhar-in a tibuai lo

Class X a pass velleh a phai lama awm nghal a nih avangin khawharna te, hrehawm tihna te a nei ve ngei ang tih a rinawm a. Mahse, heng hian a zirna a tibuai ngai reng reng lova. “Phaia awm a mahni Mizo puite kianga awm tum kher hi a tha ka ti lova. Kan zu awmna te nundan mila kan inherrem theih chuan engmah harsatna a awm lo” a ti a. An class-ah, an Institution-ah a Mizo puite an awm loh avangin a buai ngai lo.  North East mi a nihna avanga hmuhsitna emaw, tih duhdahna a tawng em tia kan zawhna chu, “Ka tawng lem lo. South Indian ho hi chu an fel ve hrim hrim a. Bakah, buaina siam lova, an nundan mila kan zu nun ve chuan min en hrang lo reng reng” a ti.

Mizo thalai, phai lama zirna tha zawk zawma awm thenkhat an talbuai fo laiin Rinpuii hi chu a talbuai ve reng reng lova. A luhna Institution-te hi Christian Institution, discipline khauh taka kenkawhna, Hostel pawh khauh taka enkawl a nih zel avangin pawn lama chhuahna chance a tlem a. Tin, lehkha zir tura phai ram hla taka awm a ni tih a inhre chiang em em a, Mizo zirlaite inpawlkhawmna ah a tel tam lo hle a. Tul zual tak takah lo chuan Mizo thiltihkhawmna ah a tel ngai meuh lo. Mizo te mamawh ngawih ngawih ‘tlatfal ngamna’ a nei tlat a ni.

Coaching a tangkaipui hle a. A subject lak ngai loh hmanga exam a nih miau avangin a thar veka zir a ngai a, chutah chuan coaching hian nasa takin a pui a ni. Amaherawhchu, MCS a exam buai avangin hun a nei chep em em a, duh ang pawhin a kal hman ta lova. Chuvang chuan nasa takin a tihchhiat phah niin a ngai.

Personal interview a hautak

Personal Interview ah khan Lady Board hmaah a interview a (Interview Board Chairperson hmeichhia a ni tihna), hetiang Lady Board hi an khirh duh bik deuh avangin chance chhiatna tiin sawi a ni thin a.  A ni pawhin a vannei dawn lo ni ah a ngai hman hial a ni. Mahse, zam lovin huaisen takin a hmachhawn a, Board memberte’n chhaih buai an tum ngial pawhin a buai duh der lo.

Minute 35 vel an interview chhung hian zawhna chi hrang an zawt a. A hobby-te, Mizoram leh Tamil Nadu inan loh dante leh thildang tamtak, an zirlaite pawh an zawt a. Hobby-ah hian Trekking, reading te, cooking te a sawi a. Heng a hobby-te hi a mahin thui vaklo a sawi zau nghal avangin an zawt zui vak lo.

Sri Lanka a LTTE ho hmeh mih an nih chungchanga UN-in Sri Lanka demna resolution a buaipui laia India ram ngaihdan te, India ram foreign policy chungchanga a ngaihdante an zawt chik hle a. Sri Lanka-ah Human rights violation a nasa tih hre ve reng mah se, India tana thenawm ram tihlungawi pawimawhzia te a sawi chho a. China-in kan chhehvel ramte a thunun nasat tial tial avangin Sri Lanka support kha India ram tan chuan tihmakmawh a nihna laite chiang takin a sawi bawk. Hetih pah hian India ram foreign policy kalpui dana a duhkhawp lohna laite a sawi bawk a. Tha an ti ve viau aniang chu, “Very Good” an ti ve tawp mai a, zawhna pawh an zawh belh thui ta lo.

Myanmar insingsak mek chungchangah zawhna tlem an zawt bawk a. Mizoram-in eng nge a tih theih tihte leh venthawn ngai thil engemaw a sawi nual bawk.

Eisiam lam pawh a thiamin a tui hle…

Interview-ah hian rilru in enchhin tumin zawhna zawh awk a, talbuai tir an tum nasa hle thin a. Pakhat phei chuan, “B.Sc-a in thil zirte kha i theihnghilh vek tawh em ni?” tiin a zawt ngat a, “Theihnghilh vek love” ti a a chhanna chu “Theihnghilh vek a?” tiin a zawt nawn leh talh a. Mahse, Chairperson-in a rawn chhan ta hlauh a ni. Hetiang hian B.Sc a zir laia a thil zir tlemazawng a zawt zui a, mahse, a zawttu pawh kha Science background nei a nih vak bik loh avangin an inzawt thui ta lo.

Interest hi ziah tel a ngai an ti thin a, a ni chuan interest-ah hian Travelling a ziak a. “Ram pawn lamah i zin tawh em?” tia an zawhin a la zin loh thuin a chhang a. “I hobby-ah travelling i ti bawk si a?” tia an zawh letna chu buai hauh lovin, “Hobby ah chuan Trekking ka tih kha. Hei chu interest a nia, a in anglo alawm” a ti ve tlat a, an zawt thui thei bik lo.

Siachen Glacier chungchang, hlawkna awm mang si lova awp tuma kan buaipui reng tho si chungchanga a ngaihdan zawh a ni bawk a. Heng zawhna te hi ngaihdan fing tak leh chiang takin a chhang thei vek a ni.

Hlawhchhamna atanga a dinchhuah leh dan te, a tawrhchhelna zawng zawngte, principle nghet tak a neihte hi a entawntlak em em a. Amah atang hian thalaiten/zirlaiten zir tur tamtak kan nei a ni.