JHARKHAND-AH HMEICHHE TLEIRAWL PAWNGSUAL, A NUNG CHUNGIN HAL HLUM ZUI…

Nimin Zirtawpni (May 4, 2018) khan Jharkhand a Rajatenduwa khua, Chatra district (Naxal affected area)-ah hmeichhe tleirawl kum 16 mi chu ramhnuaiah pawngsual rawn a ni a, a hnuah a nungchungin an halhlum.

Pawngsual tuartu hmeichhe chhungten an sawi danin, mi pali, zu rui tak takten a chhungte inneihnaa an kalbo hlanin he tleirawl hi an in atangin an hruaichhuak a, ramhnuaiah hruaiin an pawngsual rawn ta a ni.

Pawngsual tuartu tleirawl pa chu khawtlang hruaitute hnenah zualkoin, an khawtlang roreltute chuan pawngsualtute chu thiam loh an chantir a, pawngsual tuartute chhungkaw hnena Rs. 50,000/- pe tura an tih bakah hremna atan sit up vawi 100 an tih tir bawk niin report a ni.

Khawtlang hruaitute thuremnaa lungawi lovin pawngsualtute chu khawtlang hruaitute leh pawngsual tuartute chhungkua nen nasa takin an inhnial a, hemi hnu hian hmeichhiate inah kalin, a nu leh pate kut an thlak bawk a, pawngsual tuartu pawh chu an va hal ta mai niin sawi a ni. He tleirawl hi damdawiin hnai berah hruai ni mah se, damdawiin an thlen chuan a lo boral hman tawh a ni.

He thubuaiah hian Police lamin Special Team dinin, rinhlelh mi 14 chu Inrinni hian an man tawh a, a meizang hlaptu bera ngaih Dhanu Bhuiyan leh mi thenkhatte chu la zawn mek an ni.