Korean Conflicts : A chinchhuakin…

Tun hnai kum engemawzat kalta atanga khawvelin a buaipui em em chu Korean peninsula buaina hi a ni. Eng vanga heng ram pahnihte (North Korea leh South Korea) hi inngeih lo em em nge an nih? He buaina hi a chinchhuakin Korean History atangin i han chhui chho dawn teh ang.

KOREAN HISTORY

He ram, tuifinriata khawmual inkhawhlut (peninsula) nuam takah hian tunhma chuan tribal hnam tenau te te an cheng thin a. Hun a lo rei deuh a, chungte chu inzawm khawmin lalram hrang hrang an din ve a, chung lalramte chu an lo inzawm khawm chho zel a, tualchhung indona leh pawn lam atanga runna tamtak a hmachhawn hnuah Korean Empire an din chho  ta a ni.

Hetia Korean Empire din a nih hma hian he peninsula ah hian lalram ropui ve tak tak, Goryeo (918–1392) te, Joseon (1392–1897) -te pawh an lo ding tawh bawk.

Kum 1904-a Russo-Japanese War a thlen hma kha chuan China leh Russia-te hian Korean Empire hi an thunun hle a. Amaherawhchu, he indona a tawp chiah (17 November 1905) hian Korea chu an ram lal, Emperor Gojong-a remtihna pawh tel lem lovin a hunlai a sorkar chak tak mai Japan sorkar chuan a venhimna hnuaiah awmah a puang a. Hei hi duh lovin han hel ve sa teh mah se, Japan hian kum 1910 atangin a awp zui ta nghe nghe a ni.

Korean School-ah Japanese tawng an zirtir

Japan-in a awp hunlai, kum 38 chhung hi   Korean history-a hun thim ber (the darkest days in modern Korean history) niin an sawi thin. An ram leilung hausaknate chu nasa taka rawk a ni a, an tawng te, media te, an hnam chindan phung (custom) zawng zawngte chu nekchep vek a ni a. Hun engemaw lai phei chuan Korean ho chu Japanese hming pu vek tura tih an ni hial nghe nghe. Nasa takin an dodal ve a, hetih hunlai a dodaltu langsar tak, Korean nula kum 16 chauh a upa Yu Kwan-soon phei chu sawisak hlum a ni nghe nghe. He nula hi Korean Joan of Arc tiin an sawi thin.

KOREA RAM THENDARH A NI

World War II tawp dawn hnaih lamah khan khatih laia tangrual Soviet Union leh US khan Potsdam Conference-ah Agreement siamin Japan tlawm hunah Korea ram chu 38th Parallel-ah Chhim leh Hmar a then hrangin North lam hi Soviet Union in a awp ang a, South lam hi US in a awp thung ang tiin inremna an siam lawk diam a. Aug 15, 1945 ah Korean peninsula a Japan a tlawm chiah khan heng ram lian pahnih sipaite chu hmanhmawh takin Korea ramah hian an tleh lut ta hem hem mai a. Korea ram chu chhim leh hmar-ah thendarh an ni ta a ni.

Ram pahniha Korea ram thendarh ringawt mai hi dik an tih chiah loh avangin US leh Russia pawhin suihzawm leh an han tum ngial na a, Cold War lai a ni a, sorkar din dan turah heng ram lian pahnihte hi an inlungrual theih ngang loh avangin North Korea leh South Korea chu ram pahnihah thendarh a lo ni hlen ta a. North Korea lamin anmahni awptu Russia a nih angin Communist thuthlung an zui a, South Korea lamin anmahni awptu US leh a thurualpui dangte zuiin Democracy a thlang ta thung a ni.

KOREAN WAR 1950

Kum 1948 ah Republic of Korea (S. Korea) President Dr. Syngman Rhee chuan Korea pumpui (North & South telin) chu pumkhat Republic of  Korea a nih thu leh amah chu President a nih thu a puang a. Chumi do zawng  chiah chuan Sep 1948-ah Democratics People’s Republic of Korea (N. Korea) chuan Korean Peninsula pumpui chu ramkhat niin legitimate govt an nih thu a puang ve nghal bawk.

 

US Marine sipaiten North Korea sipai an man

Hetia an inkar a buaina a awm takah chuan Communist N. Korea chuan Soviet Union thurawn a la fel te te a, S. Korea chu June 25, 1950 ah a run ta thut a, kar lovah S. Korea khawpui Seoul pawh an la nghal der mai. US kaihhruaiin UN sipaiten South Korea sipaite chu an pui nghal bawk a, mahse, an nawr kir hleithei lo. A tawpah tangrual sipai commander, Gen. Mac Arthur-a war-plan fuh zet mai avangin US army-te chuan North lam chu an nawr let ta chiam mai a, N. Korea khawpui Pyongyong an thleng ta rawk mai. Mahse, China ramri an han hnaih ta lutuk deuh nge ni, rin loh takin China a in rawlh ta thut mai a, Chinese Army 250,000 zet chu North Korea-ah an lo tleh lut ta hem hem mai a ni. China rallian dang zo lovin US Army an hnungtawlh ve leh ta thung a. Tuna 38th Parallel-ah khian defensive position tha zet mai la in an tang khawng ve ta tlat a. Tichuan, Korean war chu chak zawk awmlo leh peace accord/pact engmah signed tak tak pawh awm lovin 1953 khan an chawlhsan ta tawp mai a ni. Tun thlengin ralthuama in beih tak awm lo mah se, inremna an la siam miau loh avangin indo reng ang an la ni tihna a nih chu.

TUN HUN

Kum 1980 leh 1990 chho vel khan nasa taka South Korea a than tluk zetin North Korea a tlachhe chak ve thung a. An belh ber Soviet Union a kehdarh miau avangin economic lama tanpuina an dawn thin an dawng thei ta lova. Hemi hma lam  Kim Il-sung a rorel lai chuan South Korea lam ai hian hma an sawn chak mah zawk thin a. Mahse, Soviet Union kehdarh hnu lawka Kim-II Sung boral zui ve leh ta mai nen, an dinhmun a harsa ta hle  a ni.

Vansang lam atang pawhin Korea ram pahnihte dinhmun chu chiang takin a hriat theih a…

Korea hian Nuclear ralthuam a buaipui tlat avang leh nuclear test a neih thin avangin UN in ei leh barah nasa tak a hrek mek a, ram rethei tak niin a chauh thubarawh thinrim hian South Korea hi kah ah a vau reng thin. Chu chuan ramdangte nen a inbiakna leh an hrekna tlem a thlahzalna a hring chhuak ve ziah bawk. Hetianga suahsual rawngbawla nuclear a test thin lai leh, South Korea a vau reng lai a khawvelin a hnuchhawn lai pawh hian China leh Russia hian an thlawp ve tlat thung a. Hei hian kawng tamtakah buaina a ti punlun bawk.

INDO TA SE

Mipui ngaihdan hi lakhawm ta ila, tumahin North Korea hi a chak zawk an ring lovang; South Korea hi US-in a puih dawn miau avangin! Amaherawhchu, ‘nuclear ralthuam a nei tlat a’ tih a ni zel thung ang. A ni lah tak a, nuclear ralthuam a neih miau avangin eng anga ram rethei pawh nise a hlauhawmna a nep chuang reng reng lo!

North Korean Dictator Kim Jong-un

Tuna an in epna ber 38th Parallel, DeMillitarized Zone (DMZ) khi 4Kms a zau leh 250Kms a sei a ni a. DMZ atang hian North Korea khawpui Pyongyong hi hmarlam km 125 lek niin Seoul hi chhimlam km 40 lek ah a awm bawk. North Korea hi khawvel a sipai ngah ber pangana niin Army maktaduai khat chuang leh Reserved army maktaduai 4.5 leh an sipai tha chungchuang Special Force tamtak, armoured vehicle leh artillery 20,000 chuang, landmines maktaduai khat aia tam leh fortified defensive position turu taktak DMZ bulah khian an beng muk tan mai a. S Korea khawpui Seoul lah laipuia kah phak lek a ni a, an airbase atangin minute khat thlawk lek a ni bawk. Missile a nei tha ve si a, indo tak tak ta se ram dang inrawlh hmain pawi a khawih thui hman hle awm e.

North Korea hi khawvela sipai ngah berte zinga mi ni mah se, an ralthuam tamtak hi a hlui tawh avangin an tlo vak dawnlo niin report a ni a (an tank neih zinga 80% chu a hlui tawh hle). Tin, silaimu an ngah tawk lo a, an lawng leh thlawhnate pawh kahthlak sak lo pawh nise, thla tam beihpui han thlak thei turin a fuel lam an ngah lo hrim hrim bawk. Tin, N.Korea fighter chhuanvawr ho MIG-29 ho hi an tunlai tawh lova, vansangah South Korea thlawhna F-15K te nen inbei dawn se, an radar a inthlauh em avangin Mig 29-in F-15K a awm ve tih pawh a hriat hmain F-15K hian a kapthla hman zel dawn niin an sawi bawk.

Military comparision…

Chutih laiin South Korea hi US-in duhtawka a thuam a nih avangin ralthuam nei tlem zawkin, sipai nei tlem zawk pawh nise ngaihtuahawm lutuk tur a ni lo. Ralthuam nei tlem zawk pawh nise a tha zawk deuh vek a tih theih. Tin, South Korea-ah hian an ram venhim pui turin engtik lai pawhin US sipai, ralthuam tunlai ber ber nena thuam 30,000 vel inring rengin an awm bawk a. Korean war hmasa ang mai mai kha chu a ni kher lo ang le.

An sipai in ngah hleih dan kan en rualin an defence budget en ila, an sipaite ralthuam inneih that hleih dan tur chu a chiang mai awm e. Insem dawn ta se, N.Korea regular army mi pakhatin US dollar 6329 vel a an insem theih laiin S.Korea sipai pakhat chuan US dollar 40,000 chuang theuh an chang thei dawn a ni. S.Korea kum khat Defense Budget hi N.Korea aiin a let li aiin a tam zawk!!

Korean conflict hian US thiantha nih hlutzia a tarlang chiang a, Korea leh a chhehvel ram tenaute chu US-ah an innghat nasa lehzual a. Chu chu US in Russia leh China a epna kawngah thil pawimawh tak a ni si a ni.

North Korean leader Kim Jong Un shakes hands with South Korean President Moon Jae-in as both of them arrive for the inter-Korean summit at the truce village of Panmunjom

Note : April 29, 2018-a ramri a ram hruaitu pahnih North Korean leader Kim Jong Un leh South Korean President Moon Jae-in te inbiakna hian rah tha a chhuah ngei a beiseiawm a. North Korea pawhin nuclear programme tih tawp vek a intiam ve hial mai. Hei hi US-in nawr chitin a a nawrna rahchhuah ni a sawi a ni bawk. Eng thil nge thleng zel dawn i lo thlir ang u.