US leh a thurualpuiten Syria an bei

U.S. leh a thurualpui ram pahnih – France leh British-te chuan Syria rama hmun thlan bik engemawzat chu tukin (April 14, 2018) khawvar hma deuh khan missile hmangin an bei a. Hei hi kar hmasa lawka Syria sipaiten an ram mipuite poison gas hmanga an bei ni a an ngaih vang a ni. He poison gas hmanga inbeihnaah hian civilian 40 chuang an thi a ni.

Pentagon thuchhuahin a tarlan danin US leh a thurualpuite hian missile 120 zet  hmangin Syria khawpui Damascus khawpui bula chemical leh biological ralthuam siamna ni a hriat scientific centre-te, Homs bula hetiang lam ralthuam dahthatna ni a rinte an bei a.  Khawvar hma, anmahni Syria huna zing dar 4 vel khan Damascus khaw dai velah hian thil puak ring tak tak leh meikhute hmuh a ni a, thlawhna thlawk thawmin a zui nghal bawk a ni.

US huna zan dar 9 vel, missile a Syria an beih mek lai hian US President Donad Trump chuan thuchah sawiin, “Syria sorkarin hman phal loh chemical ralthuam hmanga an ram mipuite a beih thin a tihtawp hma chuan hremna kan pe zel ang” a ti. Tin, Syria chetna thlawptu Russia leh Iran pawh Syria an thlawpna hnukkir turin a hriattir bawk.

Pentagon a news conference neihah Defense Secretary James N. Mattis chuan tuna an beihna bak beih chhunzawm tumna a awm rih loh thu a sawi a, tuna an beihna chu ‘one time shot’ a nih thu a tarlang. Defence Secretary chuan Syrian tualchhung mipuite leh Syria rama Russia sipai awmte khawih tel palh hlau tak chunga bei an nih thu a sawi bawk. Mattis chuan US sorkar chuan kar hmasa Inrinni a Syria tualchhung mite beihnaah hian Syria sorkarin Sarin tur a hman leh hman loh an confirm thei bik lo tih a sawi a, chlorine gas erawh hman a ni ngei tih an hrechiang thung a ni a ti.

Russia-in engtin nge a chhanlet ang?

US, Britain leh French indo thlawhnate hian tuipui kam atanga mel za chunga hla, Syria air defence battery-ten an kah phak lohna hmun atangin he operation hi an kalpui a. Gen. Joseph Dunford, Chairman of the Joint Chiefs of Staff chuan reporter-te hnenah he operation neih tur chungchang hi Russia hriat tir lawk a ni lo tih a sawi a. Hetih rual hian, an missile kal kawng tur a clear leh clear loh chu Russia nena inbiakna bik an neih hmanga an zawhfiah hmasak thu a sawi thung.

Russia hian US leh a thurualpuiten missile hmanga Syria an bei a nih chuan S-400 anti missile hmanga an lo kahthlak tur thu an lo sawi lawk tawh a. He Russia vauna hi ngai pawimawh duh lovin US leh a thurualpuite hian an bei ta ngei a. He thu buatsaih lai thleng hian Russia in a chhanletna emaw, anti-missile hmanga missile a lo kahthlak thu emaw hriat tur a la awm lo thung. Engtin nge a chhanlet dawn tih chu hun reiloteah a hriat theih turah ngaih a ni.

Syria sorkar thupuangtute erawh chuan an air-defence system-te chuan missile lo thlawk 13 an lo kahthlak thu an puang a. Mahse, hei hi finfiah a ni lo thung.

Kum 2017 khan US hian tomahawk missile 59 hmangin Syria thlawhna tumhmunte an lo ralsai tawh bawk a. Hei pawh hi chemical ralthuam hmanga puhna vang bawk a ni.

 

%d bloggers like this: