KHAWHAI-AH ‘EDUCATION WEEK’ HMANG (Khawhai-ah Class X pass hmaa School bansan awm tawh ngai lo)

Khawhai Students’ Union (KSU) buatsaihin June 26-29, 2018 chhung khan Khawhaiah Education Week, 2018 hman a ni a. He hun chhung hian Khawhai mai bakah Tuichang Constituency huam chhunga zirlai pawlte leh zirna in hrang hrangte tan intihsiakna engemawzat buatsaih a ni a. Tin, Week chhung hian 2018-a HSLC leh HSSLC First Division chin chunglam a pass-te lawmpuina pawisa fai Rs. 375,000/- zet sem a ni bawk.

 

Khawhaia Education Week buatsaih hi June 26, 2018 khan bialtu MLA Pu Lalrinliana Sailo chuan khuallian niin a hawng a, Pu Joseph L. Ralte, Centre Director, Entrepreneurship Knowledge Centre chu Guest of Honour atan hman a ni bawk. Pu Lalrinliana Sailo, MLA hian hun hmasa lama a lo intiam tawh angin Govt. Mizo High School, Khawhai atanga HSLC First Division leh a chunglam a pass zirlai 29-te hnenah Rs. 10,000/- theuh a hlan a. Khawhai HSS atanga First Division a pass zirlai 5-te hnenah Rs. 5,000/- theuh a hlan bawk. Kum 2018 HSLC-ah khan Govt. Mizo High School, Khawhai atang hian First Division-ah zirlai 32 pass-in, Distinction-ah mi 3 an pass bawk. Tin, Khawhai HSS atang hian First Division-ah zirlai 5 an pass bawk a ni.

Khawhai is a Notified Town city in district of Champhai, Mizoram. The Khawhai Notified Town has population of 2,496 as per report released by Census India 2011.

Khawhaia Education Week neih chhung hian item 13 hmangin school hrang hrangte intihsiakna buatsaih a ni a, lawman tha tawk tak siam vek niin, zirlaite leh khawtlang mipui ngaihhlut a hlawh hle a ni. Tin, he hun chhung hian zirlaite mai bakah zan lamah nu leh pate kohkhawm an ni a, zirna pawimawh zia inzirna hun hman a ni bawk.

Education Week kharna hun hi June 29, 2018 (Zirtawpni) hian Khawhai Town Hall-ah neih a ni a. Pu Ramhmangaiha Ralte, Jt. Director, H & TE Department chu khuallian a ni a. Week chhunga intihsiakna hrang hrang lawmman sem a nih bakah khuallian hian Govt. Mizo High School, Khawhai atanga HSLC Distinction a pass zirlai 3-te hnenah Rs. 10,000/- theuh a hlan bawk.

Khawhai Students’ Union (KSU) hian Education Week hi kum khat danah a buatsaih thin a, tun tum (2018) hi vawi 3 a buatsaihna a ni tawh a ni. He Programme avang hian Khawhaiin nasa takin zirna lamah hma a sawn phah a, result pawhin nasa taka a that phah bakah he programme buatsaih atang hian Khawhaiah class X pass hmaa school bansan (drop out) an awm tawh ngai lo a ni.