Iran Nuclear Deal

Iran Nuclear Deal an tih mai thin, official a “Joint Comprehensive Plan of Action” an tih hi khawvel ram lian zual engemawzatte leh Iran sorkarin nuclear chakna, a hlauhawm lo zawnga hman a nih theih nana inremna an siam a  ni a. He inremna, kum 2015 a khatih laia US President Barack Obama hova ziah hi US sorkar thar, Donald Trump-a kaihhruai chuan duh leh lovin, inremna atangin a inhnukdawk leh a. He thil thleng avang hian US leh Iran inkar mai ni lo, US leh European ram lian hote inkar pawh nasa takin a chhiat phah mek a ni.

Iran hian nuclear programme hi kum 10 tel zet a lo kalpui tawh a. A nuclear programme hnuaiah hian nuclear bomb siamna hmanruate siamchhuakin, ram pawn lam thlengin a thawnchhuak thin a. Hetia agreement an ziahfel hnuah erawh hi chuan “Iran chuan eng vang mahin nuclear ralthuam siamchhuah emaw, tihhmasawn emaw tumin hma a la tur a ni lo” tih a ni. Tin, Iran hmalak zel dan hi International Inspector/endiktuten endik an duh hun apiangah, nuclear site-te tlawh a phal vek tur a ni bawk. Chu  chu Iran hian pawm thlapin agreement an ziak ta a ni. Amaherawhchu, he inremna hian ralthuam siam nana hman tur a nih loh chuan a nuclear program chu sumdawn nan a hman a phalsak thung.

TUTEN NGE AGREEMENT CHU ZIAK?

Iran Nuclear Deal hi Iran bakah P5+1 an tih mai (UN Security Council a member nghet panga – U.S., Russia, France, China leh United Kingdom + Germany) leh European Union ten an ziak a ni.

He inremna ziak tur hian March 26-April 2, 2015 chhung khan ram hrang hrang foreign Minister rualte hi Lausanne, Switzerland-ah an meeting a. Inremna chungchang ngun taka an sawiho hnuah April 2, 2015 khan thutlukna an siam thei ta a. Chak taka hmalak chhunzawm zel niin, July 14, 2015 khan Iran leh P5+1 leh European Union-te chuan  ‘Joint Comprehensive Plan of Action’, Iran Nuclear Deal an tih mai chu an puangchhuak ta a ni.

AGREEMENT CHU LE…

Heng ram hrang hrangten thuchhuah intawm an siam atanga a lan danin Iran chuan a nuclear siamchhuahna hmunte chu a siamtha ang a, ralthuam siamna atana lo ruahmante pawh a ralmuang zawnga hman tura siam danglamin a ti tlem bawk ang a. UN leh EU te pawhin sumdawnna kawng hrang hrang, Oil leh bungraw tamtak hralh thei lova an hremnate an hlip ve thung ang.

Inremna tlangpui chu…

P5+1-te tih tur

  • Inremna siam atanga thla 4-12 chhungin Iran phuarna/hremna (sanction) zawng zawng an hlip ang.
  • Iran chuan International Atomic Energy Agency (IAEA) hnuaia Subsidiary Arrangements of the Safeguards Agreement Code 3.1 siamthatna leh Additional Protocol siam thar chu a ti hlawhtling tur a ni. Iran-in IAEA endikna a tihlawhtling thei lo a nih chuan hremna zawng zawng a ngai a kalpui leh tur a ni.
  • EU pawhin energy leh banking lama Iran a phuarna a hlip ang.
  • United States pawhin US leh ramdang company-te, Iran nena insumdawn tawnna an neih avanga hremna a pek zawng zawngte a hlip ve ang.
  • Iran hrem nana UN-in resolution a lo siam tawh zawng zawngte chu sut/nuai bo leh vek ang. Hetiang tur hian resolution thar a siam ang.
  • UN-in Iran a hrekna zawng zawng a hlip ang.

Iran tih tur ve thung

  • Centrifuges installed tawh chu 19,000 atangin 6104-ah a ti tlahniam ang a, Uranium sawngbawl tawh pawh kum 10 chhungin 5060-ah a ti tlahniam ang.
  • Uranium sawngbawl tawhte chu 3.67% aiin a tak (pure) tur a ni lo (hei hi civil nuclear power atana hman tawk a ni).
  • Nuclear lam thil tihhmasawnna chu a awmsa Natanz a mi bak a siam belh tur a ni lo.
  • Uranium sawngbawl tawh 10,000 kg a dah khawl mek atangin 3.67%, 300 kg-ah a ti tlahniam ang.
  • Leihnuaia awm Fordo uranium enrichment facility chu “nuclear, physics and technology centre”ah letin kalpui chhunzawm phalsak a ni a, mahse 1,000 centrifuges (research atan liau liau) bak siamchhuah phal a ni lo.Natanz-ah 5,000 R-1 centrifuge awm phal a ni bawk.  A bang 13,000 centrifuges chu spare atana dahthat theih a ni ang.
  • Arak hmuna heavy water facility chu ram dangte enpuina leh puihna hnuaiah siam danglam a tih hmasawn a ni ang a, ralthuam atana hman theih tur chiin plutonium an siam tur a ni lo, “Heavy Water Research Reactor” a ni reng tur a ni. Tin, hemi hmuna an fuel hman tawhte chu an export tur a ni a, hman nawn leh (reprocess) a ni tur a ni lo.
  • Uranium laihchhuahna hmunte leh nuclear facilities zawng zawngte endik a phal vek tur a ni.

Deal hi a fel tawk lo em ni?

Israeli Prime Minister Benjamin Netanyahu chuan Iran hian khawvel ram liante lakah leh UN ngei hmaah pawh kum 2000 chho atanga nuclear ralthuam siam a tum dan leh hma a lo lak tawh dante chu a thup tlat niin a sawi a. Information a pekte chu siamrem chawp mai a nih thu a sawi.

Sawiseltu thenkhat chuan he inremna (deal) hian Iran chu ramdangte laka tharum a thawhna tur leh, ballistic missile a siamchhuahna tur kawng a dang chuang reng reng lo niin an sawi a. Tin, he inremna-in  a huam chhung tur, a rei zawng tur leh inremna a thih hun tur engmah ziah lan a nih loh avangin Iran hian a duh hun hunah he inremna hi a bansan leh daih thei niin an ngai bawk. A tawi zawngin, he Inremna hian Iran nungchang a siamtha pha dawn lo niin an ngai a ni ber!

President Donald Trump chuan a campaign lai atang tawhin he inremna a duh loh zia leh tha a tih lohzia hi a aupui piap piap tawh a. He inremna hi “Inremna awm tawh a zawnga a chhe ber” a ti hial thin. He inremna atanga a inhnuhdawh tak tak hlauin European ram lian hote phei chuan US chetdan hi thin phu dep depin an thlir a ni ber mai.

Expert thenkhat erawh chuan he Iran Nuclear Deal hi a tha hle niin an sawi ve thung a. North Korea nuclear programme tihtawp nan pawh hetiang system bawk hi hman leh chi niin an sawi hial thung.

US thawhpui Saudi Arabia leh Israel-te chuan he inremna hi an duh lo hlawm tawp bawk a. Anni pahnih, Iran nena indo thei reng dinhmuna dingte hi chuan he inremna hian ramdangte laka tharum thawhna lakah Iran a ven chuan loh avangin awmze nei loah an ngai a ni.

Middle East-a US hmalakna kawng hrang hrangah hian Iran hi a hnawksak hle a. Iran hian Hezbollah te thlawpin, ralthuam leh pawisa a pe reng a, Israel tana hnawksak takin a awmtir reng a. Hei mai hi ni lovin Lebanese helpawlte leh political group thenkhatte thurualpuiin Yemen, Iraq leh Bahrain-ah hlet a chhuah reng bawk.

Thu kal zel

A sawi ang tak takin May 8, 2018 khan Iran Nuclear Deal atanga US a inhnuhdawh tur thu chu President Trump chuan a puang ta tak tak a, rin lawk ang ngeiin nghawng pawh a nei lian hle. US a inhnuhdawh tak daih avang hian he inremna ziak vetu ram lian dangte chuan Iran chu he inremna atang hian a inhnukdawk ve mai ang tih an hlau hle a. He inremnaah hian US ber a tel loh a, sanction hrang hrang a kalpui leh chuan Iran tan hian ram danga nena inremna hi awmze nei tlem tak a ni thei reng bawk a.

He Iran Nuclear Agreement thubuai kal zel avanga US leh Europe a a thurualpui ram hrang hrang- Britain, Germany, France leh ram dangte boruak chhiat phah ziate, Russia in remchanga hmanga Europe ramte laka mark tih that a tum dante, China-in remchanga lo hman a tum dante, US-in Iran hrekna thar siam tuma hma a lak chhoh thar leh mek dante, Israel leh Saudi Arabia thlenga a a kaihhnawih theih dante chu a ngaihnawmin, a hranpa a sawi leh tham takzet a ni.

He thil thleng mek hian International Politics leh khawvel economy nasa taka a nghawng theih dawn avangte, North Korea Nuclear Programme tihtawp tuma hmalak meknate nen a inzawm chhoh vek dawn avangin zirlaite leh thalai vengva deuh chin chuan ngaihven zui a tha hle a ni.