India siam, Dhanush laipuiin Final test a paltlang ta

India-in tualchhunga a siamchhuah ve ngat, Dhanush laipui chuan Pokhran thlalerah enchhinna tawp ber thlengin a paltlang ta a. Sipaite hnena hlan mai theih tura buaipui chhoh theih a ni ve dawn ta niin report a ni.

June 2-6 inkar mai pawh khan Dhanush laipui, enchhin nana an siamchhuah paruk atangin round 50 vel theuh kah chhin a ni a, a hlawhtling em em vek niin Jabalpur-a awm Gun Carriage Factory (GCF) Senior General Manager SK Singh chuan a sawi a. June 7-ah ringawt pawh khan heng laipui parukte hi battery formation a kah chhin vel a ni a, hemi ni ringawt pawh hian round 101 zet kah chhin a ni (battery formation an tih hian laipui pakhatin target chheh vel a kah hual laiin, pakhatin target takah a lo kap chat chat thin).

Dhanush hi 155mm x 45mm caliber artillery gun niin, hetiang lam laipui siamchhuah tawh zingah chuan kap dik ber pawla chhal a ni pha hial a. Km 38 a hla kap phain, India sorkarin nasa taka a buai phah hrep tak Bofors laipui ai pawhin km 11 zetin a kap thui thei zawk a ni.

Gun Carriage Factory (GCF), Jabalpur hian October 2011 khan he laipui siamna tur thu hi an hmu tawh a. Kum 2014 khan prototype hmasa ber siamchhuakin, a hnu lawkah 11 siamchhuah belh leh a ni a. Heng prototype hoah hian a vaiin round 4200 chuang kah chhin a ni tawh a ni. He Dhanush laipui hi Sikkim leh Leh lamah, khawvawt lutuk karah hlawhtling taka enchhin a lo ni tawh a, khaw hnawng karahte enchhin lo ni tawh bawkin, khaw lum lutuk Rajasthan a Pokhran-ah pawh enchhin a ni a. Pokhran a enchhin a nih tum hian a muzzle leh barrel a puak keh a. Hetiang a nih avang hian ngun taka ennawnin, siamthat ngai laite siamthat chhoh zel a ni, tunah chuan final test hial a lo paltlang ta a ni.

Dhanush laipui siamna hmanrua 81% hi India ram tualchhung kutchhuak a ni a, kum 2019-ah chuan hei hi 90% a tih san theih an inbeisei bawk.

Gun Carriage Factory (GCF) Senior General Manager SK Singh-a sawi danin ruahman anga a kal thei a nih chuan Dhanush laipui hi tun atanga reilote-ah Army hnenah 12 hlan theih beisei a ni a, a tantir lama Army-a an supply tur hi laipui 114 zet a ni. Inremna an ziah fel tak tak hunah phei chuan Army hnenah hian Dhanush laipui hi 414 lai supply theih an inbeisei nghe nghe.

Siamchhuah a nih hunah chuan Dhanush laipui pakhat man hi cheng vaibelchhe 14.50 vel a ni dawn a, a mu (shell) pakhat man ringawt pawh hi cheng nuai 1 zet a ni dawn a ni.

Hetih lai hian India hian US BAE System siam laipui tha zet mai, M777 Howitzers lei tumin kum 2016 khan cheng vbch. 5000 senna tur inremna a lo ziak tawh a. He laipui thenkhatte phei hi chuan kum 2017 khan India sipaite enchhin turin India ram a lo thleng tawh a ni. M777 Howitzer hian km 30 chauh a kap pha thung.