India rama eizawnna hlawk zualte

Khawvelah hian eizawnna chi hrang hrang 8000 vel a awm ang a sawi thin a ni a. Kan awmna hmun (environment) a zirin eizawnna awm zat erawh a inang lo thei hle thung ang.

Mizoram ang lo takin, India ram mai ni lo, khawvel a hnathawktu hlawh hnem ber berte hi sorkar hnathawk an ni lo deuh zel a. Corporate world lama thawk, company lian tak tak mi rawihte emaw, private a hnathawk emaw an ni fo thin. Tunlai India rama hnathawktu hlawh hnem ber berte lo tarlang ila (a ruaitute- sumdawng/employer erawh kan dah tha rih ang a) :

1) Management Professionals:

India rama Management zirna tha ber ber (IIM, etc)  atanga Management zir chhuakte hian company lian pui pui atangin offer an dawng tha thei hle a. A tlangpuiin company-a an luh tirh kum chanve atanga kum khat chhung vel chu Management trainee in an lut thin. Heng top institute atanga zirchhuakte hi chuan luh tan tirhah pawh kum khatah Rs. nuai 20-25 te an hlawh tlangpui a. Thenkhatah phei chuan heng aia sang fete pawh hi an hlawh thin. A hlawh tlem ber pawlin kum khatah Rs. nuai 7-8 an la pha. Management bikah hian eizawnna hi zirna institution-in a hril thui hle a, placement a inthlau thei hle a ni. Chuvangin, sum leh pai leh thiamnain a tlin  a nih chuan Management kher kher hi chu Institution lian leh lar apianga zir hi a tha; zir chhuah rual chiaha thawh theihna tur Company intlar an that bik thin avangin!

2) Investment Bankers:

Investment bankers kan tihte hian company tan pawisa an lakhawm a, thurawn an pe thin bawk. Dinhmun a zirin nihna hrang hrang – Analyst, Associate, Vice President, Director and Managing Director-te an chelh thin. Bank-ah nihna pawimawh tak tak an chelh a, thutlukna pawimawh tak tak an siam thin. Hetiang a nih avang hian an hlawh pawh a sang hle thin a ni. Bank tamtakin hetiang lama thiamna sang tak nei hi an mamawh reng a ni.

3) Chartered Accountant:

Chartered Accountant-te hian sumdawnna hrang hrang leh sum chetvelna lian tham zawng zawng deuh thaw an vil thin a, an tel lovin sorkar sum chetvelna a fel thei lo a, company lian leh sumdawng lian chin reng rengin an tel lovin sum an chingfel thei hek lo. Hetiang a nih avang hian  an hlawh pawh a sang thin hle a ni. India rama hna zahawm ber leh hlawk berte zinga mi a ni a. Zirchhuah pawh a har a, kum 2017 thleng pawh khan Mizoram atangin India rama practice thei Chartered Accountant puitling kan la nei lo a ni.

  • Entry level – Rs 5,50,000
  • Mid-Career – Rs 12,80,000
  • Experienced – Rs 25,70,000

4) Oil and Natural Gas Sector Professionals :

Tunlai khawvela eizawnna hlawk ber pakhat chu Oil company a thawk ho hi an ni. Heng oil company-ah hian hna chi hrang hrang – geologists, marine engineers, mechanical engineers, mining engineers, etc a tam thin hle a, thiamna sang tak tak nei atanga thiam nei lem lo, chak leh huai satliah tan pawh thawh tur a awm reng a ni. Kum khatah cheng nuai 15 chunglam an hlawh deuh fur a. A senior ho phei chuan an hlawh tha hle a, facilities an pe tha hle bawk.

5) Medical Professionals:

Medical lam hna chi hrang hrang hi India ram mai ni lo, khawvela hna zahawm berte zinga mi a ni reng a, an hlawh pawh a chhe tak tak thei lo. Sorkar lama lut lo a, Private practice lam luhchilh, hlawhtling tak takte phei chu an sum lakluh a sang hle. Mizoramah ngei pawh doctor lar deuh, private clinic hawng theite chuan thla khat chhungin cheng nuai engemawzat an lalut thei thin a ni. Sorkar a an luh erawh chuan hlawh ngawr ngawr chu sang tak a neih theih bik chuang loh!

6) Aviation Professionals:

Aviation professionals an tih mai pilots, ground staff, stewards, air hostesses, etc-te hi an hlawh a sang thin hle a. Pilot ho phei chu an thawhna a sang bawk a, an hlawh pawh sang tak an ni – kum khatah nuai 20 an hlawh kai deuh vek. Airline stewards/air-hostesses  kan tihte pawh hian airlines liana an luh fuh chuan an luh tirhin kum khatah Rs. nuai 6/7 an la pha deuh zel a ni. An hna a zir zelin hlawh erawh a inang lo thei viau. Aircraft engineer ho pawh hi an hlawh a sang hle.

7) Law professionals:

Law professionals kan tih mai, Ukil-te hian an lar tak tak hnuah chuan sum leh pai an hlawhchhuak hnem thei hle. Amaherawhchu, hetianga sumleh pai la lut tha tur chuan tei rei peih ve deuh emaw, thiam ve viau emaw a ngai thung. India rama Ukil lar ber berte hi darkar khat rawn man pawh nuai tamtak a ni thin. Luh tantirh lamah erawh chuan dawh theih ve deuh a ngai thung. Law hi India ramah chuan zir dan chi hnih a awm a. Class XII pass velleh 5 years course LLB a zir theih a, Graduate hnuah kum 3 course LLB a zir theih bawk.