LALHMINGMAWIA RALTE, IRS

Lalhmingmawia Ralte, IRS hi Pu Zasanglura leh Pi Sangthanpari-te fapa niin kum 1983 April 12 khan Ramthar Veng Sihpui-ah a lo piang a. An unau pathum (mipa pahnih leh hmeichhia pakhat) niin a pahnihna a ni.

Lalhmingmawia Ralte (La-mawia) hian Zotlang High School atangin HSLC Second Division-ah a pass a. Govt.Central HSS, Aizawl atangin HSSLC Second Division-ah tho pass lehin College erawh chu Delhi University hnuaia PGDAV College atangin II Div. ah a pass thung. BA-ah hian Pol.Sc (Hons) a ni nghe nghe. M.A (International Relations) hi JNU hnuaiah II Div.-ah bawk a pass leh bawk.

Tunah chuan Lalhmingmawia Ralte hi India sorkar hnuaia Officer chhuanawm tak a ni tawh a. Aizawl khawpuiah ngei Deputy Commissioner, GST, Central-niin a awm mek a ni.

Coaching?

“UPSC Exam ka hmachhawn dawn hian ALS, Delhi-ah coaching ka kal a. Hei hi a thain Mizo pawh kan tam viau mai. Tin, General Studies-ah chiah Coaching ka kal a, ka optional subject pahnihte erawh chu in lamah ka inbuatsaih tawp mai a ni”

Inbuatsaih dan tlangpui

“Ka inbuatsaih ngawrh lai tak tak kha chuan ni khatah darkar 13 vel ka zir tlangpui a. Mi thiamthei lo, rilru chak lutuk lo ka nih avangin discipline tha tak ka mamawh tih ka hrechiang a. Zir dan tur routine mumal tak ka siam vek a. Follow thei veklo mah ila, a tam zawk kan follow theih hrim hrim chuan a lo tha khawp mai”

Engatinge Civil Service kher?

“Keimah hi Adminstration lamah hian ka tui ve hrim hrim a. Ka tette atanga ka hriat theih zawng pawh IAS Officer leh Politician hmingte a ni thin a. Celebrities hming tih angreng hi ka hre hleithei thin lo. Tin, JNU-a ka awm khan min tiphur nasa bawk. A chhan chu JNU-a kal chu khatiang hawizawnga in prepare deuh vek kha kan nia.. rilru a pek loh theih loh a ni ber”

Nu leh pate tawngtaina

A nu leh paten an thlawp thain, an tawngtaisak nasa thin hle a. Hei hian a nun pawh a kaihruai nasa hle niin a lang, “Ka nu leh pate hian nitin min tawngtaisak thin a. An hnathawhna hmunah pawh awm se, kan tana an tawngtai hun chhun dar 12 te a lo rik tawh chuan an tawngtai hrim hrim zel” a ti.

Pol Science nge P.A.?

“UPSC hmachhawn tur chuan Public Administration an tui tho chuan Pol Science ai chuan la zawk se a tha ka ti. Pol Sc chu a scope a zau lutuk a, a scoring lo deuhin ka hria. General Studies-ah erawh min pui nasa viau”

Interview dawna incheina

“Dress-ah chuan formal hi a tha mai a. Kei chu kamis var ban tlawn, knecktie sen, kekawr var leh smart shoe ka bun mai. Mizote hi chu kan smart a, vaiho erawhchu thawmhnaw chuar tak tak nena lo kalte pawh an awm. Dress chungchangah hian pawimawh deuh mai chu- entirnan Mizo dress-in lo inthuam ta ila, ka dress chungchangah khan zawhna awm ngei ngei dawn. Chumi chhang thei tur chuan kan inthuamna azir khan inbuatsaih te pawh a ngai a ni”

Interview atana inbuatsaihna

“Interview atan hian Coaching Class kan kalnaah khan course a awm ve a. Chawlhkar khat vel hetiang lam hawi hian min kaihruai thin. Hei hi a theih hram chuan kal a tha. A chhan chu keimahni ringawt chuan zawhna chhan dan mawi leh tha kan lo hre lo thin. Kei pawh NET ka nei a, NET ka neih chungchang hi min zawt ve ziah a ni. “Engvangin nge NET nei tho si, academic lamah i kal mai loh?” tiin min zawt thin a. Ka hmachhawn hmasak khan ka chhang thiam lo lutuk a, “Sir, academic lam hi ka duh lo hul hual” ka ti tawp mai a. Mahse khatiang frank lutuk kha a lo tha hauh lo mai a. Tun tumah erawh chuan diplomatic deuhin ka chhang ta a, “Academic pawh hi a tha a, eng professional line pawh hi a tha in sang bik a awm chuang lova. Mahse, he service hi ka tette atanga ka lo dream thin a ni a, hetah hian rilru ka pe phawt ang a, ka lo success ta lo anih chuan thildangah ka kal ang” tiin ka chhang ta a ni.

Written atana thil pawimawhte

“Time Management hi a pawimawh berin ka hria. Optional-ah phei chuan Science leh Mathematics-te chu kan chhang zo hman vek a, mahse GS-ah hi chuan a titha ber pawhin mark 40 vel hi chu a leave ngei ngei, tuman an chhang zo hman ngai lo. Uluk taka time manage a ngai a ni. Tin, kal hma a pawimawh bawk. Exam hall hi tan hma darkar chanve-ah te an hawng thin a, chutah chuan lo va thut lawk a, lo va intihtlangnel hmasak tur a ni. Pen pawh a thar hman loh tur, hman tawh sa, lo chulnel tawhsa hman a tha”

Civil Service luh tumte tana thuchah

“Retheihna hi chhuanlam chi ah ka ngai lo. Keini pawh engmah neih kan nei chuang lova, kan tum a, kan ti thei tho. Coaching class kalna tur pawh Delhi-ah Ministry of Tribal Affairs tanpuinain a thlawnin tribal ho chuan kan nei thei a, a thlawn mai bakah stipend an la pe zui a ni. Chungte chu haichhuah peih a ngai.

“Tin, academics lamah kan lo tichhe deuh a, a titha ber ber kan lo nilo a ni maithei a, kha kha hnual phahna tur a ni chuang lo. Keipawh hi examnaah pakhatna ka ni ngai reng reng lo. Mahni rilru, mahni irawm chhuak a finna leh thiamna kha an duh zawk a ni. Chu chu helaia MCS exam nena a inthlauhna ber pawh niin ka hria. MCS chu Saidingi (Saidingpuii Chhakchhuak – IAS, 2008) nen pawh kan exam ve ve a, kan tla ve ve tlat a ni. Kan style a inang a, bye-heart systema kan kal vak loh vang a ni maithei. UPSC in a duh ber chu mahni rilru, mahni own idea tarlan thiam hi a ni zawk”

Zirlai ni chunga thil danga inhman chungchang

“Delhi-ah te chuan KTP leh MZP velahte a inhmang nasa ber ber kan nih tho rualin, tum bik nei ran tan chuan inhman tam loh a tha ka ti. Kan lo inhmang deuh a nih pawhin kan inhmanna chu min tichhetu ni lovin, min motivate-tu ni thung se a tha. Inhman loh lutuk erawh a tha ber chuang lo; hengte hi min tipuitlingtu a nihna lai a awm ve si a..”

Mizoram a zirchhuak tan UPSC-ah chance a awm em?

“A awm tho. Vaiho, Bengali te, Competitive ngaisang em em mai te pawh an lo kal a. English a mik a mak pawh hre miah lovin, background pawh tha lo tak takte an ni ve a. English Coaching class, Grammar coaching class te an kal chawp a, tling tawk an awm ve leh mai thin. Target hi kan pawhsei a ngai a ni. Tuna tlin nghal tum vut vut tur a ni chuang lo a, engtik hunah pawh service-ah lut ila, a hna hi a hlu reng dawn tho a ni tih hi hriat reng a tha khawp mai.”

Pic : Lalhmingmawia Ralte, IRS leh a nupui Rintei, IRS